23
Ga Sara 'Wi Ee Ni bu nu Makpila
1Tɛzhɛla ta shiywa shi Sara tu namɛ dipi-yebi-nu-woshi-na-shɛba-shi-cenje (127). 2Ga Sara 'wi ni Hibron, na cɛnjɛ ti Kenan, ga Abraham cwɛ-u'wo, boo to-ụkwụla iwɛ ubwa.
3Ga Abraham ishijɛ no olugwo ru'wo ru Sara, bee zhe baa jɛmɛ n-ndumwa nɛ Ɛhit, bɛɛ hiɛŋ, 4N shɛ bụlashɛ keeni bugaiŋ na ashashɛ hiŋ, N sengeni ma cɛnjɛ tu na Ngɛɛ zhɛ mo no biyikwo mi no ofwo hiŋ.#Ehib 11:9,13; Ugo 7:16
5Ɛhit ata jishijɛ Abraham, ɛɛ hiɛŋ. 6Iyɛri, shɛlaga, gabụ bɛ shɛ uhiu ụ'wụtụ na ashashɛ tu. Shapɛ ru'wo re biyikwo bu maa ni ru nu u'uye tu unaa na zhɛmɛ tebiye. I zasa bụtụ be elele na ashashɛ tu zhɛ ma bụ lakana u'uye tụpana maa ni ru'wo re biyikwo bu o.
7Ga Abraham kwuzeni atwa cɛnjɛ ta ata, aba shɛ Ɛhit. 8Nazhɛ bee mbishi aŋ, bɛɛ hiɛŋ, Yaa shɛ yaa hiɛ kwụlanɛ maa mo no ru'wo re biyikwo mi epe, asha shɛlaga ma iwɛ mi, maa hi n lụpajɛ Efron yɛu Zoha. 9Maa ma m pana ụpangwụ Makpila ata namɛ nu ukwunanga itimɛ ibwɛ, gana elele tu ulumo ibɛ namɛ, N zhɛ ma tụpa maa ma m pana iwɛ maa ma 'yaga ugba na maa mu no no atwa mi na ashashɛ hiŋ.
10Ge Efron ta kaa jɛjɛ na ashashɛ Ɛhit ata, gɛ Efron na shɛ Bihit ata jishijɛ Abraham ne eshe Ɛhit ata, ibɛ shɛ atwa elele na teni no odubo uba ụshɛpwụ ubwa, bɛɛ hiɛŋ, 11Awo, iyɛri mi, shɛlaga iwɛ mi, N zhɛ ma bụ pana itimɛ ɛtɛ, tụ ụpangwụ ata namɛ na amɛ ibɛ. Gabụ Ngɛɛ zhɛ ma pana ne eshe atwa ga mi Ngɛɛ zhɛ ma bụ pana, no ru'wo re biyikwo bu.
12Ga Abraham kwuzeni atwa cɛnjɛ ta ata tɛ Ɛhit. 13Ga Abraham mbishi Efron ne eshe atwa cɛnjɛ ta ata, bɛɛ hiɛŋ, Yaa shɛ yaa bụ kwụlanɛ, asha ma bụ tabwa maa hwụjɛ iwɛ mi, maa leshiji ulumo itimɛ ɛtɛ Ngɛɛ zhɛ ma bụ tụpa, ni i'ɛlɛ mi, nazhɛ Ngɛɛ zhɛ mo no ru'wo re biyikwo mi apata.
14Ge Efron jishijɛ Abraham, bɛɛ hiɛŋ, 15Iyɛri mi, shɛlaga n-ndumwa mi mi, ucece itimɛ nɛ ulumo ibɛ shɛ azụrụfa arinya akpakwụ-eyebi gbalụ (400), imbe inɛ ɛtɛ zhɛ ya nda na ashashɛ mi na bụụ? No ru'wo re biyikwo bu apata.
16Ga Abraham shɛlajɛ n-ndumwa mi Efron, bee menji ulumo ukwuribi we ebe ge Efron jɛmɛ, ne eshe Ɛhit ne bimenji ba azụrụfa arinya akpakwụ-eyebi. Ibɛ shɛ ulumo na ahinya a lashɛga na aka ata. 17Nazhɛ ga Abraham 'yajɛ ya itimɛ Efron nɛ namɛ nu Makpila, nu uwaŋna-banụ Mamre, ti itimɛ ɛtɛ, tụ ụpangwụ ata namɛ ni ibɛ ti i'wɛ'wɛ ye elele nɛ zweni ni itimɛ ɛtɛ tutu ukwunanga itimɛ ɛtɛ kpaaŋ. 18E peni Abraham cɛnjɛ ta ata gom ne eshe Ɛhit, te eshe atwa elele na teni no odubo uba ụshɛpwụ ubwa. 19Nazhɛ ga Abraham ni ya biyikwo bwa ga Sara nụ ụpangwụ ata namɛ ni itimɛ Makpila nu uwaŋna-banụ Mamre, ibɛ shɛ inɛ Hibron na cɛnjɛ ti Kenan. 20Gabata Ɛhit ata peni Abraham itimɛ ɛtɛ, keeni ụpangwụ ata namɛ ni ibɛ umɛwɛɛ maa i shɛ cɛnjɛ tu bwa tu na bɛɛ zhɛ no no atwa ubwa.