Zɛ́fènádyà 2
2
Zɛ́fènádyà ɓaà ɔ nyɔ ɓěɔ̀ ɓɛ́ wa ké xwa cɛ́ɛ̀
1Ɓě poìn dyí, ɓě mɔ̀ nyɔ ɓě seà dɛ̃ ɖò kɔ̃̀ɛ. Ɓě poìn dyí, ɓɛ́ ɓě ké ɖɛ ɓě ɖǎà nyuɛɛ jè hwìɖǐi poìn, 2ɓɛ́ Bounɓoɔ̀ dyoɖo ku wɔ̃ muà nyɔǔn kɔ̃ dyiìn nyɛɛ ní kɔ̃̀ ɖà ɓě kɔ̃ dyi, ɓɛ́ pìɔ̌ ní kɔ̃̀ ɖà ɓě kpa kà feɖe nìà kɛ. 3Ɓě ɓaà Bounɓoɔ̀, ɓě mɔ̀ nyɔ ɓě dyàà ɓě mìɔùn ɓíɖíi, ɓɛ́ ɓě dyià ɔ wuɖu ɓěɔ̀ nyuɛ. Ɓě nyu ɖɛ sɛ́ɖɛ́ìn dyíɛ, ɓɛ́ ɓě ké ɓě mìɔùn ɓíɖíi dyà kánáá pū. Ti ɖíɛ́ ɓě ní, Bounɓoɔ̀ muɛ nyuùn ɓɛ́ ɓě ké gǎ muà nììn ɓó ɔ dyoɖo-wèɔ̀ ɓaɖaa xwaún pó.
Ɓóɖó-dù ɓě nìà Éézùɖùɛ̀-ɓòɖòɔ̀ ɖeiɛɛ mú-gbɔɔ̀-gbɔɔ̀
4Ɓó tia ɓaɖaa, nyɔ ɖò se Gázà-hwɔ̀ɖɔ̀ɔ̀ mú sèɛ̌ mu, ké Àkéɖɔ̀ùn-hwɔ̀ɖɔ̀ɔ̀ mu hwùɖùǎ jǔùn. Bounɓoɔ̀ muɛ nyuùn ɓɛ́ mú-nyɛ́-nyɔ̀ ɓě ké nyɔ ɓě cĩ́à ɖé Áɖò-hwɔ̀ɖɔ̀ɔ̀ múɛɛ ɖé dyi kúmú ɓó dyóɖóaún sá-sá, ké wa mu nyɔ ɓě cĩ́à ɖé Ɛ́kɔ̀nɔ̀-hwɔ̀ɖɔ̀ɔ̀ múɛɛ ɖé dyi kúmúùn ɖekè. 5Ɓě mɔ̀ Féɖésìà-nyɔ̀#2:5 Féɖésìà-nyɔ̀ kè Kɛ́wèɖè-nyɔ̀ mɔ̀ nyɔ dyúáɖòɔ̀. ɓě cĩ́à ɖé dyóóɔ̀ wĩín ɖé Kénà-ɓòɖòɔ̀ kɔ̃ɛɛ, gǎ mu ɓě kɔ̃ dyiìn. Bounɓoɔ̀ ɖǎ ɓě zaa kpɔ̃̀ìn nɔ̀ɔ̀. Ɔ mu ɓě mú gbɔɔ̀ùn, ké ɓě ɖò se ɓíɖíi sèɛ̌ mu. 6Ɓěɛ̀ ɓóɖó nìà ɖé dyóóɔ̀ wĩín nyɛɛ mu fóɖóún kpáùn, ké ɓáɖáá-dyí-gmɔ̀-nyɔ̀ ɓěɛ̀ gbáá kè ɓáɖáá-kòò ɓě muɛ kɔ̃ nììn. 7Ké Júɖà-ɓòɖòɔ̀ nyɔ xwéɖé wè sè ɓíɖíiɛɛ mu ɓěɛ̀ ɓóɖóɔ̀ dyí ɖúùn. Ké wa mu ɖé nyúà-ɖɛ̀ ɓě dyí gmɔ̀ìn, ké wa mu gbǒ ɓě nìà ɖé Àkéɖɔ̀ùn-hwɔ̀ɖɔ̀ɔ̀ múɛɛ mú pɛ̃́ìn. Sepóɛɖé Bounɓo mɔ̀à waà Gèɖèpɔ́ɔ̀ kɛɛ mu ɖé wa jè gbo kɔ̃̀ùn, ké ɔ muɛ nyuùn ɓɛ́ wa ké dúún zaìn ɖe.
8Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ, ké ɔ ɖá, “Ḿ ɖǎ Móà-nyɔ̀ ɓěɔ̀ kè Ámànà-nyɔ̀ ɓěɔ̀ wuɖu gbà ɓě wa cɛ̃à ní nyɔ ɓěɔ̀ kɔ̃ún, ɓɛ́ wa dyià ɓɔ́ɖɔ́uń nì kà wa mu wa ɓóɖóɔ̀ xwa zàùn gana-kà kɛɛ wɔ̃́. 9Ɔ jèɛɛ, ḿ gboò ḿ mìɔùn dyí kà mɔ̄ mɔ̀à Éézùɖùɛ̀ Gèɖèpɔ́ɔ̀ kɛɛ, ní mu Móà-ɓòɖòɔ̀ kè Ámànà-ɓòɖòɔ̀ mú gbɔɔ̀ùn kà ḿ nyu zɔ̃̌ɔ̀ kà Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kɛ. Pìǐ-kpò mu waà ɓóɖó ɓěɔ̀ dyí ɖúùn, ké ɓóɖó ɓěɔ̀ mu tɔ̃́-ɓì ɓě kè ɓóɖó wáɖá-wáɖá ɓě jǔùn kánáá pū. Ní nyɔ ɓěɔ̀ xwéɖé wè sè ɓíɖíiɛɛ mu waà ɓóɖó ɓěɔ̀ hwuùn, ké wa mu waà ɓóɖó ɓěɔ̀ dyí ɖúùn.”
10Kǎà Bounɓo mɔ̀ nyɔ nìà ɖɛ séín kɔ̃in nyɛɛ mu Móà-nyɔ̀ ɓěɔ̀ kè Ámànà-nyɔ̀ ɓěɔ̀ gǎ kɔ̃ tòɛ̀ nyuùn, sepóɛɖé wa ɓúáìn wa mìɔùn dyí, ké wa cɛ̃ Bounɓoɔ̀ nyɔ ɓěɔ̀ wuɖu gbà kɔ̃ún. 11Bounɓoɔ̀ mu wa fã̀àǔn poùn. Ké ɔ muɛ nyuùn ɓɛ́ kũùn-kpò-gèɖèpɔ́ɔ̀ séín ɓěɔ̀ ké zùǔn sɔ̀ìn, ké wa se ɖɛ ɖò kpaá mu ɖe. Ɔ ɖǎ ná nìǐn, nyɔ séín nì ɓóɖó-dù séín kɔ̃ɛɛ mu ɔ ɓièìn ɖé waà ɓóɖó ɖò-ɖò ɓěɔ̀ kɔ̃.
12Kúsì-nyɔ̀ ɓě, Bounɓoɔ̀ mu ɓě gàsíà dyí ɖáɓáùn ɖekè.
13Ké Bounɓoɔ̀ mu ɔ sɔ̃ɔ̀ Àsíwíɖíà-ɓòɖò nìà ɖé xwía kɛɛ kɔ̃ pɛ̃́ìn, ɓɛ́ ɔ kéɛ mú gbɔɔ̀. Ké ɔ muɛ nyuùn ɓɛ́ ɓóɖóɔ̀ dìɓà-hwɔ̀ɖɔ̀ mɔ̀à Nínívà kɛɛ ké hwùɖùǎ kè gbǎùn-fúɖúá dyɛ kɔ̃in mú zɛ̃̀ìn. 14Sɔ̀ìn ɓóɛ gboɛɛ ní, nyúà-ɖɛ̀ ɓě kè xwáɖá-xwíɖíi-nìmìì ɓě mu Nínívà-hwɔ̀ɖɔ̀ɔ̀ hwùɖùǎɔ̀ kɔ̃ cĩ́ìn. Ké kùnǔù ɓě mu gbǒ wáɖá-wáɖá ɓěɔ̀ wúɖɛ̀-wɔ̃̀ ɓěɔ̀ gbo dyi koìn, ɓɛ́ wa ké wuɖu poìn, ké hwĩ́ín-hwã ɓě mu wùɖùɛ̌n nììn ɓó gbǒ-wɔ̃̀ ɓěɔ̀ gbo. Ké nyɔǔn ɓě mu síɖà-cù ɓěɔ̀ gbǒ ɓěɔ̀ bũ̌in zàùn.#2:14 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè. 15Ɖɛ ɓě nìà kɛ mɔ̀ ɖɛ mu hwɔɖɔ ɓɛ́ ɔ ɓúáìn ɔ mìɔùn dyí, ké ɔ poìn hwìɖǐi ɖé ɔ mìɔùn mú kà ɖɛ ɖò se ɔ gbo kpáa ɓɛ́ìn nyɛɛ gbo kpáùn wɛ̃. Hwɔɖɔɔ̀ nyɔ ɓě cɛ̃ɛ kà wa mɔ̀ nyɔ ɓéɖé dìɓà-hwɔ̀ɖɔ̀ vɛ̀nɛ̀ ɓóɖó-kpàà kɔ̃ɛ. Kɛɛ waà hwɔɖɔɔ̀ mu hwùɖùǎ jǔùn, ké xwáɖá-xwíɖíi-nìmìì ɓě muɛ mú cĩ́ìn. Ké nyɔ séín mu ɓó zĩ̀ìn nyɛɛ mu dú dya poùn, ɓɛ́ wa ké ɔ tóùn-ní po.
Trenutno izbrano:
Zɛ́fènádyà 2: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.