39
Joseyta Dios yanapasqanmanta
1Ismael castakuna Egipto nacionman Joseyta aparuptinkum, Potifar rantirurqa. Potifarqa Egiptopi rey Faraonta waqaychaq soldadokunapa capitanninmi karqa. 2#Hch 7.9.Ichaqa Tayta Diosmi Joseywan karqa, chaynapim payqa Egipto nacionniyuq patronninpa wasinpi yachaspa ima ruwasqanpipas allin lloqsirqa. 3Potifarmi qawarqa Joseywan Tayta Dios kasqanta chaynataq tukuy ruwasqanpipas yanapasqanta. 4Chaymi Potifarqa Joseyta allinpaq qawaykuspa wasinpi mayordomonpaq churarqa, tukuy kapuqninkunata nanachikunanpaq. 5Chay punchawmantam Joseyrayku Potifarpa wasinta Tayta Dios bendecirqa. Chaymi Tayta Dios tukuy kapuqninpi, wasinpi chaynataq chakranpipas bendeciykurqa. 6Tukuy kapuqninta Joseyman saqeykuspanmi Potifarqa manaña imamantapas preocupakurqañachu, aswanqa mikunallanmantañam.
Joseyqa allin rikchayniyuq kuyapa jovenmi karqa. 7Chaykunapa qepantam patronninpa warminqa Joseyta munapayaspan nirqa:
Ñoqawan puñuy, nispa.
8Joseyñataqmi mana munaspan patronanta nirqa:
Patronniyqa wasinpi tukuy ima kaqkunatam ñoqaman saqeykuwan, chaynapim payqa manaña imamantapas preocupakunñachu. 9Kay wasipiqa ñoqamanta aswan munayniyuqqa manam pipas kanchu. Wasinpi tukuy iman kaqkunatam nanachikunaypaq saqeykuwan, qamllatañam manaqa saqewarqachu warmin kasqaykirayku. ¿Imaynataq kay mana allinta ruwaspay Diospa contranpi huchallikuyman? nispa.
10Sapa punchawmi Joseyta chay warmi hikutaq paywan puñunanpaq, Joseymi ichaqa mana munakuqchu. 11Huk punchawmi Joseyqa wasi allichaq yaykurqa, wasipiqa manam pipas karqachu. 12Hinaptinmi Joseypa pachanmanta hapikuruspa chay warmi hikutaspa kaynata nirqa:
¡Hamuy puñusun! nispa.
Joseymi ichaqa hawaman lluptikaramurqa, warmipa makinpi pachanta saqeramuspa. 13Hinaptinmi chay warmiqa Joseypa pachanta makinpi qawaykuspan, 14wasinpi criadonkunata qayaspan nirqa:
Qawaychik, qosaypa pusamusqan hebreo runam burlakuwachkanchik. Paymi abusawananpaq yaykuramuwan, ichaqa ñoqam hatunmanta qaparirqani. 15Qaparispay qayakuptiymi pachantapas waqtaypi saqeruspan hawaman lluptirurqa, nispa.
16Chaymi Joseypa pachanta chay warmi hatallirqa wasiman qosan kutimunankama. 17Hinaspam imaynam criadonkunaman nisqanta hina qosan-manpas willarqa:
Pusamusqayki hebreo casta criadom abusawananpaq yaykuramuwarqa, 18chaymi qaparispa qayakuptiy hawaman lluptirurqa pachantapas waqtaypi saqeruspan. 19Chaynatam criadoyki ruwawan, nispa.
Chaynata warmin willaykuptinmi Joseypa patronnin Potifarqa sinchita piñakururqa. 20Hinaspanmi Joseyta presocharuspan reypa presonkunapa kasqan carcelman churarurqa. 21#Hch 7.9.Ichaqa Tayta Diosmi Joseywan karqa hinaspam kuyapayarqa, carcelpi kamachikuqwanpas allinpaqmi qawachirqa. 22Chaymi carcelpi kamachikuqqa llapallan presokunata Joseyman kunaykurqa nanachikunanpaq, hinaptinmi payña presokunata kamachirqa. 23Carcelpi kamachikuqmi Joseyman kunaykusqan punchawmanta manaña preocupakurqañachu Joseywan Dios kasqanrayku. Tayta Dios yanapaptinmi tukuy ima ruwasqanpas allin karqa.