Parallel

Génesis 42

42
Joseypa wawqenkuna kawsay rantiq risqankumanta
1Egipto nacionpi kawsay kasqanta yacharuspanmi churinkunata Jacob nirqa:
¿Imatataq qawanakuspaykichikqa ruwachkankichik? 2#Hch 7.12.Uyarinim Egipto nacionpi kawsay kasqanta, rispayá rantimuychik, chaynapi yarqaymanta mana wañurunanchikpaq, nispa.
3Chaymi Joseypa chunkantin wawqen-kuna, Egipto nacionta rirqaku kawsayta rantimunankupaq. 4Ichaqa Jacobmi Joseypa wawqen Benjaminta mana kacharirqachu: “Yanqañataq imapas pasaramunman” nispa. 5Israelpa churinkunam kawsay rantiq rirqaku sapaq runakunapiwan kuska. Canaán lawpipas llumpay muchuy kasqanrayku. 6Egipto nacionpim José munaychakuq karqa, paymi llapa runakunaman kawsayta rantikuq. Joseypa wawqenkunam chayaruspanku paypa ñawpaqninpi pampakama kumuykurqaku. 7Joseymi wawqenkunata qawaykuspan reqsirurqa, ichaqa mana reqsiq tukuspam piñasqallaña paykunata tapurqa:
¿Maymantataq hamuchkankichik? nispa.
Paykunañataqmi nirqaku:
Canaán lawmantam kawsaykuna rantiq hamuchkaniku, nispanku.
8Wawqenkunata José reqsiruchkaptinpas, paykunam ichaqa mana reqsirqakuchu. 9#Gn 37.5-10.Chaymi Joseqa paykunamanta mosqokusqanta yuyariruspa nirqa:
Wateqaqkunam kankichik, kay nacionqa arkachisqa otaq mana arkachisqa kasqanta qawaqmi hamurqankichik, nispa.
10Paykunañataqmi nirqaku:
Señorllayku, serviqnikikunaqa kawsay rantiqllam hamurqaniku. 11Lliwchaykum huk taytapa churillan kaniku, kay runallaykikunaqa cheqap rimaq runakunam kaniku manam wateqaqkunachu, nispanku.
12Joseyñataqmi nirqa:
Cheqaptapunim qamkunaqa hamurqankichik, kay nacionta harkachisqa otaq mana harkachisqa kasqanta wateqaq, nispa.
13Paykunañataqmi nirqaku:
Kay runallaykikunaqa chunka iskayniyuq wawqekunam kaniku, Canaán lawpi huk taytapa churillan. Sullkaykum taytaykuwan qeparamun, hukninñataqmi chinkarun, nispanku.
14Chaymi José nirqa:
Nisqaypi hinapas qamkunaqa wate-qaqmi kankichik. 15Kunanmi pruebasqa kankichik: Faraonraykum jurani, sullka wawqekichik kayman mana hamuptinqa manam kaymanta lloqsinkichikchu. 16Chaynaqa, hukkaqnikichikta kachaychik chaynapi wawqekichikta pusamunanpaq, wakiqnikichikñataq preso qepaychik, rimasqaykichik cheqap kasqanta yachanaypaq, mana chayqa Faraonraykum jurani, qamkunaqa wateqaqmi kankichik, nispa.
17Hinaspam paykunata kimsa punchaw carcelpi wichqarurqa. 18Kimsa punchawmantam paykunata José nirqa:
Ñoqaqa Diostam kasukuni, kawsakuyta munaspaqa kaynata ruwaychik: 19Cheqap rimaq qarikuna kaspaykichikqa huknin wawqekichikta carcelpi saqespa aylluykichik mikunanpaq kawsayta apaspa wasikichikman kutiychik. 20Ichaqa sullka wawqekichiktam pusamuwankichik, chaymi cheqap rimasqaykichik kanqa, mana chayna kaptinqa wañunkichikmi, nispa.
