එස්තර් 9:1-6

බෙදාගන්න

එස්තර් 9:1-6 සිංහල කාලීන පරිවර්තනය (SCV)

රජුගේ නියෝගය හා ආඥාව ක්‍රියාත්මක කිරීමට නියමිත දොළොස් වන මාසයේ, අදාර් මාසයේ දහතුන් වන දිනය, එදින යුදෙව්වරුන් මැඬලීමට ඔවුන්ගේ සතුරන් බලාපොරොත්තු වූ දවස වුව ද, තත්වය අනෙක් අතට පෙරැළිණ; යුදෙව්වරු එය, තමන්ට වෛරකළවුන් මැඬලීමේ දවසකට හරවා ගත්හ. අහෂ්වේරොෂ් රජුගේ හැම ප්‍රාන්තයක ම යුදෙව්වරු, තමන් විනාශ කරන්නට සෙවූවන්ට පහර දෙන පිණිස, තම පුරවරයන්හි එක් රැස් වූහ. අන් හැම ජාතියකට ම අයත් ජනයා පිට යුදෙව්වරුන් කෙරේ වූ භයක් පතිත වූ බැවින් යුදෙව්වරුන්ට එරෙහිව නැගිටින්නට සමත් කිසිවකු හෝ නො වී ය. සියලු රජුගේ ප්‍රාදේශීය ආණ්ඩුකාරවරු ද විවිධ ප්‍රාන්ත-පාලකයෝ ද විවිධ ජන කොටස් හි අධිපතීහු ද මොර්දෙකයි කෙරේ වූ බියෙන් ඇලළී ගියාහු, යුදෙව්වරුන්ට ම උදවු උපකාර කළහ. මොර්දෙකයි, රජ මැදුරෙහි බලවතා විය. ඔහුගේ කීර්තිය ද ප්‍රාන්ත මුළුල්ලෙහි පැතිර ගියේ ය. මෙසේ මොර්දෙකයි වඩ වඩා බලවත් විය. යුදෙව්වරු ඔවුන්ගේ සියලු සතුරන් මරා දමමින්, වනසාලමින්, ඔවුන් කඩුවෙන් ගසා හෙළූහ. ඔවුහු, තමන්ට වෛර කළවුනට තමන් රිසි පරිද්දෙන් කළහ. යුදෙව්වරු ෂූෂන් බළකොටුවේ මිනිසුන් පන්සිය දෙනෙක් මරා දැමූහ.

එස්තර් 9:1-6 Sinhala Revised Old Version (SROV)

රජුගේ ආඥාව සහ නියෝගය ඉෂ්ටවීමට පැමින්නාවූ, යුදෙව්වරුන්ගේ සතුරන් ඔවුන් කෙරෙහි බලය පවත්වන්ට බලාපොරොත්තුව සිටි නුමුත් යුදෙව්වරුන්ම තමුන්ගේ වෛරකාරයන් කෙරෙහි බලය පවත්වන හැටියට කරුණු අනික් අතට හැරුණාවූ දවස වන අදාර් මාසය නම්වූ දොළොස්වෙනි මාසයේ දහතුන්වෙනිදා, යුදෙව්වරු තමුන්ට අනතුරු කරන්ට උපා යෙදූ අය පිට අත්හෙළන පිණිස අහෂ්වේරොෂ් රජුගේ සියලු රටවල තමුන්ගේ නුවරවල රැස්වුණෝය. ඔවුන්ට විරුද්ධව සිටින්ට කිසිවෙකුට නුපුළුවන්විය; මක්නිසාද ඔවුන් නිසා භයක් සියලු ජනයන් පිට පැමුණුණේය. රටවල සියලු අධිපතියෝද දිශාධිපතියෝද ආණ්ඩුකාරයෝද රාජකාරිය කරන්නෝද යුදෙව්වරුන්ට උපකාරකළෝය; මක්නිසාද මොර්දෙකයි නිසා භයක් ඔවුන් පිටට පැමිණ තිබුණේය. කුමක්හෙයින්ද මොර්දෙකයි රජගෙදර උත්තමයෙක්ව සිටියේය, ඔහුගේ කීර්තියද සියලු රටවල පතළවී ගියේය. මොර්දෙකයි නම් ඒ පුරුෂ තෙමේ වඩ වඩාත් උසස් විය. එසේ යුදෙව්වරු තමුන්ගේ සියලු සතුරන්ට කඩුවෙන් පහරදී මරා විනාශ කළෝය, තමුන්ගේ වෛරකාරයන්ට තමුන්ගේ කැමැත්තේ හැටියට කළෝය. ෂූෂන් බලකොටුවේදී යුදෙව්වරු මනුෂ්‍යයන් පන්සියයක් මරා නැතිකර දැමූහ.

