If you would like a copy of this version please contact info@davaraudiobibles.org

Kulvi Outer Seraji Bible, CC-BY-SA-4.0, Beyond Translation (Text)
Kulvi Outer Seraji Audio Bible, CC-BY-SA-4.0, Davar Partners International, Beyond Translation, 2026. (Audio)

औटर सेराजी  स्टैण्डर्ड वर्शन

This work is licensed under Creative Commons Attribution-ShareAlike 4.0 License.

ए मेरै भाईओ, ज़धू हुंह परमेशरे खुशीए समादा खोज़दअ तम्हां सेटा लै आअ, मंऐं निं तम्हां का च़लाक बोल बोली गल्‍ला किई अर नां मंऐं समझ़कार रहैऊंणै कोशिश किई। किल्हैकि मंऐं त हेरअ द इहअ बच़ार करी कि तम्हां सेटा निं मुंह क्रूसा दी मारै दै ईशू मसीहा छ़ाडी होर कोहिए गल्‍ल खोज़णीं आथी।
हुंह आअ डरदी अर काम्बदी तम्हां सेटा लै। मेरै बोल़णैं अर मेरी शिक्षा दी निं ज्ञैने शोभली-शोभली लोभणैं आल़ी गल्‍ला आथी ती। पर पबित्र आत्मां किअ आपणीं शगती करै तम्हां का प्रगट कि ज़ुंण समाद मंऐं तम्हां का खोज़अ सह थिअ शुचअ। मंऐं किअ इहअ एते तैणीं कि तम्हैं परमेशर अर तेऊए शगती दी भरोस्सअ डाहे नां कि मणछे अक्ली दी।

ज़धू हुंह तम्हां आत्मां दी सैणैं विश्वासी सेटा लै आअ, मंऐं खोज़अ तम्हां का अक्लीओ समाद, पर एही अक्ल निं ज़ुंण एऊ संसारे या संसारै राज़ करनै आल़ै का आसा ज़ुंण छ़ेक्‍कै आसा खतम हणैं आल़ै। ज़हा अक्लीए बारै हाम्हैं खोज़ा सह आसा परमेशरे अक्ल, ज़ुंण पैहलै गुप्त ती। एते बारै निं अज़ी तैणीं कोही समझ़ पल़ी। भ्रमंड बणाणैं का पैहलै ई ती परमेशरे सोठ कि तेऊए अक्ल करै हणअ म्हारअ प्रतप्प।
पर तिंयां एऊ संसारे राज़ करनै आल़ै निं परमेशरे तैहा गल्‍ला समझ़ै, ज़ै तिन्‍नैं समझ़ी हंदी तै नांईं तै तिंयां महान प्रभू क्रूसा दी मारदै।
पबित्र शास्त्रो मतलब बी आसा इहअ ई ज़ेभै तिंयां इहअ बोला,
“ज़ुंण गल्‍ला आछी निं भाल़ी, अर कानै निं शूणीं,
अर ज़ुंण गल्‍ला मणछे दिलै ई दी निं पल़ी,
तिंयां ई गल्‍ला आसा ज़ुंण परमेशरे आपणैं
झ़ूरी डाहणैं आल़ै लै आसा बणाईं दी।”
पर परमेशरै किई तिंयां गल्‍ला आपणीं पबित्र आत्मां करै हाम्हां दी प्रगट, किल्हैकि आत्मां का आसा परमेशरे इना सोभी गल्‍ले बारै थोघ इधी तैणीं कि तेऊए गुप्त भेद बी ज़ुंण अज़ी मणछा का थोघ निं आथी। ऐहा गल्‍ला निं कोहै भुझ़ी सकदअ कि दुजअ मणछ असली दी किज़ै सोठा! ऐहा गल्‍ला ज़ाणा सिधअ सह ई मणछ आप्पू, अर परमेशरे सोठ बी निं परमेशरे आपणीं आत्मां छ़ाडी कोहै समझ़ी सकदअ।
म्हारी सोठ निं तेही आथी ज़ेही संसारे होरी लोगे सोठ हआ, पर परमेशरै आसा हाम्हां लै आपणीं पबित्र आत्मां दैनी दी ताकि हाम्हां का तिन्‍नां गल्‍लो थोघ लागे कि परमेशरै हाम्हां लै केही झींण किई।
इना गल्‍ला निं हाम्हैं मणछा का शिखल़ै दै ज्ञैना करै खोज़दै, पर हाम्हैं करा तिन्‍नां गल्‍लो बखान ज़ुंण पबित्र आत्मां हाम्हां का खोज़ा। पर देही दी मन्‍न लाणैं आल़ै मणछ निं परमेशरे आत्में गल्‍ला मंदै, ईंयां गल्‍ला आसा तिन्‍नां मणछा लै ऐडी अर नां तिंयां इना गल्‍ला समझ़ी सकदै। पर ज़ुंण पबित्र आत्मां दी मन्‍न लाआ तिंयां सका पबित्र आत्में गल्‍ला समझ़ी। ज़हा मणछा पबित्र आत्मां आसा भेटी दी सह सका तिन्‍नां सोभी गल्‍ला समझ़ी ज़ुंण पबित्र आत्मां खोज़ा। पर ज़हा मणछा का पबित्र आत्मां नांईं आथी सह निं तिन्‍नां मणछे सोठ भुझ़ी सकदअ ज़हा का पबित्र आत्मां आसा।
अह गल्‍ल आसा शुची, किल्हैकि पबित्र शास्त्रा दी आसा इहअ लिखअ द,
“प्रभूए अक्ल अर सोठ निं कोहै समझ़ी सकदअ
अर तेऊ लै निं कोहै सलाह दैई सकअ।”
पर हाम्हैं विश्वासी जाआ ऐहा गल्‍ला समझ़ी कि मसीहे मन्‍नैं किज़ै आसा।

Terera ku 1 करिन्थी 2