มัดทาย 22
22
ธีง-จา-ยิ่น เญย หว่า-เป๊ย
(เป๊ย หมั่ง ลูกา 14:15-24)
1เยซู แอ๋ง หล่ง หว่า-เป๊ย หฌาว หฒวัง เมี่ยน. 2นิ่น ก๊อง, “ทิน-ฮู่ง โหฒว เฒี้ยว กุ๊น เมี่ยน เซ ฮนั้ง เต้า ฮู่ง เบ่น นิ่น เญย ตอน เญย ธีง-จา-หฮนาง นอ. 3เบ่น เหฒียง, นิ่น พ้าย นิ่น เญย โปว มี่ง เห่ว ธี้ง ลิ์ว เญย แคะ เมี่ยน ต้าย, มป่า แคะ เมี่ยน ไม้ อ๋อย ต้าย.
4“ฮู่ง เตี๋ย แอ๋ง พ้าย กั้น เต๋ย โปว มี่ง บั๋ว วั้ว เต๋ย แคะ เมี่ยน, ‘เยีย เญย ธีง-จา-หฮนาง เบ่น เหฒียง อ๊ะ. ง่ง โก๊ว เหธา ง่ง ตอน จุ่น เฮลี้ยง เหฒียง, หญู่งๆ เบ่น ฑ่อย. กุ๊น ต้าย หญั่น หฮนาง อ๊ะ.’ 5มป่า ธี้ง ลิ์ว เญย แคะ เมี่ยน ไม้ เกวน ไม้ สี่ เญย. เก๊าะ-เมี่ยน มี่ง โหฒว เก๊าะ-เมี่ยน เญย กง. ม่าย เต้า มี่ง เด่ย. ม่าย เต้า มี่ง โหฒว แซง-เอ๋ย. 6เหฒ่ง วั้ว เต๋ย เฒาะ ฮู่ง พ้าย มี่ง เญย โปว โหฒว โตะ หย่า ไต๋ ไต่. 7ฮู่ง เตี๋ย เฉีย เจี์ย! ไห่, ฯฒฯ พ้าย นิ่น เญย แปง มี่ง เหมียด เหฑ่ง วั้ว เต๋ย ไต๋ เมี่ยน เญย เมี่ยน, แอ๋ง ปั๊ว ชุย นิ่น บัว เญย ฒี่ง.
8“ฆะฮ้า ฮู่ง เตี๋ย แอ๋ง บั๋ว นิ่น เญย โปว บัว, ‘ธีง-จา-หฮนาง เบ่น เหฒียง อ๊ะ. เยีย ธี้ง ด่าง เญย แคะ เมี่ยน ไม้ ผุย ต้าย. 9เม่ย บัว อี้ หฒั่น มี่ง วั้ว จาย-ห่อง. ล์อ ปวัด บัวะ เหฒีย เต้า, อ๋อย หฒุ เห่ว ต้าย เปียะ ยิ่น.’ 10วั้ว เต๋ย โปว ฯฒฯ ธ้วด มี่ง กัน ติ้วๆ เจ๊า. ปวัด บัวะ เหฒีย เต้า, ไม้ กุ๊น คู้ เมี่ยน ไฟ เมี่ยน หว่าย เมี่ยน, เหยียด ฒู้ง เห่ว ต้าย. เมี่ยน ฯฒฯ ปวั๊ง เหฑ่ง ยิ่น หมี่ อ๊ะ.
11“ฮู่ง เตี๋ย เปียะ มี่ง หมั่ง แคะ เมี่ยน ฯฒฯ ปวัด ม่าย เต้า ไม้ ฒอง ผุย มี่ง ยิ่น เญย ลุย-โหว. 12ฮู่ง เตี๋ย หน่าย, ‘โย์ว อ่า, เม่ย ไม้ ฒอง ผุย มี่ง ยิ่น เญย ลุย-โหว, เม่ย ฮนั้ง หาย นอ ตุ๊ เปียะ?’ วั้ว เต้า เมี่ยน หย่า ไม้ ม่าย หว่า เตา อ๊ะ.
