पुथी ही चिन्‍हा परछा
ई पुथिन लुकस ब'अना आलस लिखचका र'अदस। आस लुकस ही दवसमाचार हूँ लिखचका र'अदस। “मुध चेलर ही नलख” पुथी ही उदेस्‍य येसुस ही ओरे ता चेलर एकसे की नेम्‍हा बोलतस ही अगुवा'ई ख़क्‍खियर अउर आर “यरुसलेम नू, गोट्‍टे यहुदिया, सामरिया प्रदेस गुट्‍ठी नू अउर ख़ेख़ेल ता कोँड़ा-कोँड़ा गुटी” (मुध चेलर १:८) आस ही दवसमाचारन बिड़यर ब'आ की ब'अना हिके। ई पुथी ख्रिस्‍तियन पत्‍त'अना ही तेंगना यहुदिर ती बिड़रा की गोट्‍टे राजी गुट्‍ठी नू अड़सका मानी घटना गुट्‍ठिन इद'ई।
नाम मुध चेलर ही नलखन मुध तिन भाग नू ख़ट्‍टा ओंगोत:
१) येसुस मेर्ख़ा केरका ख़ोख़ा यरुसलेम ती ख्रिस्‍तियन पत्‍त'अना एकसे बिड़रनुम केरा ब'अना पत्‍त नू;
२) प्‍यालेस्‍टा'इन इलाका ता दोसरा अड्‍डा गुट्‍ठी नू दवसमाचार बिड़रका ही पत्‍त नू;
३) ख़ेख़ेल ही मझी ता समुन्‍दर ही गन्‍डा ता राजी गुट्‍ठी नू अउर रोम गुटी दवसमाचार बिड़रका ही पत्‍त नू।
ई पुथी ही मुध कत्‍था नेम्‍हा बोलतस ही नलख ही पत्‍त नू हिके। इय्‍या नू लिखरका घटना गुट्‍ठी ती पत्‍त'उर एकसे की जिन्‍गी उज्‍जियर अउर आर ही संगती नू दवसमाचार ही सवंग एकन्‍ने रहचा ब'अना इद'ई।
पत्‍त इद'ऊ तरपांती
गोवाह ही खतरी सपड़ारना १:१-२६
क) येसुस ही फेच्‍चा पेसना अउर गच्‍छरना १:१-१४
ख) यहुदस ही सटा नू दोसरा आलसिन चज्‍जका १:१५-२६
यरुसलेम नू चिच्‍चका गोवाह २:१—८:३
यहुदिया अउर सामरिया प्रदेस नू चिच्‍चका गोवाह ८:४—१२:२५
पावलस दवसमाचार तिंगका१३:१—२८:३१
क) पावलस पहिल बेर दवसमाचार तेंगा गे केरका १३:१—१४:२८
ख) यरुसलेम नू मन्‍जका सभा १५:१-३५
ग) पावलस दोसर बेर दवसमाचार तेंगा गे केरका १५:३६—१८:२२
घ) पावलस तेसर बेर दवसमाचार तेंगा गे केरका१८:२३—२१:१६
ङ) यरुसलेम, कैसरिया अउर रोम नू पावलस जेहेल नू मन्‍जका २१:१७—२८:३१

Terera ku मुध चेलर पुथी ही चिन्‍हा परछा