If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

सबी थऊँ पैहलै बचन थू, अतै बचन प्रमात्मां सोगी थू, अतै ऐह बचन ही प्रमात्मां थू। ऐह बचन ही शुरू थऊँ प्रमात्मैं सोगी थू।
सब कुछ तैस थऊँ ही पैदा भच्छुरा, अतै जैडा कुछ भी हा सो तसेरै बगैर पैदा ना भच्छुरा सो ही जीवन दिणै बाळा थू अतै सो जीवन मणु री ज्योती थू। ज्योती नैहरै मन्ज ही चमकदी हा अतै नैहरै ज्योती जो ना अपनाऊ।
अक्क मणु प्रमात्मैं री तरफा थऊँ आ जैसेरा ना यूहन्‍ना थू। सो ठेरै तांयें छूरा थू कि, तैहा ज्योती री गवाही दी सका, ताकि सब तसेरै द्धारा विस्वास करन। यूहन्‍ना अप्पू ता सो ज्योती ना थू पर सो प्रमात्मैं री तैहा ज्योती री गवाही दिणा छूरा थू।
सो मणु जैड़ा सच्ची ज्योती थू, अतै जैड़ी हरेक मणु जो प्रकाश दिन्दा हा ऐस संसारा मन्ज ईणैबाळा थू।
सो ऐस संसारा मन्ज थू, ऐह संसार तैस थऊँ ही पैदा भच्छुरा अतै ऐस संसारा रै मणुऐ तैसिओ ना पच्छैणु। सो अपणै देशा रै मणु मन्ज आ पर तसेरै अपणै तैसिओ ना अपनाऊ। जैडा तैस पुर विस्वास रखदै हिन अतै जैतणै मणुऐ तैसिओ अपनाऊ तिनी तियां जो प्रमात्मैं री औलाद भूणै रा हक्क दिता। सो ना ता खूना थऊँ, ना शरीरा री मर्जी थऊँ अतै ना मणु री मर्जी थऊँ पर प्रमात्मां थऊँ पैदा भच्छुरै हिन।
बचनै देहधारण करू; अतै तिनी कृपा अतै सच्चाई सितै भरी करी असु मन्ज डेरा करू, अतै अहै तसेरी ऐसी जय-जयकार हेरी जिंआ पिता रै इकलोतै पुत्रा री।
यूहन्‍नै तसेरै बारै मन्ज गवाही दिती अतै जोरा सितै बल्लू, “ऐह सो ही हा, जसेरै बारै मन्ज मैंई दसुरा थू कि सो मेरै बाद ईणा लगुरा सो मिन्जो थऊँ भी बदिकरी हा, क्ओकि सो मिन्जो थऊँ भी पैहलै रा थू।” क्ओकि तसेरै कृपा री भरपुरी सोगी अहै सबीये कृपा पुर कृपा पाईआ। क्ओकि व्यवस्था बनाणै बाळा ता मूसा थू पर प्रमात्मैं री कृपा अतै सच्चाई यीशु मसीह रै द्धारा प्रकट करी हा। प्रमात्मैं जो कुणिए भी कदी भी ना हेरूरा, इकलौता पुत्र जैडा पिता री गोदी मन्ज हा, तिनी ही तैसिओ प्रकट करू हा।


यूहन्‍ना री गवाही ऐह हा कि जैहणै यहूदी अगुवै यरूशलेम थऊँ याजका अतै लेवी जो तैस थऊँ ऐह पुछणै तांयें भैजु कि, “तू कुण हा?” ता यूहन्‍नै बिना झिझका रा ऐह मनी लैऊ कि, “अऊँ मसीह निआं।”
ता तियैं यूहन्‍नै थऊँ पूछु, “ता तू कुण हा? कै तू एलिय्याह भविष्‍यवक्ता हा?”
ता यूहन्‍नै जवाव दिता, “ना अऊँ सो निआं।” यहूदिये पूछु “कै तू भविष्‍यवक्ता हा?” ता तिनी जवाव दिता “ना अऊँ निय्आ।”
तियैं तैस थऊँ पूछु “फिरी ता तू हा कुण? ताकि अहै अपणै भैजणै बाळै जो जवाव दीन, कि तू अपणै बारै मन्ज कै बलदा?” यूहन्‍नै बल्लू “जियां यशायाह भविष्‍यवक्तै बलुरा हा अऊँ सो आवाज हा जैडा बियावान मन्ज जोरा जोरा सितै बल्लू करदा हा प्रमात्मैं री कनारी फिरा अतै अपणै मना जो सिधै रस्तै मन्ज लैईआ।”
ऐ सब मणु फरीसी री तरफा थऊँ भैजुरै थियै। तियैं मणुऐ फिरी तैस थऊँ पूछु, “अगर तू न ता मसीह हा, ना एलिय्याह हा, ना ही कोई भविष्‍यवाणी करनै बाळा ता मणु जो बपतिस्मा कजो दिन्दा?”
यूहन्‍नै तियां जो जवाव दिता, “अऊँ ता पाणी सितै बपतिस्मा दिन्दा पर तूसु मन्ज अक्क ऐसा मणु आ हा जैड़ा मसीहा हा, जैसियो तुहै ना जाणदै। ऐह सो ही हा जैडा मेरै बाद ईणैबाळा हा, अऊँ ता तसेरै जुटै रै तस्मै खोलनै रै काबल भी नियां।”
ऐह सब गल्ला यरदन नदी रै पार बैतनिय्याह नां रै ग्राँ मन्ज भूई जैड़ी यूहन्‍ना बपतिस्मा दिन्दा थू।

