Priljubljene svetopisemske vrstice iz Máfíò 19

Deli

Ké Jízɛ̀ gmɔ̀ ma wa dya, ké ɔ ɖá, “Nyɔǔn-dyù se ɖɛ nìà kɛ nyuɛ ɓɛ́ìn, kɛɛ Gèɖèpɔ́ɔ̀ ɓɛ́ìn ɖɛ séín nyuɛ.”

Ɔ ɖǎ ná nìǐn, wa se nyɔ sɔ̃́ ɖe, kɛɛ wa mɔ̀ǎ nyɔ dyúáɖò. Ɔ jèɛɛ, ɖɛ Gèɖèpɔ́ɔ̀ ɖǎ xwaún poìn nyɛɛ, nyɔ ɖò ní nyuɛ, ké wa ní sɔìn mú.”

Ké Jízɛ̀ jǔ ma wa gɔ̃̌, ké ɔ ɖá, “Ɓě séè Gèɖèpɔ́ɔ̀-cèè-ɖɛ̀ɔ̀ wáká nyɔ nìà kɛɛ wuɖuún zà ɖòò? Ɔ wákáɔ̀ ɖá, ‘Ɖé ɖɛ dè gbɔɔ̀ múɛɛ, Ɖɛ-séín-mɛ-nyɔ̀ɔ̀ mɛ ma gàa kè màa. Ké ɔ ɖá, “Ɓó ɖɛa jèɛɛ, gàaɔ̀ mu ɔ ɖe kè ɔ ɓǎ dyi táàùn, ɓɛ́ ɔ kè ɔ gmààɔ̀ ké xwaún kpáìn, ɓɛ́ wa ké nyɔ dyúáɖò jǔ.” ’

Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓě táà dyú mɛ́nɛ́ɛ́ ɓěɔ̀ dyi. Wa mɛ dyi ḿ gbo. Ɓěǐn ɖá ɓɛ́ ɓě ké wa dyí ɓàɖàìn, sepóɛɖé wa mɔ̀ nyɔ mu Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃̀ùn.”

Nyɔ pàɖǎ nìà dyúa ɓó kàǔn wɛ̃ɛ mu ɖe ziìn ɖé ɓóɖó ɖìè nìà dyiɛń nyɛɛ kɔ̃, ké nyɔ pàɖǎ sèà ɖe ɓó kàǔn wɛ̃ɛ mu dyúa ziìn ɖé ɓóɖó ɖìè nìà dyiɛń nyɛɛ kɔ̃.”

Ké nyɔ ɓɛ́ ɔ táà ɔ gbǒ ɓě mɔɔ ɔ ɖíí-gàà ɓě mɔɔ ɔ ɖíí-màà ɓě mɔɔ ɔ ɖe mɔɔ ɔ ɓǎ mɔɔ ɔ dyú ɓě mɔɔ ɔ pá ɓě dyi ɓó ní jè kɛɛ mu ɖɛ ɓě nì ná kɛɛ dú hɔ̃dɛ̀ɖɛ̀ ɖò dyéìn, ké ɔ mu sè-ná-sèɛ̀ fɛ̀ɛ̀ ɓéɖéìn.

Ké Jízɛ̀ cɛ̃ɛ ma ɔ gbo, ké ɔ ɖá, “M̀ dyi mɔ́ ɓɛ́ m̀ ké se kɛɛ ɖò ɓéɖé fɔɔ ní, nìí, m̀ mɛ mu, ɓɛ́ m̀ ké ɖɛ séín ɓě ɓɛ́ m̀ ɓéɖéɛɛ peɖe, ɓɛ́ m̀ ké wíɖíɔ̀ gǎ-dyé-nyɔ̀ ɓě nyí. Nìí, nì mu dyi-dè-ɖɛ̀ ɓéɖéìn ɖé dyɔún. Ké m̀ mɛ dyi, ɓɛ́ ḿ kè mɔ̀ ké mú naìn.”

Ké Jízɛ̀ jǔ ma ɔ gɔ̃̌, ké ɔ ɖá, “Ɖɛ́ kɔ̃̀ jè m̀ dièà ḿ dyi ɓó ɖɛ mɔ̀ ɖɛ nɔ̀mɔ̀ dyíin nyɛɛ jè kɛ́? Nyɔ dyúáɖò nyɛ̀nɛ̀ɛ̀ kɔ̃̀ kpeɖe nɔ̀mɔ̀ dyíin. M̀ dyi mɔ́ ɓɛ́ m̀ ké fɛ̀ɛ̀ ɓéɖé ní, nìí, kpɔ̃ gma ɓěɔ̀ dyi.”

Ḿ cɛ̃ɛ ɓě gbo ɖe, ɔ kàmà mú ɓɛ́ bã-nyɔ̀ ké ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ mu, ké ɔ zi ɓɛ́ sǒ-nì-gbu-kɔ̃ún ké taɓa-ɖɔ-ɓì mú cɛ̃̀ìn nyɛɛ dyí.”

Ḿ mɛ cɛ̃ɛ ɓě gbo, nyɔ kɔ̃̀ gmàà se gbàɖàùn po, ké ɔ mu ɔ ɓɔ́ùn, ɓɛ́ ɔ ké màa kà kò ɖò dyi kpɔ̃ kɛɛ, nyɔɔ̀ po gmaɖe.”

Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ḿ cɛ̃ ɓě jǎà gbo, ɔ mu mú kàmàǔn ziìn ɓɛ́ bã-nyɔ̀ ɖò ké ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ mu.