Mavhesi emuBhaibheri Ane Mukurumbira kubva kuna Romã 12

Pakurirana nevamwe

Noerovijari mãe kõ rekoa rupi ikõ tapeiko e'ã nẽ. Nivoi pejipy'amogeta mã'ẽ ikõ pemokatuoka Janejare'e pè ipi nẽ, emimota rupi katu tapejipy'amogeta ky'y. Ãmẽ sõsi emimota katuay pekuwatà ky'y. Ãmõ, ivo tekoua e'e ve pekuwatà. Ãmõ, Janejare'e moryokaa pekuwa tary ve. A'e a'e rupi peikotà ãmẽ ky'y.

Eretãrãgwerà kõ, ikatuay wete Janejare'e penereko ipi. Peporijauesa ywete ipi. Ajawyi kee tapeiko emiauvay kõ rõmõ. Ãwitõ temime'ẽ rã ikatuay wete mã'ẽ vo 'ejẽ ikõ tapejime'ẽ ijupe peiko ipi nẽ, a'e pejẽ. Kee tija'e: “Age'e si Janejare'e remimota rupi aikotà ky'y!” tija'e imory ipi. Pejireko katu ikõ ivoa rupi tapeiko ipi nẽ, a'e pejẽ. A'evo peiko remẽ, ãmẽ si oterẽ jẽ Janejare'e remimota rupi katu peikotà ipi, emĩgwai e'eay kõ rõmõ peikotà.

Sikuwapa Jesu ovãe tarà mijẽ. Ajawyi tijanerory a'evoa rã rè, jaãrõ jẽ jaiko remẽ. Jajimomorijau jaiko remẽ, tijajimõarõ e'ã jaiko ipi. A'evo jaiko remẽ, tijapi e'ã Janejare'e pè japoregeta ipi.

Tijajiapyrasaoka e'ã ikõ janeaiwererà kõ pè ipi nẽ. Ivoa pè kõrijõ ikõ jajiapyrasaoka ipi nẽ, ivo katuay ywesõ ikasiay ipi rewarà mõ. A'evo jaiko remẽ, ãmẽ si ivoa ywesõtà ivo e'ãa 'arà kyty ãmẽ ky'y.

Tijajiauvay ojee jaiko ipi, Kiristu koty rewarà kõ rõmõ. Ãwĩvo tijaiko ipi. Janere ywesõ tijaja'a e'ã jaiko. Ãmõ kõ rè ywesõ tijaja'a jaiko ipi.

Ãmõ, kee a'e pejẽ. Tijajiauvay ojee jaiko ipi. Aje ywete poroauvaya rõmõ tijaiko. Ãmõ, janeaiwererà wyi ikõ tijajirova ipi nẽ. Ivo katua rupi kõrijõ tijaiko ipi.

Tijaovaja e'ã ãmõ kõ ipi nẽ. Tijanerory jẽ ikoty kõ. Ojikõ'õ janere remẽ, tijanerory jẽ ee kõ ipi.

Ajawyi kee a'e pejẽ, ejimorypa kõ. Ãmõ kõ janemoaità kupa remẽ, tijajipy e'ã ikõ ee kõ nẽ, a'e pejẽ. A'evo remẽ Janejare'e tè janerepytà. Ajare kee e'i Janejare'e ikusiwaoka: “Ije tè nivoi poroereko mãe kõ rè poroepytà”, e'i ikusiwaoka.

Japosikotà Janerõvijã ywete pè remẽ, tijaposiko katu jaiko ipi. Tijaneewe katu japosiko ipi. Tijajimo'ãgatuay ee jaiko ipi.

Ekatua rewarà mõ rõwã Janejare'e epyteporo emono wayvu mojenuarà rõmõ taiko. Okatua rupi tè a'evo erereko. Ajawyi kee a'e pejẽ. Janejare'e tè penemikuwa kõ ome'ẽ pejẽ ipi, pejirovija ee remẽ. Pevote pekasia rupi rõwã a'evo peiko ipi. O'ãg kasia rupi tè a'evo penereko ipi. Ajawyi tapejimoe'e tite e'ã a'evoa rè peiko ipi. Tapetekokuwavay penemikuwa rupi peikoa rè, emimory rõmõ tapeiko.

Ãmõ, ava mõ janemoai ipi remẽ ikõ tijajipy e'ã ee kõ nẽ. Ivo katu kõrijõ ikõ tijaiko ovake ãmẽ nẽ. A'evo jaiko remẽ, ãmõ kõ omã'ẽtà ivo jaikoa rè ãmẽ ipi.

Ikatuay wete ikõ tijaiko pirujẽ jane kõ reve ipi nẽ. Kee tija'e e'ã teve ipi: “Ije ywesõ si ekatuay wete. Ajawyi temimoe'e rõmõ aiko!” tija'e e'ã. Temĩgwai kõ vo 'ejẽ tijaiko ipi. Ojevo jẽ ojimorypa rõmõ tijaiko ipi.

Kee e'i maekwerà rupi tijareko janemoaiarerà kõ ipi: “Neãpã kõ ijamyay wete remẽ ikõ tereapoi kõ jẽ ãmẽ ipi nẽ. Ãmõ, i'ywa kupa remẽ ikõ teremoy'u kõ jẽ ãmẽ nẽ. A'evo neiko remẽ, ojimosĩoka ywetetà a'evo neikoa rè omãjã ãmẽ kupa”, e'i maekwerà rupi.

Janejare'e noerovijai mãe kõ janemomorijau ipi remẽ, kee tija'e kõrijõ Janejare'e pè ãmẽ ipi: “Papa, eja'a katu ãwĩ kõ rè, owaray toiko kupa”, tija'e kõrijõ ijupewarà mõ. Tijajipy e'ã ikõ janemojaiwe mãe kõ rè ipi nẽ. Ava mõ oryvay remẽ ikõ jane ve tijaneroryvay ee kõ ãmẽ nẽ. Ãmẽ ava mõ ijãgyoay remẽ ikõ a'evo ve tijaneãgyo teve ipyri nẽ.

Jesu koty rewarà kõ iporijau moma'e kõ rè iko ipi remẽ ikõ emiporu ãrã kõ tijame'ẽ ijupe kõ ipi nẽ. Ãmõ, mõropãrà maipe kytywarà janerena pè ovãe ipi remẽ ikõ tijapota tè uu janekoty ipi nẽ.

Janerete rewarà rè tè poromosã'ãgatà pemotekokuwa rõmõ. Ãwitõ pe'ĩte ipe janerete. Ajamã'ẽ mõa'ãrõwã wereko janere. Iteetejẽ. Emã'ẽ. Janeapirà, janejyva, janerãi... Ãwĩvo ve pe'ĩypyte mã'ẽ vo teipe jaiko Kiristu revejẽ jaiko mãe kõ rõmõ. Ajamã'ẽ ojevo jẽ rõwã janeremikuwa kõ.