 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

نش ذ بُوْلُس اَخدَّام ن عِيْسَى لْمَسِيح، يݣَّا-ٱيِي-د أَربِّـي اَذ يڒِيغ ذ اَرَّسُوْل. تْوَاخْضَرغ حمَا ٱذ خْبَرغ س لْإِنْجِيل ن أَربِّـي، لْإِنْجِيل-أَ إِي زِي يوْعذ أَربِّـي ذِي زْمَان س يِيڒس ن لْأَنْبِيَا نّس ذِي لْكِتَاب لْمُقدّس. أُو مَانَايَا خ مِّيس سِيذِيثْنغ عِيْسَى لْمَسِيح. عْلَاحْسَاب دَّات نّس ذ بْنَاذم نتَّا زِي دُّوْرِّيث ن سِيذْنَا دَاود. وَلَكِن عْلَاحْسَاب أَرُّوح نّس يصْفَان يمظْهَار-د ذ مِّيس ن أَربِّـي س يِجّن ن جّْهذ يمْغَر وَامِي إِي د يكَّر زِي ڒْموْث. أَقَا زِي عِيْسَى أُو خ سَّبَاب ن يِيسم نّس يݣَّا ذَايِي أَربِّـي لْبَرَكَا حمَا اَذ يڒِيغ ذ اَرَّسُوْل، أَذ بشَّرغ يوْذَان زِي مَارَّا ڒݣْنُوْس اَزَّايس اَمْنن اَذَاس طَاعن. ؤُڒَا ذ كنِّيو زݣ يِنِّي يتْوَاخْضَرن اَذ تذْفَارم عِيْسَى لْمَسِيح.
تَارِيغ إِ مَارَّا يمْعِيزّن ن أَربِّـي إِي يدْجَان ذِي ثنْدِينْت ن رُوْمَا يخْضَر-يكنِّيو اَذ تِيڒِيم ذ ڒْمُوْمِنِين صَّالِحِين. أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.

ذ اَمزْوَارُو، تْشكَّرغ أَربِّـي خَاوم مَارَّا إِذْوم س يِيسم ن عِيْسَى لْمَسِيح ڒَاحقَّاش لإِيمَان نْوم اَرِّين-اَس-د ڒخْبَار ذِي دُّنشْت-أَ ثكْمَاڒ. لِأَنَّا أَربِّـي إِي عبّْذغ س مَارَّا ؤُڒ ينُو تْبشَّارغ س لْإِنْجِيل ن مِّيس، نتَّا قَا يسّن تْفكَّرغ ذَايْوم ڒبْدَا ذِي ثْࢲَادْجِيث ينُو. تتَّارغ مڒَا يخس أَربِّـي اَڒ ونݣَّارُو اَذ اَفغ اَبْرِيذ اَغَارْوم د اَسغ. نش رزُّوْغ س وَاطَّاس اَكنِّيو ࢲرغ حمَا اَذَاوم ؤُشغ يجّن ن لْقُدْرَا رُوْحِيَا إِي ذَاوم غَا يُوْشن جّْهذ. يعْنِي أَ نْشجّع اَيَاوْيَا س لإِيمَان إِي ذَايْنغ يشَرّْشن.
آي اَيْثْمَا، خْسغ اَذ تسّْنم بلِّي اَطَّاس ن ثْوَاڒَاثِين تݣّغ اَغَارْوم د اَسغ، وَلَكِن ڒخُّو عَاذ وَار غَارْوم د ؤُوِيضغ. نش خْسغ ڒْخذْمث ينُو اَذ تنْجح ذَايْوم مَامّش ثنْجح جَار ڒݣْنُوْس نّغْنِي. لِأَنَّا أُو لَابُد اَذ ݣّغ لْوَاجِب اَك ييُوْنَانِيْين ذ يِنِّي وَار يدْجِين شَا ذ ييُوْنَانِيْين، أَك يِنِّي يغْرِين ذ يِنِّي وَار يغْرِين شَا. س مَانَايَا نش رزُّوْغ اَطَّاس اَكنِّيو بشَّرغ س لْإِنْجِيل ؤُڒَا ذ كنِّيو إِي يدْجَان ذِي ثنْدِينْت ن رُوْمَا.

أَقَا نش وَار تْسذْحِيغ شَا زِي لْإِنْجِيل لِأَنَّا لْإِنْجِيل ذ جّْهذ نِّي إِݣ يسْخدَّام أَربِّـي بَاش اَذ يسنْجم مَارَّا وِي غَا يَامْنن: أَيث-إِسْرَائِيل ذ يمزْوُوْرَا ثُمَّا يِنِّي وَار يدْجِين شَا زِي أَيث-إِسْرَائِيل. أَربِّـي يسْبيّن-اَنغ-د ذِي لْإِنْجِيل مَامّش غَا نمْصْڒَاح اَكِذس، مَانَايَا س لإِيمَان وَاحْذس. مَامّش يقَّار لْكِتَاب: <ونِّي يدْجَان نِيشَان اَذ يعِيش س لإِيمَان.>

