Parallel

Génesis 22

22
Isaacta sacrificananpaq Diospa kamachisqanmanta
1Kaykuna pasaruptinmi Abrahamta pruebaspan Dios nirqa:
Abraham, nispa.
Payñataqmi nirqa:
Kaypim kachkani, nispa.
2Chaymi Dios nirqa:
Moriah lawman riy kuyasqayki sapallan churiki Isaacta pusarikuspa, chaypi payta kañaspa ofrecemuway, ñoqam nisqayki mayqan orqopim ruwanaykitapas, nispa.
3Chaymi Abrahamqa paqarinnintin tutapayta yantata asnonpi cargakuykuspa churin Isaacwan hinaspa iskay criadonkunapiwan Diospa nisqan lugarman rirqaku, churinta chaypi kañaspa Diosman ofrecemunanpaq. 4Kimsa punchaw puriypiñam karullamantaraq chay lugarta Abraham rikururqa. 5Hinaspam criadonkunata nirqa:
Asnontinyá kayllapi qepachkaychik, warmallawanña Diosta yupaychaq rirusaqku, chayllam kutiramusaqku, nispa.
6Hinaspanmi Abrahamqa sacrificiopaq ninata, cuchillota aparikuspa rirqa, yantatañataqmi churin Isaacwan qepichirqa. 7Chaymantam taytanta Isaac nirqa:
Taytáy, nispa.
Payñataqmi nirqa:
Imatam ninki churilláy, nispa.
Chaymi Isaac nirqa:
Kaypim kachkan yantapiwan nina, ¿maytaq wañuchispa kañanapaq carneroqa? nispa.
8Abrahamñataqmi nirqa:
Churilláy, Diosmi sacrificiopaq carnerotaqa churamunqa, nispa. Hinaspam kuskanku rirqaku. 9#Stg 2.21.Diospa nisqan orqoman chayaruptinkum, altarta Abraham ruwarqa, chayman yantata churaykuspanmi churintañataq chaqnaykuspa chay yantapa hawanman churaykurqa. 10#Heb 11.17-19.Hinaspanmi Abrahamqa cuchillota hapiykurqa churinta wañuchinanpaq. 11Chaymi Tayta Diospa angelnin cielomanta nimurqa:
¡Abraham, Abraham! nispa.
Hinaptinmi Abraham nirqa:
Kaypim kachkani, nispa.
12Angelñataqmi nirqa:
Ama imanaychu chay warmata, ñam yachaniña Dios manchakusqaykita, kuyasqayki sapallan churiki kachkaptinpas manam negakurqankichu Diospaq ofreceyta, nispa. 13Chaymi Abraham qawaykacharikuspan qepanpi rikururqa huk carnero waqranmanta chaprapi arwikusqata. Chay carnerota hapispam Abraham wañuchirqa churinpa rantinpi kañananpaq. 14Abrahammi chay orqota suticharqa
“Tayta Diosmi churamunqa” niq sutiwan. Chayraykum kunankama ninku: “Orqonpiqa Tayta Diosmi churamunqa” nispa.
15Diospa angelninmi cielomanta huktawan Abrahamta qayamurqa, 16#Heb 6.13-14.hinaspam nimurqa: “Sapallan churikitapas ofrecewanaykipaq mana negakusqaykimantam kikiyrayku jurani. 17#Heb 11.12.Anchata bendecispaymi chaskakunata chaynataq lamar qochapa patanpi aqota hinaña mirachisqayki. Miraynikikunam enemigoykikunapi munaychakunqa. 18#Hch 3.25.Kasuwasqaykiraykum kay pachapi lliw runakuna miraynikitakama bendecisqa kanqaku”, nispa.
19Chaymantam Abraham sirvientenkunapa kasqanman kutirqa. Hinaspankum Beerseba llaqtaman kutikurqaku, chaypim Abraham yacharqa.
Nacorpa churinkunamanta
20Kaykuna pasaruptinmi Abrahamman willarqaku:
Milcapas wawqeki Nacorpa churinkunatam wachakurun. 21Piwinmi karqa Uz, qatiqninkunañataqmi Buz, Haranpa taytan Kemuel, 22Quesed, Hazo, Pildas, Jidlaf hinaspa Betuel, nispanku. 23Kay pusaqnintintam Abrahampa wawqen Nacorpata Milca wachakurqa. Betuelpa churinmi karqa Rebeca. 24Nacorpa churiwachan Reumañataqmi wachakurqa Tebasta, Gahamta, Tahasta hinaspa Maacata.