مَلاخِـي 4
4
يوم اللّه جايِ
1 # 4:1 الفصُل 4 آية 1 بالعربي هو الفصُل 3 آية 19 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ اللّٰهْ الْقَادِرْ قَالْ:
«دَاهُو الْيَوْم دَا جَايِ
حَامِي مِثِلْ الْفُرُنْ.
وَ كُلَّ الْمُسْتَكْبِرِينْ وَ الْعَاصِيِينْ
يَبْقَوْا مِثِلْ الْقَشّ.
وَ الْيَوْم الْجَايِ دَا يَحْرِقْهُمْ
وَ لَا يِخَلِّي لَيْهُمْ عِرِقْ وَ لَا فِرِعْ.
2وَ لَاكِنْ لَيْكُو إِنْتُو الْخَايْفِينْ مِنِّي،
عَدَالْتِي تَطْلَعْ لَيْكُو مِثِلْ الْحَرَّايْ
وَ ضَيَّهَا يِجِيبْ الشِّفَاءْ.
وَ إِنْتُو تَمُرْقُوا وَ تِنَطُّطُوا
مِثِلْ عَجَّالْ مَرَقَوْا مِنْ زَرِيبِتْهُمْ.
3فِي الْيَوْم النُّقُمّ فَوْقَهْ،
إِنْتُو تِفَجُّقُوا الْعَاصِيِينْ
وَ يَبْقَوْا مِثِلْ رُمَادْ تِحِتْ رِجْلَيْكُو.»
وَ دَا، اللّٰهْ الْقَادِرْ بَسْ قَالَهْ.
اللّه واعد بجيّة إِلِيَاس
4«أَذَّكَّرَوْا كِتَابْ التَّوْرَاةْ
الْأَنْطَيْتَهْ لِعَبْدِي مُوسَى فِي جَبَلْ حُورِيبْ.
وَ لِكُلَّ بَنِي إِسْرَائِيلْ،
أَنْطَيْتهُمْ قَوَانِينْ وَ شُرُوطْ.
5«دَاهُو أَنَا نِرَسِّلْ لَيْكُو النَّبِي إِلِيَاسْ
وَ دَا قُبَّالْ يَوْم اللّٰهْ مَا يَجِي
وَ الْيَوْم دَا عَظِيمْ وَ مُخِيفْ.
6وَ هُو يِجِيبْ السَّلَامْ
بَيْن الْأَبَّهَاتْ وَ عِيَالْهُمْ
وَ بَيْن الْعِيَالْ وَ أَبَّهَاتْهُمْ.
وَ مِثِلْ دَا، مَا نَجِي نِدَمِّرْ الْبَلَدْ.»
Trenutno izbrano:
مَلاخِـي 4: ع.د.ت19
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
La Bible en arabe tchadien © Alliance biblique du Tchad, 2019