Priljubljene svetopisemske vrstice iz Máfíò 24

Deli

Ké ɖɛ-gbà-nyu-nyu mu dyí vòùn mìɔ jèɛɛ, ɔ muɛ nyuùn ɓɛ́ nyɔǔn ɓáún-ɓáún ké se ɖɛ̀ɓɛ̀ǐn-ɖɛ̀ɓɛ̀ǐn ɖò ɓéɖé. Kɛɛ nyɔ mɔ̀ nyɔ mu hwòɖǒ kuùn tee ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn.

Ké wa mu bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ zio mú pòìn ɖé ɓóɖó-kpàà dà séín, ɓɛ́ ɔ ké zàse jǔ ɖé ɓóɖó-dù séín hwìɛ̀, hwɛ̀ ɓɛ́ ɖɛ séín ké mánáín hwɛ̀.

Ɓě mu to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ùn, kɛɛ ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá, kɛɛ ɔ séè ɖɛ séín mánáín-hwɛ̀ìn-naín ke.

Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. Mɔ́ mu kpáùn, ké ɓóɖó-kpàà dà kò-kò ɓě mu dyi túòùn. Ɖɛ séín ɓě nìà kɛ mɔ̀ gǎ-dyé-dyé ɓěɔ̀ gbɔ-dè-dè.

Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.

Sepóɛɖé nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ Kɛ́ɖɛ́ìɔ̀ kɛ, ké wa mu nyɔ pàɖǎ cáùn.

“Ɓó tia ɓaɖaa, wa mu ɓě kpɔ̃ùn, ɓɛ́ wa ké ɓě nyɔǔn ɓě xwaún dyi po, ɓɛ́ wa ké ɓě gǎ dyéìn, ɓɛ́ wa ké ɓě ɖáɓá. Ké ɓóɖó-dù séín mu ɓě mú nyɛ́ìn ɓó ní jè. Ɔ ɖǎ ná nìǐn, nyɔ ɓáún-ɓáún mu ní ɖeín-nà-nyɔ̀ jǔɛ ɓɔ́ùn. Wa mu wa mǔè ɓě nyɔǔn ɓě xwaún dyi poùn, ké wa mu mú nyɛ́ìn nyɛ̀ìn. Ké nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seà ɔ mɔ̀ kɛɛ mu dyiìn, ké wa mu nyɔ ɓáún-ɓáún cáùn.

Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá.

Ɔ jèɛɛ, ɓě mɔ̀ùn mɛ nì ɓɛ́ɖɛ́ kɔ̃, sepóɛɖé mɔ̄ Nyɔǔn-dyùɛ̀ Dyú-gààɔ̀ mu dyiìn ti ɓɛ́ ɓě se ní jè hwìɖǐi dèɛ̌ muɛ.

“Ɔ jèɛɛ, ɓě mɛ nì ɓɛ́ɖɛ́ kɔ̃, sepóɛɖé ɓě se dyuò wé kɔ̃̀ mú ɓɛ́ mɔ̄ mɔ̀à ɓěɛ̀ Bounɓoɔ̀ kɛɛ mu dyiìn nyɛ.

“Ɓá ti ɓɛ́ ɖɛ ɓě nìà kɛ mu kpáùn wɛ̃ɛ jè dyíɛɛ, nyɔ ɖò seɛ dyuò. Ínjà ɓě nì ɖé dyɔún wɛ̃ kè mɔ̄ mɔ̀à Dyú-gààɔ̀ kɛɛ seɛ dyí dyuò. Ɓǎɔ̀ ɖòùn mɔ̀ nyɔ dyuòɛ̀ dyí.

Sepóɛɖé nyɔ ɓě mu dyiìn, ɓɛ́ wa ké wa mìɔùn Kɛ́ɖɛ́ì ɖáìn, ké ɖíɛ́ ɓě mu wa mìɔùn kpáá-ɖɛ̀-cɛ̃-nyɔ̀ ɖáìn. Wa mu ɖàɓàìn-ɖɛ̀ kpa ɖɛ ɓě kè dĩ́ín-dĩ̀ìn-ɖɛ̀ ɓě nyuùn, ɓɛ́ ɔ dyi xwa fɛ̃́ìn ní, ɓɛ́ wa ké nyɔ ɓě ɓɛ́ Gèɖèpɔ́ɔ̀ ɖǎà gã kɛɛ cá.

Mɔ̄ Nyɔǔn-dyùɛ̀ Dyú-gààɔ̀ dyi-dyiɔ̀ mu nììn kà ɔ nyu ma kà nìɛ̀ ɖé Nóà nììn tiín nyɛ. Hwɛ̀ ɓɛ́ ní-tòɔ̀ ké ma dyiɛɛ, nyɔǔn ɓě nì ma ɖɛ ɖiɛń, ké wa nì ma náuń, ké gàa kè màa nì ma dyi kpɔ̃ǐn, ké ɔ dyɛ̀ìn ma wé jɛ́ɛ́ kɔ̃̀ xwíníín ɓɛ́ Nóà dyá ma kà méèɔ̀ múɛɛ hwɛ̀. Ké wa se ɖɛ nì ma kà kpáuń wɛ̃ɛ dyuò. Ní-tòɔ̀ dyi ma, ké ɔ zĩ̀ìn ma wa séín, hwɛ̀ ké wa dyuòɛ̀ ma. Mɔ̄ Nyɔǔn-dyùɛ̀ Dyú-gààɔ̀ dyi dyiɛń nìǐn, nìí, kǎà ɔ mu nììn.