فَا يمظْهَار-د وغْضَاب ن أَربِّـي زݣ وجنَّا خ مَارَّا شَّرّْ ذ ڒْبَاطڒ إِي تݣّن يِوْذَان يعْنِي يِنِّي يتْبطَّاڒن لْحَقِيقَا س شَّرّْ نْسن. أَقَا مِين زمَّرن يِوْذَان اَث سّْنن خ أَربِّـي يمظْهَار-اَسن-د، لِأَنَّا أَربِّـي نتَّا س يِيخف نّس إِي ذَاسن-ت-يد يسْمظْهَارن. زݣ وَامِي ثدْجَا دُّنشْت-أَ، مِين وَار يتْوَاࢲرّن ن أَربِّـي يعْنِي جّْهذ نّس يتْدُوْمَان ذ طَّبِيعَا نّس يُوْعْڒَان، نْفهّم-يثنْت نْࢲرّ-يثنْت مْلِيح ذِي ثْمسْڒَايِين يتْوَاخڒْقن. عْلَاحْسَاب مَانَايَا يوْذَان وَار غَارْسن بُو لْعُدر. وَاخَّا نِثْنِي تُوْغَا سّْنن أَربِّـي، وَلَكِن وَار ث حمِّيذن شَا وَار ث ثْشكَّرن شَا مَامّش يتْخصَّا اَذ ݣّن اَك أَربِّـي. لْأَفْكَار نْسن ذوْڒنْت خْوَانْت، ؤُڒَاون نْسن ذ يبُوْهَاڒِيْين ذوْڒن ذ ثَادْجسْت. حسّْبن خ يِيخف نْسن ذ يمِيغِيسن، نِثْنِي ذوْڒن ذ يبُوْهَاڒِيْين. بدّْڒن لْعَظَمَا ن أَربِّـي يدَّرن إِ ڒبْدَا س لْأَصْنَام يتْشَابَّاهن ذݣ يِوْذَان إِي غَا يفْنَان، ذ لْأَصْنَام يتْشَابَّاهن ذݣ يِجْضَاض ذ لْحَيَوَانَاث ذ مِين يتنْحُوْرُوْذن.
س مَانَاينِّي يسلّم-يثن أَربِّـي إِ مِين تْشهَّان وُوْڒَاون نْسن بَاش اَذ ݣّن لْفَسَاد بَاش اَذ سبهْدْڒن اَيَاوْيَا. كَّرن بدّْڒن لْحَقِيقَا ن أَربِّـي س يخَرِّيقن. عبّْذن خدّْمن إِ مِين يتْوَاخڒْقن مَاشِي إِ أَربِّـي لْخَالِق، ونِّي إِي ذِي ثدْجَا لْبَرَكَا إِ ڒبْدَا ن ڒبْدَاث. آمِين.
ثُمَّا يسلّم-يثن أَربِّـي إِ شّهَاوَاث نْسن إِي ثن يفضْحن. كَّرنْت ثمْغَارِين بدّْڒنْت يرْيَازن س ثمْغَارِين. ؤُڒَا ذ يرْيَازن كَّرن سمْحن ذِي ثمْغَارِين، ثكَّر ذَايْسن ثْمسِّي يجّن خ ونّغْنِي، أَرْيَاز يفسّذ اَك ورْيَاز. س مَانَايَا جبْذن-د لْعِقَاب إِ يِيخف نْسن إِي سْذَاهدْجن خ ڒمُوْنْكَار إِي تݣّن.
سّنِّي نِثْنِي وَامِي ؤُݣِين اَذ سّْنن أَربِّـي، يسلّم-يثن إِ ڒَعْقُوْڒَاث نْسن ينْفضْحن اَذ ݣّن مِين وَار يحْڒِين. نِثْنِي شُّوْرن س كُڒ نُّوْع ن ڒْمُعْصِيَاث ذ شَّرّْ ذ طّْمَع ذ ڒقْبَاحث ذ ڒحْسذ. نقّن يوْذَان تْمنْغَان. شُّوْرن س ؤُغْذَار ذ مِين وَار يحْڒِين، قَّارن نَّمِيمَا. قَّارن ڒْبَاطڒ، تْعِيفَّان أَربِّـي، تُوْكَّارن يوْذَان، سمْغَارن يخف نْسن، ذَايْسن تَّكبُّر. تݣّن نِّيث شَّرّْ ذ جْذِيذ، عصَّان لْوَلِدِين. وَار فهّْمن شَا، وَار تطّْفن شَا ذݣ وَاوَاڒ نْسن، وَار ذَايْسن بُو لْحَنَانَا ؤُڒَا ذ أَرَّحْمث. وَاخَّا سّْنن أَربِّـي يحكّم خَاسن س ڒْموْث خ يِنِّي يتݣّن ثِمسْڒَايِين-أَ، نِثْنِي كَّرن تݣّن-ثنْت. كْتَار زِي مَانَايَا، رطَّان خ يِنِّي إِي ثنْت يتݣّن.

Terera ku أيث-روما 1