Priljubljene svetopisemske vrstice iz റോമഗാറാര് 2

Deli

അത്തവ കാര്യഗാള് ഗേന്റവാര്‌ന കുറ്റാമ് ബിദിത്ത് അദേ കാര്യനത്തെ നീയിമ് ഗേന്റായി, അത്തെ ഗേവ നീ സാമി കുറ്റ ബിദിക്കുവ ബിദിലിന്ത് തപ്പിസി കഡാക്കുവായി എന്റ് നീ നെനേക്ക്‌ന്റായ? ഇല്ലെ, സാമി പഡുവ ഗവ നിനാന പാവ ഗേവാദ്‌ന തള്ളി സാമിസാരി തിരിഗ്യ ബെക്ക്‌ന്റ് എന്റ് തെര്യാദെ സാമി നിമാന പഡുവ ഗവനാമ്, സാമി നിമാന പൊറുക്കുവാദ്‌നാമ്, നിമ്മ സാമിസാരി തിരിഗ്യ ബേ്ണ്ടി സാമി പൊറിമോഡ കാത്ത്‌റ്‌ക്കുവാദ്‌നാമ് ബെലെലില്ലാത്ത കാര്യ എന്റ് നെനേക്ക്‌ന്റായ?

അദ്‌നാലെ അഡ്‌ത്തവാര്‌ന കുറ്റ ബിദിക്കുവ നീ ആരാനാല്‌മ് സെരി, നിനാക്ക് എന്തൊന്റു നായ സൊല്ലി തപ്പിസി കഡാക്ക്യ മുഡ്യാമാട്ട. അഡ്‌ത്തവാര്‌ന കുറ്റ ബിദിക്കാട്ടി നീ നിനാന താനെത്തെ കുറ്റ ബിദിക്ക്‌ന്റായി. എന്ത്‌ക്കെന്റ് സൊന്ന അഡ്‌ത്തവാര് ഗേന്ത അദേ കുറ്റനത്തെ നീയിമ് ഗേന്റായല്ല.

ഈ കാര്യാത്ത്‌ല് സാമി ആര്‌നാമ് പ്‌റ്‌ത്ത് നോഡുവാദില്ലെ.

എന്ത്‌ക്കെന്റ് സൊന്ന മോസെ ബെത്ത സാമിസട്ടന കേ്ള്‌ക്ക്‌ന്റവാരല്ല സാമി കണ്ണ്‌ക്ക് നേര്‌മെഗാറാര് ആവാദ്, മോസെ ബെത്ത സാമി സട്ടപഡി നഡാക്ക്‌ന്റവാര്‌ത്തെ സാമി കണ്ണ്‌ക്ക് നേര്‌മെഗാറാര് ആവാദ്.

സാമി <<ഒന്റൊന്റാള്‌ക്ക്‌മ് അവനവാന് ഗേവ ഗിലാസാക്ക് തഗ്‌ന്ത കൂലി കൊഡുക്കുവാന്.>>

ആന അവനവാന് കാര്യാക്ക് ബേ്ണ്ടി താനെ പെ്ളേത്ത് കൊണ്ടു സത്ത്യാക്ക് കെ്ട്ട്‌പട്ട് നഡാക്കാദെ കെ്ട്ട കാര്യഗാള് ഗേന്ത് കൊണ്ടു പെ്ളേക്ക്‌ന്റവാര് സാമി പഡുവ മൊനേക്ക്‌മ് ദെ്ണ്ടണേക്ക്‌മ് ആളാവാര്.

ആന നിമാക്കിര്‌ക്കുവ നെഞ്ച് മര നെഞ്ച്‌മ് സാമിസാരി തിരിഗ്യ മനേസ്സില്ലാത്ത നെഞ്ച്‌മ്‌ത്തെ. അദ്‌നാലെ സാമി നേര്‌മോഡ ബിക്കുവ ബിദി ബെ്ളിപഡുവ നാള്‌ക്ക് ബേ്ണ്ടിമ് ദെ്ണ്ടണെ കൊഡുത്തു തന്ന് മൊനേന കാട്ടുവ നാള്‌ക്ക് ബേ്ണ്ടിമ് നിമാക്കുള്ള മ്‌ഗ്‌ന്ത ദെ്ണ്ടണെ നിമ്മ താനെ സേത്തി സേത്തി ബെക്ക്‌ന്റ്‌റ്.