Англунимос 42
42
Лэ Иосифости пхрала авилэ андо Египто
1Кала о Яково угангля, со андо Египто исы ворзо, вов пхэндя лэ шавэнди:
— Со тумэ дикхэн екх пэ екхэстэ? 2Мэ ашундэм, со андо Египто исы ворзо. Жан тай тинэн лэс амэнди, собы амэ тэ жувас тай тэ на мэрас.
3Э дэш пхрала лэ Иосифости жылэтар андо Египто, соп тэ тинэн о ворзо. 4Ай лэ Вениаминос, лэ Иосифостерэ пхралэс, о Яково на отмукля лэнца, пала кода со вов даралас, со лэса терэлапэ варисави бида.
5Кадя э шавэ лэ Израилёсти авилэ машкара бутэн аврэ манушэн тэ тинэн о ворзо, ке пэ пхув Ханаано сас бокх.
6О Иосифо хулаияс пэ ся пхув, вов битинэлас о ворзо лэ народости па ся Египто. Пхрала авилэ лэ Иосифости тай тэлилэ лэсти жы кай э пхув. 7Сар кати о Иосифо додикхля пэстерэ пхралэн, вов гатярдя лэн, ай притердяпэ, со вов на ганэл лэн, и ля тэ дэл дума лэнца холяса.
— Катар тумэ авилэ? — пушля вов.
— Андай пхув Ханаано, соп тэ тинас хамос, — пхэндэ вонэ.
8О Иосифо гатярдя пэстерэ пхралэн, ай вонэ на гатярдэ лэс. 9Вов сэрэсардя пэсти сунэ пала лэндэ тай пхэндя:
— Тумэ — шпионуря! Тумэ авилэ тэ дикхэн, кай андэ амари пхув исы найзоралэ тхана.
10— Со ту, рай, — пхэндэ вонэ. — Терэ копэля авилэ тэ тинэн хамос. 11Амэ сам саворэ екхэ дадэсти шавэ. Терэ копэля най хохавнэ мануша, амэ най шпионуря.
12Вов пхэндя лэнди:
— Най! Тумэ авилэ тэ дикхэн, кай андэ амари пхув исы найзоралэ тхана.
13Вонэ пхэндэ:
— Амэ, терэ копэля, — дэшудуй пхрала. Амэ — шавэ екхэ дадэсти, саво жувэл пэ пхув Ханаано. О майцыкно шаво екхатар лэ дадэса, ай екхэс амэндар бутэр нинай.
14О Иосифо пхэндя лэнди:
— Мэ жэ пхэндэм, со тумэ — шпионуря! 15Акэ сар мэ када тумэндар випхушава: солахав лэ фараоностерэ жувимаса, тумэ на жанатар катар, жыпокэ на авэла кардэ тумаро о майцыкно пхрал. 16Бишалэн екхэс тумэндар пала пхрал, ай авэр бэшэна андо баруно. Кадя мэ уганава тумари дума — чячес ли тумэ пхэнэн манди. Ай сар най чячес, солахав лэ фараоностерэ жувимаса, тумэ — шпионуря!
17Тай пхандадя лэн пэ трин дес андо баруно. 18По трито дес о Иосифо пхэндя лэнди:
— Стерэн, со мэ пхэнав, тай тумэ жувэна, ке мэ дарав Дэвлэстар. 19Сар тумэ найхохавнэ мануша, мэк екх тумэндар ашэлпэ катэ андо баруно, ай авэр жана тай отдындярэна о ворзо тумарэ бокхалэ ерянди. 20Тумэ трэбуй тэ анэн мандэ тумарэ лэ майцыкнэ пхралэс, собы тэ ганав, со тумари дума чячюни. Тунче тумэ ашэнапэ тэ жувэн.
Вонэ кадя тай стерэн. 21Вонэ пхэндэ екх екхэсти:
— Дичёл, со пар амэндэ авиля кадыя бида пала дош англа амаро пхрал. Амэ дикхасас лэсти грижа, кала вов мангэлас амэн тэ фирисарас лэско жувимос, ай амэ на камлям тэ ашунас лэс, тай акэ пар амэндэ авиля кадыя бида.