13“ฮู่ง เตี๋ย ฯฒฯ บั๋ว โปว, ‘เฒาะ นิ่น เญย ปั์ว-เหฒา โด้ เจี๊ยน ต้อ นิ่น มี่ง กวั่ง กะเหญี่ย, หฮมวัง เญย ต๋อง, เยียม วั้ว ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.’”#มัดทาย 8:12; 25:30; ลูกา 13:28
14เยซู แอ๋ง ก๊อง เซ้ด เมว์ย หว่า, “ธี้ง ต้าย เญย เมี่ยน ธั้ม, มป่า กิ๊น ต้าย เญย เมี่ยน โหฒะ.”
เมี่ยน หน่าย โฑว-ฒิ่น เญย เจ๊า
(เป๊ย หมั่ง มาโค 12:13-17; ลูกา 20:20-26)
15ม่าย เต๋ย ฟาลิสี เมี่ยน ธ้วด มี่ง ธ่าง ล่าง ต๊า หฒะเอ๋ย อ๋อย ดั๊ว เยซู ก๊อง ต่อง หว่า. 16นิ่น บัว ฯฒฯ พ้าย เต๋ย นิ่น บัว เญย ไซ-ก๋อ เหธา เต๋ย กัน เฮโล้ด ฮู่ง วั้ว เจ๊า เมี่ยน มี่ง ล์อ เยซู. นิ่น บัว ก๊อง, “ฟิน-แซง อ่า, เยีย บัว ฮิ้ว ตุ๊ เม่ย เฮญี้ยว หฒะ. ทิน-ฮู่ง เญย เจ๊า เม่ย หย่า หฌาว ตุ๊ เฒียน. เม่ย หย่า ไม้ หมั่ง หาย เต้า เญย เฮมียน เหว่ย หฒุ เม่ย ไม้ หมั่ง หาย เต้า โหฒว โฮล ไฟ ไฝ. 17วั้ว หญู่ง, โท้ บั๋ว เยีย บัว, เม่ย ฮนั้ง หาย นอ ฮนั้ม? บัว ธ้วด โฑว-ฒิ่น ปุน โลมา เญย ต้ม ฒิ่ว ฮู่ง, ซีซา,#22:17 ฒิ่น ด่าง ซีซา วั้ว โจ๋ว หว่า เป๋น บั๋ว. ฆะฮ้า เอ๋ย เล์ย ทิ้ว เป๋น ต้ม ฒิ่ว ฮู่ง. เซ ต่อง บัว เญย เล์ย ไฟ?”
18มป่า เยซู ฮิ้ว ตุ๊ นิ่น บัว เญย หฒะเอ๋ย เซ หว่าย ไห่ ฯฒฯ ก๊อง, “เม่ย บัว หน่าย เต๋ย เป้ย หฒะ เฮญี้ยว ฌ้วด เญย เมี่ยน อ้า! เม่ย บัว เหว่ย หาย ติ่ว อ๋อย ดั๊ว เยีย ก๊อง ต่อง? 19เฒาะ นอม ธ้วด โฑว เญย ญ่าน ปุน เยีย หมั่ง ก๋า.” นิ่น บัว ฯฒฯ เฒาะ นอม ญ่าน ปุน นิ่น. 20เยซู หน่าย ก๋า นิ่น บัว, “น้าย หาย เต้า เญย ฝัง เหธา หาย เต้า เญย บั๋ว?”
21นิ่น บัว เตา, “ซีซา เญย.”
เยซู ฯฒฯ บั๋ว นิ่น บัว, “ฮนั้ง หน่าย, หาย หญู่ง ซีซา ฮู่ง เญย, อ๋อย หฒุ ปุน ซีซา ฮู่ง. หาย หญู่ง ทิน-ฮู่ง เญย, อ๋อย หฒุ ปุน ทิน-ฮู่ง.”
22นิ่น บัว ไฮ์ ลิ์ว น้าย เต๋ย หว่า ฯฒฯ บัวะ ฮ่อง ไห่ หย่า เล่ย ฆอย นิ่น มี่ง หมี่ อ๊ะ.
