Mavhesi emuBhaibheri Ane Mukurumbira kubva kuna A̱kolosiyawa 3

Pakurirana nevamwe

Nyi ni̱ nnyap nfwuo ma̱ng á̱ghyang nyin ba̱ vwuon za̱kwa mba ji a̱ni. A̱wot nyi chi kuzang a̱yin a̱ bwuo nyin a̱bun a̱ni. Nyi yok bwung bah: Ma̱nang A̱gwaza nchi a̱ka̱tuk nyia̱ nyin wu a̱ni; ma a̱nia wa, ku yet ta hwa nyi ma ni̱ nchi a̱bun á̱ghyang nyin wu.

Nyi ni̱ nyia̱ a̱di̱dam da̱ á̱za̱za̱rak nkyang na̱ shya̱ Ma A̱gwaza tswazwa a̱ni, kang ma̱ng á̱si̱ mi̱ swanta na.

Kuzang ta̱m nang nyi nyia̱, nyi ni̱ nnyia̱ nhu ma̱ng shim fwuo. Mat a̱tyubishyi wa nang nyi nyia̱ nggu ndyo bah; A̱gwaza wa nang nyi nyia̱ nggu ndyo.

Mat a̱nia, nang A̱gwaza nkhai nyin nyi yet á̱za̱za̱rak á̱niet nang gu chat a̱ni, ku yet ta hwa nyi ni̱ kup á̱pyia̱ nyin ma̱ng ntangka̱i za̱kwá nani nang nyi ni̱ nkup a̱yaatoot a̱fai a̱ni, ni̱nia yet: Nyi fwuong kunak á̱ghyang, nyi nyia̱ á̱niet shok, nyi yet á̱niet nyia̱ shonshyon, nyi yet á̱niet ghyuai a̱pyia̱, a̱wot nyi bu ni̱ ngyet á̱niet nyap nfwuo.

Nyi ni̱ nyia̱ a̱di̱dam tazwa A̱sham Nkhang Kristi ka mi̱ nfwuo nyin na kuzang jen. Nyi ni̱ ntyiet tsa bu ngba á̱ghyang nyin ma̱ng a̱mgba̱m mumwang nang A̱gwaza ka̱u nyin a̱ni. Nyi ni̱ ngwai A̱gwaza mi̱ nfwuo nyin na. Nyi bwom bubwom Za̱bura, bubwom dyep A̱gwaza, ma̱ng bubwom A̱za̱za̱rak Ntswa ghyang. A̱wot nang nyi ngyet á̱niet ba̱ yet á̱ghyi A̱tyoli Yesu bya a̱ni, a̱mgba̱m kuzang kyang nang nyi lyiat nyi si̱ nyia̱ a̱ni, nyi ni̱ nyia̱ kyang ku myim gu wa a̱ni. Nyi ya a̱son ma̱ng gwai A̱gwaza mat Yesu a̱ yong da̱ a̱kwonu nzi̱t a̱ni.

A̱wot kyang ku yet a̱ swak a̱ni, huhwa yet; nyi ni̱ nchat á̱ghyang nyin nchi̱ri̱ng nang a̱yin ni̱ nkup a̱toot a̱ni. Mat chat á̱ghyang huhwa mun nzi̱t ndung mami a̱tsatsak swat nyinyang.

A̱wot nyin, nang á̱ ta̱ngam nyin ma̱ng swuan swai dundung ma̱ng Kristi a̱ni, si̱ nyi tyia̱ á̱ghyi nyin ba di̱ nkyang na̱ yet á̱za̱za̱rak na̱ shya̱ Ma A̱gwaza tswazwa, da̱ a̱vwuo nang Kristi nswan a̱zayak Tyok A̱gwaza a̱ni.

A̱wot yok swat nyinyang nang Kristi ka̱u a̱ni, ku nyia̱ nta̱m mi̱ fwuo nyin na. Mat nang nyi ndi nang kap vam nyiung a̱ni, á̱ yorong nyin nyi swan swat nyinyang ma̱ng á̱ghyang. A̱wot nyi ni̱ ngwai A̱gwaza nchi̱ri̱ng.

Mat a̱nia, si̱ nyi tyia̱ a̱mgba̱m kuzang tangka̱i a̱ka̱tuk nyia̱ za̱kwa wu ma̱ nyin a̱ khwu, a̱wot nyi ghwon ngguu. Nggu wa yet a̱si̱ swanta a̱ shya̱ mi̱ nfwuo nyin na a̱ni, kidee; a̱shi̱shi̱k nyia̱ sang nsum, swat ku yet si̱ a̱na̱ndyung a̱ni, shyuo nvam, ma̱ng a̱ka̱tuk di̱dang á̱ghyang. Nyi yok yet á̱niet wuwok bah, mat a̱tyu wuwok li nang a̱tyu a̱ kwok ntong a̱zaghyi nghwughwu a̱yaagwaza sang swuan a̱ni.

Mat ku li á ngyei nyi wa ka̱n kwi di̱n jen nang Kristi ku nkhwu a̱ni. A̱wot swuan swai nyin ji, nang á̱niet si̱ mi̱n di a̱ni bah, shya̱ di̱ niat dundung ma̱ng Yesu di̱ mun á̱pyia̱ ma̱ng A̱gwaza.

A̱wot ma̱ninika, ku yet ta hwa nyi ghwon nyia̱ ntangka̱i nkyang nani; nyi ji̱p a̱ka̱tuk mwai lyen ma̱ng á̱ghyang, vwuot lyen, lak li á̱ghyang, tyam á̱ghyang, ma̱ng a̱lyiat sang nsum na̱ ghwut mi̱ nunu nyin hu a̱ni.

Nyi yok bwoi á̱ghyang nyin a̱ka̱laa bah. Mat nyi wa ka̱n ghwon nyi si̱ ji̱p a̱khwukhwop a̱ka̱tuk nyia̱ za̱kwa nyin wu ma̱ng nta̱m nggu na. Da̱ a̱kwonu a̱kya, nyi kup za̱kwa swai nang a̱yin ni̱ nkup a̱toot a̱fai a̱ni. Mat A̱gwaza shyak nyin, nyi yet á̱niet za̱kwá swai bya. A̱wot a̱ ya a̱son ma̱ng tyei nang nyi tai nggu da̱nian nyi ka lyen gu shansham.

Nyin á̱tyok meang, nyi ni̱ nchat á̱nyiuk nyin ba. A̱wot nyi yok ngai ma̱ng a̱mba bah.

Nyin mman na, nyi ni̱ nkhwi a̱lyiat á̱niet mbyin nyin na kuzang jen, mat A̱gwaza ni̱ fa̱k nyinyang si̱ huni.

Nyin á̱nyiuk nyeang, nyi ni̱ ntyia̱ á̱pyia̱ nyin mbwak tyok á̱tyok nyin ba, nang ku myim á̱nyiuk khwi A̱gwaza ba̱ nnyia̱ a̱ni.