44
Jôsep kòñ kup Benjamin ơm wơl
1Jôsep sồr cau gơnoar at bồ hìu khai lah: “Ală cau hơ̆ pơdiang jai kàr lơi gen tuh tĕ kòi bol khai in bềng rơnđò kàr hơ̆ sơl, lồc behơ̆ ơn wơl priă di bơr rơnđò kòp nă bol khai dê. 2Mơ kung ơn tĕ mơngàn priă añ jê di bơr rơnđò bal mơ priă pơl kòi oh put dê.” Gen khai lơh jat be jơnau Jôsep neh sồr khai.
3Rìng àng ngai hìng, cau ai bol khai rê bal mơ alàng bol khai dê. 4Tòm tŭ bol khai lik bơh di ƀòn òhềt ngài, gen Jôsep đơs mơ cau at bồ hìu lah: “Mê ñă tĕ ting jat bol hơ̆, tòm tŭ jat bàn rau gen đơs tĕ lah: ‘Ñchi bơh tài ală bol mê ai bơta iơh tơm bơta niam behơ̆ taih? 5Mơngàn do ò di la mơngàn cau tòm añ òs ngui nàng ñô tơrnòm mơ sền dà ò ơ? Mbe ală bol mê neh lơh dô bơta iơh behơ̆ taih?’”
6Cau at bồ hìu jat bàn mơ yal wơl ală jơnau hơ̆. 7Gen ală bol hơ̆ ho lah: “Ñchi bơh tài kơnràñ đơs behơ̆ taih? Ò gơs tŭ lơi cau dĭ gơna kơnràñ neh lơh behơ̆! 8Do bol hi neh cèng wơl bơh lơgar Kanaan priă bơh di bơr rơnđò mơ jào ồng in, mbe lơh bol hi gơs nùs kòñ priă hala màh bơh di hìu cau tòm ồng dê taih? 9Ồng jòi bàn di dĭ gơna lơi gơs mơngàn hơ̆ gen khai pal chơt, mơ să tòm bol hi rơp lơh dĭ gơna ồng in.” 10Cau at bồ hìu đơs: “Behơ̆, lơh jat be jơnau bol mê neh đơs, añ jòi bàn mơngàn di cau lơi, gen cau hơ̆ rơp lơh dĭ añ in ai bol mê gen ò gơs glài.” 11Gen, kòp nă sơrbac sơrbang tơmù rơnđò he di tiah mơ pò tơlik.
12Cau at bồ hìu cok sơwì jòi bơh rơnđò cau bi tus di rơnđò oh put. Gen khai jòi bàn mơngàn tòm rơnđò Benjamin dê. 13Kòp nă crè ào he, kơt wơl ală rơnđò kòi hơđang ngkòi alàng, lồc behơ̆ rê wơl hơ ƀòn dờng.
14Juda mơ ală oh mi khai dê mut tòm hìu Jôsep, khai gam ơm tềng hơ̆; chòp bol hơ̆ tơmbic să di đap khai. 15Jôsep lùp lah: “Ñchi bơta bol mê neh lơh behơ̆ taih? Bol mê ò git dô nă cau be añ git sền dà ò ơ?” 16Juda ho lah: “Ñchi bơta bol hi kòñ đơs mơ kơnràñ taih? Mbe bol hi rgơi ràng tơlik taih? Mbe bol hi kòñ jòi bơta nàng tò să hi taih? Yàng Tom Trồ neh git loh bơta iơh bơsak ală dĭ gơna kơnràñ dê rau. Do, bol hi bal mơ cau gơs mơngàn di tê rơp lơh gơs dĭ kơnràñ in rau.” 17Mơya Jôsep đơs lah: “Añ ò gơs nùs lơh behơ̆ ò! Cau lơi neh gơs mơngàn tòm tê rơp lơh dĭ añ, ai ală bol mê rê tĕ lơngap lơngai hơ hìu bèp bol mê dê.”