22О Рувимо пхэндя:
— Мэ жэ пхэнавас тумэнди — на терэн бэзэх пала шаворо, ай тумэ на канглэ ман! Акана потинаса пала лэско рат.
23Вонэ на гындосарэнас, со о Иосифо полэл лэнди шыб, пала када со авэр мануш пэрэндярэлас лэстери дума пэ лэндери шыб. 24Вов отбандиля лэндар тай заровдя, тунче обандиля тай ля тэ дэл дума лэнца. Вов ля лэндар лэ Симеонос тай спхандэля лэс англа лэнди якха.
Пхрала рисарэнпэ андо Ханаано
25О Иосифо пхэндя тэ пхэрэн лэнди э гонэ ворзоса, тай тэ шон саворэнди палпалэ лэнго руп тай тэ дэн лэнди хамос по дром. Кадя и сас стердо. 26Вонэ постходэ э гонэ пэ ослуря тай жылэтар андо дром. 27Кала вонэ тэрдилэ тэ рятярэ, екх лэндар роспхангля о гоно, соп тэ лэл о ворзо тэ праварэл лэ ослос, тай додикхэл андо гоно пэско руп.
28— Мэрно руп рисайля палпалэ! — пхэндя вов лэ пхралэнди. — Акэ вов, андэ мэрно гоно.
Лэндерэ одя заморцосайлэ даратар, вонэ бандилэ екх каринг екхэстэ тай пхэндэ:
— Со када тердя амэнца о Дэл?
29Кала вонэ авилэ кай пэско дад каринг о Яково пэ пхув Ханаано, вонэ роспхэндэ лэсти пала ся, со лэнца тердяпэ. Вонэ пхэндэ:
30— О мануш, саво хулаи пэ кадыя пхув, дэлас дума амэнца холяса тай приля амэн палай шпионуря. 31Ай амэ пхэндям лэсти: «Амэ найхохавнэ мануша, най шпионуря. 32Амэ — дэшудуй пхрала, шавэ екхэ дадэсти. Екхэс бутэр нинай, ай о майцыкно екхатар лэ дадэса андо Ханаано». 33Тунче кодыва мануш, саво хулаи пэ кодыя пхув, пхэндя амэнди: «Акэ сар мэ уганава, найхохавнэ тумэ мануша чи хохавнэ: ашавэн екхэ пхралэс катэ манца, лэн хамос важ тумарэ бокхалэ еря тай жан тумарэ дромэса. 34Ай анэн мандэ тумарэс лэ майцыкнэ пхралэс — кадя мэ уганава, со тумэ най шпионуря, ай чячюнэ мануша. Тунче мэ отдава тумарэ пхралэс тай пхэнава, соп тумэ тэ пхирэн пэ кадыя пхув, каринг камэн».
35Кала вонэ линэ тэ роспхандэн э гонэ, саворэ аракхлэ андэ пэско гоно о бужо лэ рупэса. Сар вонэ додикхлэ о руп, вонэ тай лэнго дад пэрэдарайлэ. 36О Яково пхэндя лэнди:
— Тумэ залинэ мандар мэрнэ бэятонэн. Лэ Иосифос бутэр нинай, тай лэ Симеонос бутэр нинай, ай акана тумэ камэн тэ лэн лэ Вениаминос. Со када авиля пэр мандэ!
37Тунче о Рувимо пхэндя пэсти дадэсти:
— Мулярэса мэрнэ дуен шавэн, сар кай мэ на анава лэ Вениаминос тути палпалэ. Дэ лэс мандэ, тай мэ анава лэс кардэ.
38О Яково пхэндя:
— Мэрно шаво на жала инчя туса. Лэско пхрал муля, вов ашыляпэ екжэно. Сар лэса дромэса терэлапэ глаба, тунче кадыла грижаса тумэ зындярна мэрно суро шэро пэ лэ мулэнди люма.
Trenutno izbrano:
Англунимос 42: СРБ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/