Logo YouVersion
Ikona Hľadať

Tongɔ ndani

Buku olo ndopa tɛnɛ tɛ Yezo Kristo. Ili buku ni la Fana Ngbangɔ. Adu Fana Ngbangɔ mɛ ndo Nzapa na azi tɛ lo agbe. Fana Ngbangɔ ni adu kapa mɛ Nzapa ako ya, ni na songɔ azi mɛ aye lo tɛ Yezo Kristo mɛ gbia, lo mɛ nga Wa songɔ azi. Ta fana Ngbangɔ ndotɛnɛ bo tɛnɛ ti alo mɛ ndo asi ma. Kanda Fana Ngbangɔ ndopa nga ya, azi ko la adi tɛnɛ ni ko, ale ala gbinya bɛ la, ala hɛ̃ nga tɛrɛ la hɛ̃ Yezo. Azi ndẽ ndẽ ndẽ ndo la asu abuku sui sɛ ndoni mbara mbara mɛ na ya Fana Ngbangɔ. Azi ni ko zu alengbi ti dungɔ bere sui kɔi ndoni sɛ. Ala su ndo abuku ni na ya buru sui kɔ̃. Ko abɛ nga ma la alo ti ya abuku ni adu ndẽ ndɛ̃ ndɛ̃ ko, abuku ni zu ndopa bo tɛnɛ kɔi. Tɛnɛ ni lo mɛ: Nzapa ndoye azi. Ko ye mɛ afa ya, lo ndoye azi la lo to Yezo Kristo.

Abuku osiɔ ti Nzɔ̃ Pa ndopa tɛnɛ ti du tɛ Yezo Kristo, ti alo mɛ lo ha, ti aye mɛ lo li, ti kwá mɛ lo kpi, nga na ti songɔ kwá mɛ lo so. Ili buku mɛ asu na pɛ abuku osiɔ ti Nzɔ̃ Pa la “Kwa mɛ awa pangɔ kwa tɛ Yezo ali”. Buku ni ndopa se mɛ apa na Nzɔ̃ Pa na ya buru sui ota ndoni da. Ato nda pangɔ Nzɔ̃ Pa ni ndo ka Yeruzalɛmɛ, asi na ni ka Roma. Ambɛti zu mɛ Polo asu ko, adu ndo na lo ti gbinyangɔ tɛnɛ hɛ̃ akɔzo awa Kristo, nga na lo ti hẽngɔ la nzɔ̃ wangɔ. Na pɛ ambɛti mɛ Polo asu ko, ambɛti mɛ ndɛ̃ niiambe nga da. Ko tɛnɛ ti ya ni zu ndɛ̃ ndɛ̃ ndɛ̃. Asu ambanga mbɛti ni hɛ̃ awa Kristo ti ndo kwɛ, kanda tɛ ambanga mbɛti mɛ ndɛ ko, asu ni hɛ̃ azi ti Eklezia kɔi kɔi, bɛrɛ hɛ̃ ambanga azi kɔi kɔi.

Lo mɛ asu na ya ndangba buku ti Fana Ngbangɔ ko, aɔngbi na alo mɛ asu na ya abuku mɛ ndɛ̃ ti Fana Ngbangɔ. Lo mɛ asu na ya Fana Ngbangɔ ndofa ya, Nzapa ndolɛ gbia na ndo aye zu. Lo ni ndofa nga ya, Yezo Kristo adu Gbia. Afa lo ni ko na ya suma, ko ngbondo tɛnɛ na ya ni. Alengbi ti mungɔ ngbondo tɛnɛ ni ko nga ma ni la adu tɛne ti ya Fana Ngbangɔ zu. Ngbondo tɛnɛ ni lo mɛ: “Gbia Nzapa tɛ e, na Mɛsia mɛ Nzapa asunu lo ko, ala to nda lɛngɔ gbia na olo na ndo azi ti lɛ sese, Nzapa na lɛngɔ gbia na ndo la buru na buru!” (Suma 11.15)

Awa gbinyangɔ Fana Ngbangɔ na Ngbandi aye lɛ la fani sĩni na ndo Fana Ngbangɔ mɛ asu na yanga ti Grɛkɛ, na ti Franse nga na ti Lingala la ala gbinya na buku olo. Ala ye nga lɛ la na ndo abuku mɛ ndɛ̃ sĩ, so gingɔ nda tɛnɛ ti ya Fana Ngbangɔ, la ala gbinya na ni.

Ka nda buku olo ko, ĩ na hũngɔ ndo mɛ atɔndɔ na nda tɛnɛ. Ĩ na hũngɔ nga atɛnɛ mɛ ta Angbandi zu ahĩnga ma. Se ĩ hũ nga atɛnɛ mɛ asu na ya aye olo […] ko, ĩ hĩnga ya, ta asu ni na ya ambanga angbina buku ti Grɛkɛ ma.


Bible Society of the Democratic Republic of Congo

NGB87 VYDAVATEĽ

Zistiť viac

Ostatné preklady od Bible Society of the Democratic Republic of Congo

YouVersion používa súbory cookies na prispôsobenie tvojho zážitku. Používaním našej webovej stránky súhlasíš s používaním cookies tak, ako je popísané v našich Zásadách ochrany osobných údajov