เมี่ยน ไต่ แอ๋ง ไฮ่ นั่ง ต้าย
(เป๊ย หมั่ง มาโค 12:18-27; ลูกา 20:27-40)
23ต้ง วั้ว ฮนอย ม่าย เต๋ย สะดูสี เมี่ยน ต้าย ล์อ เยซู. (สะดูสี วั้ว เจ๊า เมี่ยน ก๊อง เมี่ยน ไต่ มี่ง ไม้ ไฮ่ นั่ง ต้าย.)#กง-โฒ่ 23:8 24นิ่น บัว หน่าย เยซู, “ฟิน-แซง อ่า, โมเซ ก๊อง, ‘สี ก๊อง ม่าย ล่าน เมี่ยน ไม้ แก้ง ม่าย ฝุเจว๊ย มป่า นิ่น ไต่ หมี่ อ๊ะ, นิ่น เญย โย์ว อ๋อย หฒุ หล่ง ญาม-กว๊า โหฒว เอ๊า เหว่ย ตุ๊ ฝุเจว๊ย ฝุน ก๋อ เญย ป่วน.’#หฑั่ม เล์ย-หลัด 25:5 25เยีย บัว น้าย, ฒิ่น ด่าง ม่าย เสี่ย มั์ว-ตอน. ตอน-โฮล ตอง เจี๊ยน จา, ไม้ แก้ง ม่าย ฝุเจว๊ย, นิ่น ไต่ หมี่ อ๊ะ. โย์ว ฯฒฯ หล่ง นิ่น เญย ญาม-กว๊า. 26ตะไหน เหธา เล้า ซาน, แอ๋ง มี่ง เถา เล้า หธี่, เหยียด ฒู้ง หล่ง เจี๋ย เหฑ่ง, หย่า ฟี่ ฮนั้ง เญย, ไม้ ม่าย ฝุเจว๊ย, เฒียง หน่าย ไต่ เหฑ่ง หมี่ อ๊ะ. 27ฆะฮ้า วั้ว เต้า มเซียะ ตอน หย่า ไต่ หมี่ อ๊ะ. 28ฮนั้ง หน่าย, เมี่ยน ไต่ มี่ง, เถา นั่ง ต้าย วั้ว ฮนอย, วั้ว เต้า เอ๊า ฝุน เป๋น หาย เต้า เญย เอ๊า? เหว่ย หฒุ นิ่น บัว เหยียด ฒู้ง หล่ง เจี๋ย เญย.”
29เยซู เตา นิ่น บัว, “เม่ย บัว ต่อง เหฑ่ง อ๊ะ, เหว่ย หฒุ เม่ย บัว ไม้ ฮิ้ว ตุ๊ กีง-โซว, หย่า ไม้ ฮิ้ว ตุ๊ ทิน-ฮู่ง เญย ชะ. 30ไต่ มี่ง เญย เมี่ยน นั่ง ต้าย วั้ว หฒั่น, นิ่น บัว ฯฒฯ ฮนั้ง เยียม ทิน-ต้อง เญย ฟิน-เมี่ยน นอ, ไม้ หล่ง เอ๊า หล่ง โหฆ. 31ก๊อง เมี่ยน ไต่ มี่ง แอ๋ง นั่ง ต้าย วั้ว ติ่ว เจ๊า, ทิน-ฮู่ง บั๋ว เม่ย บัว วั้ว เต๋ย หว่า เม่ย บัว ไม้ โตะ เจี๋ย ไฟ? 32ทิน-ฮู่ง ก๊อง, ‘เยีย เซ อับลาฮัม เญย ทิน-ฮู่ง, อีสัก เญย ทิน-ฮู่ง เหธา ยาโค้บ เญย ทิน-ฮู่ง.’#ธ้วด อียิบ 3:6 นิ่น ไม้ เฒ์ย ไต่ มี่ง เญย เมี่ยน เญย ทิน-ฮู่ง. นิ่น เซ เมี่ยน นั่ง เมี่ยน เญย ทิน-ฮู่ง.”
33หฒวัง เมี่ยน ไฮ์ เยซู ฮนั้ง น้าย นอ หฌาว, นิ่น บัว เก้ง! บัวะ ฮ่อง ไห่.
