29
Harán llaqtapi Jacob yachasqanmanta
1Jacobmi kasqallan pasaspan intipa qespimunan lawpi runakunaman chayarurqa.
2Campopi pozota qawariptinmi, chaypa hichpanpi kimsa atajo ovejakuna kachkasqa. Chay pozomantam animalkuna yakuta tomaqku. Chay pozom huk hatun rumiwan tapasqa karqa. 3Chaymanmi llapa ovejakuna yaku tomaq huñunakamuq, hinaptinmi michiqkuna pozopi rumita suchuchiptinku tomaqku, tomaruptinkuñataqmi kasqallan kutiykachiqku. 4Jacobmi michiqkunata tapurqa:
Wawqekuna ¿maylawtaq kankichik? nispa.
Hinaptinmi paykunañataq nirqaku:
Harán llaqtapi kaqmi kaniku, nispanku.
5Chaymi Jacobqa paykunata tapurqa:
¿Reqsinkichikchu Nacorpa willkan Labanta? nispa.
Hinaptinmi paykuna nirqaku:
Arí, reqsinikum nispanku.
6Jacobñataqmi nirqa:
¿Allinllachu kachkan? nispa.
Chaymi paykuna nirqaku:
Allinllam kachkan, waqaya churin Raquelpas ovejankunata qatimuchkan, nispanku.
7Chaymantam Jacob nirqa:
Punchawraqmi kachkan, manaraqmi animalkuna qaykuna horaraqchu. Chaynaqa, ovejakunaman yakuta tomarachispayá michimuychikraq, nispa.
8Chaymi paykunañataq nirqaku:
Llapallan ovejakuna huñunakamunantam suyachkaniku, chayñam kay pozopa hawanpi rumita suchuchispa tomachisaqku, nispanku.
9Paykunawan Jacob rimachkaptinmi, Raquelqa ovejankuna qatikusqa chayaramurqa. Payqa taytanpa ovejankuna michiqmi karqa. 10Chaymi Raquelta rikuykuspa Jacob pasarqa pozo hawanpi rumi tikraq, hinaspam Labanpa ovejankunaman tomachirqa. Raquelqa karqa Labanpa churinmi, Labanñataqmi Jacobpa maman Rebecapa turin. 11Chaymantam Raquelta muchaykuspan Jacob qaparispa waqarqa. 12Jacobmi willakurqa Labanpa sobrinon kasqanta chaynataq Rebecapa wawan kasqanta, hinaptinmi Raquelqa kallpaspan taytanman willamurqa.
13Labanñataqmi paninpa wawan Jacobmanta uyariykuspan chaskiqnin kallparqa. Abrazaykuspa muchaykuspanmi wasinman pusarqa, hinaptinmi tukuy ima pasasqanta Labanman Jacob willakurqa. 14Chaymi Labán nirqa:
Cheqaptapunipas qamqa aylluymi kanki, nispa.
Jacobpa casarakusqanmanta
Huk killaña Labanwan Jacob yachachkaptinmi 15Jacobta Labán nirqa:
¿Sobrinoy kasqaykiraykuchu mana imallapaq serviwankiman? Niykuway ¿haykatataq pagapuykiman? nispa.
16Labanpam iskay warmi churinkuna karqa. Piwi kaqmi karqa Lea, sullkañataqmi karqa Raquel. 17Leaqa karqa sumaq ñawichayuqmi, Raquelñataqmi karqa chakinmanta umankama kuyayllapaq. 18Chaymi Raquelta kuyasqanrayku Jacob nirqa:
Sullka kaq churiki Raquelraykum qanchis wata servisqayki, nispa.
19Hinaptinmi Labán nirqa:
Allinmi, huk runaman qonaytaqa qanmanyá qosqayki, ñoqapaqyá llamkay, nispa.
20Chaymi Jacobqa Raquelrayku qanchis watata servirqa. Ichaqa payta kuyasqanraykum as punchawkunallapaq hina rikchakarapurqa. 21Qanchis wata pasaruptinmi Labanta Jacob nirqa: Casarakunaypaq Raquelta qoway, plazo qonakusqanchik watam chayaramunña, nispa.
22Hinaptinmi chay llaqtapi runakunata huñuruspan Labán casarakuy convidota ruwarqa. 23Tutaykuruptinmi churin Leata Jacobman Labán pusaykurqa, chaymi Jacobqa Leawan puñururqa. 24Labanmi criadan Zilpata churin Leaman qoykurqa criadan kananpaq. 25Achikyaramuptinmi Jacob musyakururqa Leawan puñurusqanta. Chaymi Labanta nirqa:
¿Imatataq kayta ruwaruwanki? ¿Imanas-qataq engañaruwanki? ¿Manachum Raquelrayku servirqaykiqa? nispa.
26Labanñataqmi nirqa:
Kay llaqtapi costumbreykuman hinaqa manam sullkatachu puntataqa casarachiniku. 27Leawan casarakusqayki semanatayá cumpliruy, chaymantañam Raquelwan casarachisqayki, qanchis watatawanraq serviwanaykipaq prometekuptiki, nispa.
28Jacobmi chaynata ruwarqa. Casa-rakusqan semana cumplikuruptinmi Raquelwanpas casarachirqa. 29Labanmi criadan Bilhata churin Raquelman qoykurqa criadanña kananpaq. 30Jacobmi Raquelwan puñururqa, hinaspam Leamantapas masta kuyarurqa. Chaywanpas qanchis watatawanraqmi Labanta servirqa.
Jacobpa churinkunamanta
31Leata Jacobpa despreciasqan kasqanta Tayta Dios qawaspanmi wachakuq kananpaq yanaparqa, Raqueltañataqmi qolluqta ruwarurqa. 32Leam wiksayakuruspan qari wawata wachakurqa, hinaspam #29.32 Hebreo simipi Rubén ninanqa “Qawaychik qari churita” ninanmi.Rubenwan suticharqa:
Humillasqa kasqaytam Tayta Dios qawariykuwan, kunanqa qosayqa kuyawanqañam, nispa.
33Huktawan wiksayakuruspanmi qari wawata wachakurqa, hinaspam nirqa:
Despreciasqa kasqayta Tayta Dios uyarispanmi kay wawaytawan qoykuwan, nispa.
Hinaspam #29.33 Hebreo simipi Simeón ninanqa “uyariy” ninanmi.Simeonwan suticharqa.
34Huktawan wiksayakuruspanmi qari wawata wachakurqa, hinaspam nirqa:
Kimsataña qari churinta wachakuchkaptiyqa qosayqa ñoqallawanñam kanqa, nispa.
Chayraykum #29.34 Hebreo simipi Leví ninanqa “hukllaway” ninanmi.Leviywan suticharqa.
35Huktawan wiksayakuruspanmi qari wawata wachakururqa, hinaspam nirqa:
Kunanqa Tayta Diostam alabasaq, nispa.
Chayraykum #29.35 Hebreo simipi Judá ninanqa: “Alabay” ninanmi.Judawan suticharqa. Chaymantam manaña wachakurqañachu.