එස්තර් 9:1-6 Sinhala New Revised Version (NRSV)

රජුගේ ආඥාවේ නියෝගය ක්‍රියාත්මක වන දිනය වන අදාර් නම් දොළොස් වන මාසයේ දහතුන් වන දිනය පැමිණියේ ය. ජුදෙව්වරුන්ගේ සතුරන් ඔවුන් සිය බලයට යටත් කරගැනීමට බලාපොරොත්තු වූ දිනය එය වූ නමුත්, එය ජුදෙව්වරුන් විසින් සිය සතුරන් යටත් කරගැනීමේ දිනයකට හරවාගන්නා ලදී. තමන්ට අනතුරු කරන්නට උපා යෙදූ අයට පහර දෙන පිණිස අහෂ්වේරොෂ් රජුගේ සියලු රටවල ජුදෙව්වරු තම තමන්ගේ නගරවල රැස් වූ හ. සියලු ජනයා ඔවුන් කෙරෙහි බියපත් ව සිටි බැවින් ඔවුන්ට විරුද්ධ ව සිටින්නට කිසිවෙකුට නුපුළුවන් විය. ඒ ඒ ප්‍රදේශවල සියලු අධිපතියෝ ද දිශාධිපතියෝ ද ආණ්ඩුකාරයෝ ද රාජකාරිය කරන්නෝ ද ජුදෙව්වරුන්ට උපකාර කළෝ ය. මන්ද, මොර්දෙකයිට බියෙන් ඔව්හු මිරිකී සිටියෝ ය. මොර්දෙකයි වූකලී රජ මැදුරේ බලසම්පන්න ව සිටියේ ය. ඔහුගේ කීර්තිය ද සියලු ප්‍රදේශවල පතළ වී ගියේ ය. මොර්දෙකයි වඩ වඩාත් බලසම්පන්න විය. එබැවින් ජුදෙව්වරු තමන්ගේ සියලු සතුරන්ට කඩුවෙන් පහර දී මරා විනාශ කළෝ ය. ඔව්හු සිය සතුරන්ට තමන්ගේ කැමැත්තේ හැටියට කළෝ ය. සූසා අගනුවර ජුදෙව්වරු මිනිසුන් පන්සියයක් මරා විනාශ කර දැමූ හ.

එස්තර් 9:1-6 New International Version (NIV)

On the thirteenth day of the twelfth month, the month of Adar, the edict commanded by the king was to be carried out. On this day the enemies of the Jews had hoped to overpower them, but now the tables were turned and the Jews got the upper hand over those who hated them. The Jews assembled in their cities in all the provinces of King Xerxes to attack those determined to destroy them. No one could stand against them, because the people of all the other nationalities were afraid of them. And all the nobles of the provinces, the satraps, the governors and the king’s administrators helped the Jews, because fear of Mordecai had seized them. Mordecai was prominent in the palace; his reputation spread throughout the provinces, and he became more and more powerful. The Jews struck down all their enemies with the sword, killing and destroying them, and they did what they pleased to those who hated them. In the citadel of Susa, the Jews killed and destroyed five hundred men.