หล่ง เจี๊ยน เจี๋ย เญย เล์ย
(เป๊ย หมั่ง มาโค 12:28-34; ลูกา 10:25-28)
34ฟาลิสี เมี่ยน ไฮ์ ก๊อง เยซู โหฒว ปุน สะดูสี เมี่ยน ไม้ ม่าย หว่า เตา, นิ่น บัว ฯฒฯ กั๊บ ฒุ้น ต้าย. 35นิ่น บัว เญย กวั้น ม่าย เต้า หฌาว เล์ย เญย ฟิน-แซง อ๋อย ดั๊ว เยซู ก๊อง ต่อง หว่า. 36นิ่น ฯฒฯ หน่าย ก๋า, “ฟิน-แซง อ่า, เหยียด ฒู้ง เล์ย-หลัด, หาย ติ้ว เก้า หล่ง เจี๊ยน เจี๋ย?”
37เยซู เตา,
“‘อ๋อย หฒุ หล่ง เหฑ่ง เฮญี้ยว, หล่ง เหฑ่ง หฒะเอ๋ย,
หล่ง เหฑ่ง ธง-เม่ง ฮนั้ม เฒี้ยว, เม่ย เญย ทิน-ฮู่ง.’#หฑั่ม เล์ย-หลัด 6:5
38น้าย เซ โฮล เจี๋ย, เก้า หล่ง เจี๊ยน เจี๋ย เญย เล์ย อ๊ะ. 39ตะเหญ่ย ติ้ว หย่า ฟี่ ฮนั้ง เญย,
‘อ๋อย หฒุ ฮนั้ม เมี่ยน ฮนั้ง ฮนั้ม กั้น นอ.’#เลวี 19:18
40 โมเซ เญย เล์ย-หลัด เหธา หฒวัง โต่ว หว่า เมี่ยน หฌาว เญย เหยียด ฒู้ง หว่า หล่ง น้าย เต๋ย อี ติ้ว เล์ย โหฒว กอน.”
กีตู่ ฮนั้ง หาย นอ โหฒว ดาวิด ฮู่ง เญย เฒ้ย-ฟุน?
(เป๊ย หมั่ง มาโค 12:35-37; ลูกา 20:41-44)
41ฟาลิสี เมี่ยน หธ่อ เยียม ฒุ้น วั้ว หฒั่น, เยซู หน่าย นิ่น บัว, 42“เม่ย บัว ฮนั้ง หาย นอ ฮนั้ม? กีตู่ โหฒว หาย เต้า เญย เฒ้ย-ฟุน?”
นิ่น บัว เตา, “กีตู่ โหฒว ดาวิด ฮู่ง เญย เฒ้ย-ฟุน.”
43เยซู แอ๋ง หน่าย นิ่น บัว, “วั้ว หญู่ง, สีง ลี่ง เหว่ย หาย ติ่ว ปุน ดาวิด เห่ว กีตู่ โหฒว ‘เฒี้ยว’? ดาวิด ก๊อง,
44‘เฒี้ยว ก๊อง บั๋ว เยีย เญย เฒี้ยว,
เฒว์ย เจี๊ยน เยีย เญย บย่าว แหมง ปูง,
ฒั้ว เยีย ปุน เม่ย เญย วิน-วั้ง
เหฌี่ย เม่ย เญย เหฒา-เดี๊ย.’#สีง ฑูง 110:1
45สี ก๊อง ดาวิด เห่ว นิ่น โหฒว ‘เฒี้ยว,’ กีตู่ ฮนั้ง หาย นอ ไฮ่ โหฒว ดาวิด เญย เฒ้ย-ฟุน?” 46ไม้ ม่าย หาย เต้า ไฮ่ เตา เหยียด โจ๋ว เยซู. เยียม หน่าย ฮนอย ต้าย, ไม้ ม่าย หาย เต้า ก๊าม หน่าย หาย หญู่ง นิ่น อ๊ะ.
Trenutno izbrano:
มัดทาย 22: IuMiTH
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
Mien Bible (Thai Script) © Thailand Bible Society, 2007