Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

عالطريق لمّا كانوا الجنود الرّومان آخدين سيّدنا عيسى (سلامه علينا) عالإعدام، بالصدفة كان فيه رجّال نازِل من الرّيف عالمدينة إسمُه سمعان من مدينة قورينا بليبيا. لقطوه العساكِر لسمعان وأجبروه يحمل الصليب بدل سيّدنا عيسى لأنّه جسمه كان ضعيف من كتر التعذيب، ومشي وراه سمعان وحشد كبير من العالم، وكان في بيناتُن نساء عم تبكي وتنوح من كتر حزنها عليه. بس التفت سيّدنا عيسى عليُن وقلُّن: "يا ستّات القدس، ما تبكوا عليّ بالعكس إبكوا عحالكُن وعولادكُن، لأنّه رح يجي عليكن وقت الخراب والويلات وقت بقولوا فيه: "نيّال العاقِر، يلّي ما حملت وما رضّعت وما ولّدِت أبداً." ورح بقولوا "يا أرض انشقي وابلعينا يا ريت نموت ونرتاح من هالعذاب!" إذا أنا البريء يلّي عودي بعدُه أخضر وما فرّخ غش أبداً وهيك صار فيّي. شو رح يصير بيلّي عودُه كلّه غش ويباس؟"

وكفّوا الجنود الرّومان آخدينُ سيّدنا عيسى (سلامه علينا) عالإعدام وآخدين معُه تنين مجرمين كمان. ولمّا وصلوا عالتلّة يلّي اسما "الجلجثة" يلّي معناه الجُمجُمة، قاموا صلبوه هو والتنين المحكومين واحد عيمينُه وواحد عشمالُه. وكان الصّلب عادة الرومان بالإعدام بهيداك الوقت. وقام سيّدنا وهو عالصليب رفع راسُه وبلّش بالدعاء: "اللّهُمّ، يا وليّ الأمر الرّحمن، اغفور لهيدول الناس لأنّن مش عارفين شو عم يعملوا". بهالوقت كانوا العساكِر عم يتقاسموا تيابُه وصاروا يتخانقوا وقاموا عملوا قرعة. وبين ما كانوا الناس يلّي هونيك جمدانين من هالمشهد الرهيب، كان فيه بيناتُن كم مسؤول من الرجال اليهود صاروا يتمهزأوا ويقولوا: "لطالما أنقذ كتير عالم، مش لازم ينقذ حالُه هلأ؟ هيدا إذا كان هو المسيح المختار يلّي اصطفاه الله وأرسلُه متل ما بقول عن حالُه!" وصار كمان يجي عساكِر مستهزئين فيه يشرّبوه شراب رخيص مخلَّل ويتضحّكوا ويقولوا بصوت عالي: "إذا إنتَ ملك اليهود يالله نزّل حالَك!" وكانوا معلّقين خشبة عالصّليب مكتوب عليا التهمة: "هيدا هو ملك اليهود".
وقام واحد من المحكومين يلّي حدُّه يهينُه لسيّدنا ويتمسخَر: "هلأ إنتَ عنجد المسيح يلّي بتنقذ العالم؟ إذا عنجد إنتَ هو نجّي حالَك من هالمصيبة ونجّينا معَك!" بس المحكوم التاني بهدلُه وقلُّه: "إنتَ ما بتخاف الله، قاعِد عم تتمسخر وإنت عم تموت؟ أساساً نحنا منستحق إنّه الرومان يعدمونا، بس هيدا الرجّال بريء، شو ذنبُه! منُّه عامِل شي!!" والتفت عسيّدنا وكمَّل: "دخيلَك يا سيّدنا عيسى أذكرني بالممكلة الربّانية بس تروح وتقعد على عرشك فيها!" قام جاوبُه (سلامه علينا) وقلُّه: "بالحقيقة، مش بس رح إذكرك، إنتَ اليوم رح تكون معي بالنّعيم".
كان الوقت ضهر والشمس طالعة، وقامت فجأة غابت الشمس كلياً وصارت الدنيا ظلام كامل عوقت العصر، وانشقّ الحجاب يلّي داخِل بيت الله لنصّين وصرخ سيّدنا عيسى: "يا الله يا وليّ الأمر الرّحيم، روحي يلّي منّك بحطّها بين إيديك!" ولفظ أنفاسُه الأخيرة.
ولمّا شاف الضابِط الرّوماني يلّي كان واقِف على إعدامُه شو صار، سبَّح الله وقال: "أكيد هيدا الرجّال كان بريء وآدمي". وبالنسبة للناس المجمّعة يلّي إجت خصوصي حتى تحضر هالإعدام، رجعوا عبيوتُن عم يندبوا ويلطموا بعد ما شافوا يلّي صار. بس أصحابُه لسيّدنا عيسى والنساء يلّي لحقوه من الجليل لمحل الحادثة بقيوا واقفين من بعيد عم براقبوا كلّ شي.
وكان فيه رجّال محترم وتقيّ إسمُه يوسف عضو من أعضاء المجلس الأعلى من بلدة الرّامة بمنطقة يهوذا. كان من المؤمنين بظهور المملكة الربّانيّة وناطرها، ووقتا استنكر كلّ شي صدر عن رجال المجلس من قرارات وأعمال. وبعد موت سيّدنا عيسى راح يوسف لعند الوالي بيلاطس وطلب منّه جثمان سيّدنا وخاطَر بمنصبُه عشان يعملّ مراسم دفن، وبعدين راح ونزَّلُه عن الصليب وأخدُه كفَّنُه بالكتّان وحطُّه بقبر محفور بالصخر، قبر مش مدفون حدا بقلبُه من قبل، وخلّص الدفن قبل يوم عطلة السبت،
والنساء يلّي إجوا من الجليل كانوا عم يراقبوا يوسف من بعيد، وشافوه كيف حطّ الجثمان بالقبر. وهيك راحوا عالبيت وجهّزوا دهون من الطيب حتى يدهنوا الجثمان بعد ما تغيب الشمس، لأنّه السبت حسب الشريعة ما لازم يشتغلوا فيه هو يوم عبادة وراحة بس.

Terera ku من الإنجيل – عن لوقا 23