Paykunañataqmi allinmi nispanku, 21hukninkumanta hukninkukama nina-kurqaku:
Cheqaptapunim wawqenchikpa contranpi huchallikururqanchik. Ruega-kuwachkaptinchikpas ñakariyninta qawachkaspam mana uyarirqanchikchu, chayraykum ñoqanchikman kay ñakariy chayaramuwanchik, nispanku.
22 # Gn 37.21-22. Rubenñataqmi nirqa:
Ñoqaqa nirqaykichikmi “Ama huchallikuychikchu warmapa contranpi” nispay, ichaqa manam kasuwarqankichikchu, kunanmi vidanmanta ñakarichkanchik, nispa.
23Paykunaqa manam yacharqakuchu rimasqankuta José entiendesqanta, paykunata José rimapayaptin rimayninkuman huk runa tikrasqanrayku. 24Chaymi paykunamanta rakikuykuspa José waqarqa. Sonqon tiyaruptinmi paykunaman kutispan huktawan rimapayaspa qawachkaptinku Simeonta chaqnachispa presocharurqa. 25Chaymantam runankunata José kamachirqa, wawqenkunapa costalninman trigota huntachinankupaq chaynataq sapakamapa qollqenkutapas costal-ninkuman kutiykachinankupaq hinaspa qoqawchanankupaq. Chaynatam paykunapaq ruwarqaku. 26Joseypa wawqenkunam kawsaykunata asnonkuman cargakuykuspa kutikurqaku. 27Samasqankupiñam asnonman mikuchinanpaq costalninta hukkaqnin kichaykuspan qollqenta tarirurqa. 28Chaymi wawqenkunata nirqa:
Qollqeytam kutiykarachimuwasqa, costalniypim tariruni, nispa.
Hinaptinmi mancharikuspanku ninakurqaku.
¿Imatataq Diosqa kaywan ruwawachkanchik? nispanku.
29Canaanman chayaruspankum taytanku Jacobman imaynam kamusqankuta willakuspa nirqaku:
30Egipto nacionpi kamachikuq runam nacionnin wateqaqpaq hapiwaspanku llumpay piñasqallaña rimapayawarqaku.
31Chaymi ñoqayku nirqaniku: “Manam wateqaqkunachu kaniku, ñoqaykuqa cheqap rimaq qarikunam kaniku. 32Huk taytapa churillanmi chunka iskayniyuq kaniku, hukniykum chinkarurqa, sullkaykuñataqmi taytaykuwan Canaán lawpi qeparamun”, nispayku. 33Hinaptinmi chay nacionpi kamachikuq niwarqaku: “Kaynapim reqsisqaykichik cheqap runakuna kasqaykichikta, huknin wawqekichikta ñoqawan saqeychik hinaspa aylluykichikman mikunankupaq kawsayta aparikuspa kutiychik, 34hinaspa sullka wawqekichikta pusamuwaychik, chaynapi mana wateqaqkuna chaynataq cheqap rimaq qarikuna kasqaykichikta yachanaypaq. Chayñam wawqekichikta kacharisaq, qamkunapas kay nacionpim negociota ruwakunkichik”, nispa.
35Chaynata niruspanku costalninkuta taqtaptinkum sapakamapa qollqe kipunku kachkasqa, chaymi qollqenkuta qawaykuspanku taytankupiwan mancharikururqaku. 36Hinaptinmi taytanku Jacob paykunata nirqa:
¿Manaña churiyuqtachu saqeruwankichik? Joseyqa manañam ñoqanchikwanñachu, nitaqmi Simeonpas kaypiñachu, Benjamintapas pusaruptikichikqa, tukuy kaykunawanqa llakimantachá wañurusaq, nispa.
37Chaymi taytanta Rubén nirqa:
Ñoqam Benjamintaqa kutichimusaq, mana kutichimuptiyqa iskaynin churiykunatachiki wañurachinki, nispa.
38Jacobñataqmi nirqa:
Qamkunawanqa manañam churiyqa rinmanchu, wawqen wañuruptinmi sapallanña qeparqa, chay risqaykichikpi imapas pasaruptinqa, qamkunapa hawaykichikpim llakimanta kay yuyaq taytaykichik wañurusaq, nispa.