Juda dan mơ Jôsep ai kòn put bèp khai in
18Gen Juda lòt tus rềp mơ Jôsep mơ đơs lah: “Bơh kơnràñ la ndròm bal mơ Pharaôn, dan să mơ kơnràñ bañ gơjrañ di cau dĭ kơnràñ dê, lòi añ đơs dô jơnau nàng kơnràñ in iat. 19Kơnràñ neh lùp cau dĭ kơnràñ lah: ‘Ală bol mê gam bèp hala oh mi lơi tai sơl?’ 20Bol hi neh ho mơ kơnràñ lah: ‘Bol hi gam gơs dô nă bèp kra, mơ dô nă kòn klau khai neh tơnggơs tòm tŭ khai neh kra. Bi tòm oh hơ̆ neh chơt rau, gen gam mìng khai tòm ală kòn mè khai dê, mơ bèp kòñ gơboh ngan di khai.’
21Kơnràñ neh sồr cau dĭ kơnràñ lah: ‘Lam tĕ khai lòt tus hơ añ nàng añ gŏ mat khai.’ 22Mơ bol hi neh đơs mơ kơnràñ lah: ‘Oh hơ̆ ò geh lik bơh di bèp, dilah khai lik gen bèp rơp chơt.’ 23Mơya kơnràñ sồr: ‘Dilah oh put ò jat ală bol mê mù hơ do gen ală bol mê ò gŏ mat añ tai.’ 24Mơ dơ̆ bol hi rê hơ hìu cau dĭ kơnràñ dê la bèp bol hi dê, gen bol hi neh yal khai in ală jơnau kơnràñ dê.
25Tơnơ̆ mơ hơ̆ bèp sồr bol hi lah: ‘Mù wơl tĕ nàng pơl dô êt kòi.’ 26Mơ bol hi đơs lah: ‘Bol hi ò rgơi mù, mơ dilah oh put lòt bal gen sồng bol hi khin mù, dilah ò gen bol hi ò geh tìp mat mơ cau hơ̆.’ 27Cau dĭ kơnràñ dê la bèp bol hi ho lah: ‘Bol mê neh git lah bau añ neh deh añ in bàr nă kòn klau: 28Dô nă neh lik bơh di añ, mơ añ neh đơs: Ngan khai neh gơtìp phan jàñ bơsak crè rpot rpet rau, tài bơh hơ̆ jơl tus di tŭ do añ ò gŏ khai tai. 29Dilah bol mê lam oh do lik bơh di añ tai mơ gơtìp bơta lơi gơtup gơtơl di khai gen bol mê rơp lơh cau sŏ kò do in tài bơh bơta moat jrùng mơ mù tòm lơgar làng ƀồc.’
30Bèp kòñ gơboh di oh put añ jê oă ngan tian gơs bàr nơm hwềng bol khai gơtòmsòr tòmđềt bal. Tŭ do, dilah dơ̆ añ rê wơl hơ cau dĭ kơnràñ la bèp añ mơ ò gơs oh put hơ̆, 31gen dơ̆ khai ò gŏ tai kòn put gen ngan khai rơp chơt. Mơ ală cau dĭ kơnràñ dê rơp lơh bèp kra sŏ kò bol hi dê, kung la cau dĭ kơnràñ dê, bơh bơta moat jrùng mơ mù tòm lơgar làng ƀồc. 32Tài bơh cau dĭ kơnràñ neh kong leng gàr oh put hơ̆ mơ đơs lah: ‘Dilah kòn ò lam oh rê wơl hơ bèp gen rơp gơs glài mơ bèp sùm sùm.’
33Behơ̆, tŭ do, dan ai cau dĭ kơnràñ ơm dĭ ala oh hơ̆ nàng khai rê wơl mơ ală bi khai dê. 34Bơh dilah cau oh put ò rê bal, mbe añ khin rê wơl mơ bèp añ taih? Añ rngòt, ò kòñ gŏ bơta bòl glar bèp añ jê.”