अगलै दिन यूहन्‍नै यीशु जो अपणी कनारी इन्दै हेरू अतै तैड़ी मणु सितै बल्लू, “हेरा, ऐह प्रमात्मैं रा मेम्ना हा जैडा ऐस संसारा रै पापा जो अप्पू पुर लेई लैन्दा। ऐह सो ही हा जसेरै बारै मन्ज अऊँ बलदा थू, ‘अक्क मणु मेरै बाद ईणा जैडा मिन्जो थऊँ भी महान हा, क्ओकि सो मिन्जो थऊँ पैहलै रा थू। अऊँ भी तैसिओ ना जाणदा थू कि सो मसीहा हा, पर अऊँ पाणी रा बपतिस्मा ठेरै तांयें दिन्दा आ कि इस्त्राएल रै मणु तैसिओ जाणी लैन।’”
फिरी यूहन्‍नै अपणी ऐह गवाही दिती, “मैंई आत्मा जो कबूतरा रै रूप मन्ज स्वर्गा थऊँ उतरदै तैस पुर बैहन्‍दै हेरू हा। अऊँ भी तैसिओ मसीहा रै रूपा मन्ज ना पछैणी पाऊ, पर जिनी मिन्जो पाणी सितै बपतिस्मा दिणै तांयें भैजुरा थू तिनी मिन्जो सितै बलुरा थू, ‘तुद आत्मा जो उतरी करी जैस पुर टिकदै हेरना। ऐह सो ही मणु भूणा जैस पवित्र आत्मा सितै बपतिस्मा दिणा। मैंई तैसिओ हेरूरा अतै मैंई ऐह सच बल्लू हा कि ऐह ही प्रमात्मैं रा पुत्र हा।’”

अगलै दिन यूहन्‍ना अपणै दूँ चेलै सोगी फिरी तैहा जगहा खडूरा थू, जैहणै तिनी यीशु जो तिन्ची गान्दै हेरू ता तिनी बल्लू, “हेरा, ऐह प्रमात्मैं रा मेम्ना हा।”
जैहणै यूहन्‍ना रै दूनी चेलै सो ऐह कणैन्दा हुणु ता सो यीशु पिचो चली पै। जैहणै यीशुऐ मुड़ीकरी हेरू कि सो पिचो ईणा लगुरै ता तियां जो वलु, “तुहै कसिओ तोपू करदै?” तियैं जवाव दिता, “हे रब्बी, (हे गुरू) तू कड्ड़ी रैहन्दा हा?”
यीशुऐ तियां जो जवाव दिता, “अईआ अतै हेरी लेय्आ।” तियैं तैस सोगी गिचीकरी तसेरै रैहणै री जगह हेरी, सो दिन भरी तैस सोगी रैह ऐह लगभग संझा रै चंऊर बजै रा टैमं थू।
सो दोई जिणै जैड़ै यूहन्‍ना री गल्ल हुणी करी यीशु पिचो गै थियै, तियां मन्ज अक्क शमौन पतरस रा भाई अन्द्रियास थू। अन्द्रियास अपणै भाई शमौन सितै मुळी करी तैसिओ बल्लू, “असिओ ख्रिस्त, यानी मसीहा मुळी गो हा।” फिरी अन्द्रियास शमौन जो यीशु वलै लेई आ। यीशुऐ तैसिओ हेरू अतै वलु, “तू यूहन्‍ना रा पुत्र शमौन हा अज थऊँ बाद तुद कैफा यानी पतरस कहलाणा।”

दूये दिन यीशुऐ गलील परदेस गाणै रा फैसला करू। यीशु फिलिप्युस नां रै मणु जो मुळु अतै तैस जो वलु “मेरै पिचो चली आई।”
फिलिप्युस भी अन्द्रियास अतै पतरस रै नगरा बैतसैदा रा रैहणै बाळा थू। फिलिप्युस नतनएल नां रै अक्की मणु सोगी मुळु अतै तैस सोगी बल्लू कि, “जसेरै बारै मन्ज मूसा रै व्यवस्था अतै भविष्‍यवक्तै बलदै हिन, सो मुळी गो हा; सो यूसुफ रा पुत्र यीशु नासरी हा।”
नतनेले तैस सोगी बल्लू, “कै कोई खरी चिज भी नासरत थऊँ निकळी सकदी हा?” फिलिप्युस बलणा लगा, “चली के हेरी लै।”
यीशुऐ नतनएल जो अपणी कनारी इन्दै हेरी करी तसेरै बारै मन्ज बल्लू, “हेरा, ऐह सच मन्ज ही इस्त्राएली हा; ऐस मन्ज कोई कपट निया।”
नतनेले यीशु सोगी बल्लू, “तू मिन्जो कियां जाणदा?” यीशुऐ तैस जो जवाव दिता; “तिजो फिलिप्युस रै हैदणै थऊँ पैहलै ही मैंई तिजो अंजीरा रै रूखा थलै हेरू थू।”
नतनेले यीशु जो बलै कि “हे रब्बी, (हे गुरू) तू प्रमात्मैं रा पुत्र हा; तू इस्त्राएल रा महाराजा हा।”
यीशुऐ नतनएल जो जवाव दिता; “मैंई जैडा तिजो सोगी बल्लू हा, कि मैंई तिजो अंजीरा रै रूखा थलै हेरू हा, कै तू ठेरै तांयें विस्वास करदा? तुद ऐस थऊँ भी बड़ै-बड़ै कम हेरन हिन।” फिरी यीशुऐ तैस सोगी बल्ळू, “अऊँ तूसु सोगी सच बलदा कि तूसु स्वर्गा जो खुलदै अतै प्रमात्मैं रै स्वर्गदूता जो मणु रै पुत्र बलै ओसदै कुऐंदैं हेरना।”

Terera ku यूहन्‍ना 1