25
Abrahampa yapakusqanmanta
(1~Cr 1.32-33)
1Abrahammi Cetura sutiyuq warmiwan yapakururqa. 2Paymi wachakurqa Zimramta, Jocsanta, Medanta, Madianta, Isbacta hinaspa Shuata. 3Jocsanpa churinmi karqa Sebawan Dedán. Dedanpa mirayninkunam karqaku Asurim, Letusim hinaspa Leumim runakuna. 4Madianpa churinkunam karqaku Efa, Efer, Hanoc, Abida hinaspa Elda. Paykunam karqaku Ceturapa mirayninkuna. 5Abrahamqa lliw kapuqninkunatam Isaacman qoykurqa. 6Hawa churinkunamanñataqmi regalokunata qorqa, hinaspam kawsachkaspallaraq Isaacpa ladonmanta intipa qespimunan lawman paykunata aviarurqa.
Abrahampa wañukusqanmanta
7Abrahamqa pachak qanchis chunka pichqayuq watankamam kawsarqa. 8Abrahammi allin wañukuyta wañukurqa sinchi yuyaq kachkaspanña, hinaspam ñawpaq taytankunaman huñukuykurqa. 9Hinaptinmi churin Isaacwan churin Ismael Macpela machaypi pamparqaku, chay machayqa karqa heteo Zoharpa churin Efronpa allpanpim, Mamre llaqtapa chimpanpi. 10#Gn 23.3-16.Chay allpatam Abraham rantirqa heteokunamanta, chaypim warmin Sarapa kasqanpi pampakurqa. 11Abraham wañukuptinmi churin Isaacta Dios bendecirqa; Isaacqa yacharqa “Rikuqniy Kawsaq Diospa Pozon” sutiyuq lugarpa hichpanpim.
Ismaelpa mirayninkunamanta
(1~Cr 1.28-31)
12Sarapa criadan Egiptomanta kaq Agarmi wachakurqa Abrahampa churin Ismaelta. 13Ismaelpa mirayninkunam nacesqankuman hina piwinmanta qallaykuspa kaykuna: Nebaiot, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis hinaspa Cedema. 16Kaykunam Ismaelpa chunka iskayniyuq churinkunapa sutinkuna, hina chay sutinkuwantaqmi sapakamapa llaqtankupas, campamentonkupas sutichasqa karqa, paykunataqmi chaypi kamachikuqkunapas karqaku.
17Ismaelmi pachak kimsa chunka qanchisniyuq watanpi wañukurqa, hinaspam ñawpaq taytankunaman huñukuykurqa. 18Ismaelpa mirayninkunam yacharqaku Havilamanta Shur lawkama. Chayqa kachkan Asiriaman rinapim, Egiptopa chimpanpi. Ayllunkunapa cheqnisqan kachkaspankupas chaypim yacharqaku.
Jacobwan Esaú nacesqankumanta
19Kaykunam Abrahampa churin Isaacpa mirayninkuna: Abrahammi churyarqa Isaacta. 20Isaacmi tawa chunka watanpi Rebecawan casarakurqa, Rebecaqa karqa Padan-aram lawmanta kaq Betuelpa churinmi hinaspa arameo Labanpa paninmi. 21Isaacmi warmin qolluq kasqanrayku Tayta Diosta mañakurqa, mañakusqanta Dios uyariykuptinmi Rebeca wiksayakururqa. 22Chaymi wawankuna wiksan ukupi peleakuptinku nirqa: ¿Imapaqtaq kawsasaq kayna kaptinqa? nispa.
Chayraykum Tayta Diosta tapurqa. 23#Ro 9.12.Hinaptinmi Tayta Dios nirqa:
Iskay nacionkunam wiksaykipi kachkan,
chay nacionkunam wiksaykimantapuni rakinasqa kachkan.
Huknin nacionmi hukninmanta aswan kallpayuq kanqa,
piwi kaqmi sullkanta servinqa, nispa.
24Wachakunan punchaw chayaramuptinmi wiksanpiqa #25.24 Awataqa “Mellizo” ninkutaqmi.awa kasqa. 25Punta nacemuqmi kasqa paqo chukcha, cuerponpi pelosapallaña, paytam Esauwan suticharqaku. 26Qepa nacemuqñataqmi Esaupa talonnin hapikusqa naceramurqa, paytam Jacobwan suticharqaku. Isaacqa soqta chunka watanpiñam karqa Rebeca wachakuptinqa.
27Iskayninkum wiñarurqaku. Esaumi karqa purun animalkuna hapiq hinaspa campoman amañasqa runa, Jacobñataqmi karqa carpallapi yachaspa hawkalla kakuq runa. 28Isaacmi Esauta masta kuyarqa, purun animalkuna hapimusqanta mikuchisqanrayku. Rebecañataqmi Jacobta masta kuyarqa.
Piwi kayninta Esaú rantikusqanmanta
29Huk punchawmi lenteja picanteta Jacob yanukuchkarqa. Esauñataqmi campomanta pisipasqallaña kutiramuspan 30Jacobta nirqa:
Llumpay yarqasqam kachkani. Ama hina kaspayá chay picantekita qaraykuway, nispa.
(Chayraykum Esauqa #25.30 Hebreo rimaypi Edom sutiqa puka ninanmi.Edomwan sutichasqa karqa).
31Chaymi Jacob nirqa:
Piwi kaynikipa derechontam munani, kunanyá rantikuruway, nispa.
32Esauñataqmi nirqa:
Ñoqaqa yarqaymantam wañuruchkaniña, ¿Imapaqtaq piwi kayniy serviwanqa? nispa.
33 #
Heb 12.16. Chaymi Jacob nirqa:
Kunanpuni juraykuway, nispa.
Chaymi Esauqa juraspa piwi kayninpa derechonta Jacobman rantikururqa. 34Hinaptinñam Jacobqa tantatawan lenteja picanteta Esauman qoykurqa. Esauñataqmi mikuykuspa, tomaykuspa pasakurqa. Chaynatam Esauqa piwi kayninpa derechonta wischupakururqa.