Mahte 6
6
Alû Byî É Hkyô
1Núngmòq díngmán é hkyô lé, byu pé myàng sháng gàq nghû, byu pê hí má a kut shit loshoq, sidìq nyì keq. Haû su kut é nghut jáng, mauhkûng htoq mâ é núngmòq é Îwâ chyáng mai, chyûnghuq wó yû kôrâ a nghut.
2Haû mù, haû gègùn labyoq kut bang gi, byu pê èq shigyaú é hui sháng gàq ga, târâjong pé hká, hkyô pé hká kut é su, nàng gi, alû byî é hkûn, tut htê su hkâ lhoqhtoq. Ngò, núngmòq lé teng za taí kôlé, haú bang gi, yhángmòq é chyûnghuq lé hkúm shoq wó yû bekô nghut lhê. 3Ra châ to bang lé nàng alû byî é hkûn, náng é lòqyo lòq kut é hkyô lé, lòqpaî lòq lé lháng hkâsé nhâng. 4Haú hkûn, nàng alû byî é lé, ó a châng sé râ nghut lhê. Haû jáng shèq, ó a sé loshoq kut é hkyô lé myang é sû, náng é Îwa gi, nang lé chyûnghuq shigyaú râ nghut lhê.
Kyûdûng É Hkyô
Luk 11:2-4
5Núngmòq kyûdûng le, gègùn labyoq kut bang su hkâkut kó; hkâsu mù gâ le, yhángmòq gi, byu pé byu-myàng shoq ga, târâjong pé eq hkyô kang pé má yàp mù, kyûdung râ ô nau akô. Ngò, núngmòq lé teng za taí kôlé, haú bang gi, yhángmòq é chyûnghuq lé wó yû bekô nghut ri. 6Nghut kôlhang, nàng kyûdûng le, náng é wàp hkaû má wang ló mù, hkum myhî pyám luî, a byu-myang é náng é Îwâ chyáng dung aq. Haû jáng, ó a byu-myang é lé myàng sû, náng é Îwa gi, nang lé jeju dum tau byi râ nghut lhê. 7Haû mù, kyûdûng le, tûngbaù pé su kut luî, dang puq hkâhtau kó; hkâsu mù gâ le, yhángmòq gi, dang hîng chín luî dung jáng shèq, gyo byi nhô ngam akô nghut ri. 8Haú bang su hkâkut kó; hkâsu mù gâ le, núngmòq é Îwa gi, núngmòq râ é hkyô lé, núngmòq a dung shi mai sê to Sû nghut lhê.
9Haû mù, núngmòq kyûdûng le,
‘Mauhkûng htoq tsáng myhâng mâ é ngá-mòq é Âwa ê,
Náng é myìng gi, chyoiyúng nyî sháng gàq,
10Náng é mîngdán jé lô sháng gàq,
Nàng ô nau é hkyô, mauhkûng htoq má dìk é su, myigùng htoq má le dìk sháng gàq ô.
11Ngá-mòq nyí wuî râ é zoshuq lé, ngá-mòq lé hkû-nyí byi laq.
12Ngá-mòq lé shut é bâng é mara lé ngá-mòq hkyut pyám byî é su,
ngá-mòq é mara lé le hkyut pyám byi laq.
13Ngá-mòq lé, agúng alaú hkyô má a wàng nhang é za,
agè ashop jang mai hkyi yù laq ô.
(Hkâsu mù gâ le, kô dik é ùp sîng hkyô, a-tsam eq hpungwup shingkang gi, pyàt dedu ahtum abyùq Náng chyáng ru joq nyi ri ô! Amen.)’#6:13 Chyúmlaiká ra-am má, shí túm a bo é nghut lhê.
nghû dung keq. 14Supê èq, núngmòq lé kut shut é mara lé, núngmòq hkyut pyám byî é nghut le gi, mauhkûng htoq mâ é núngmòq é Îwa le, núngmòq lé mara hkyut pyám byi râ nghut lhê. 15Nghut kôlhang, haú bâng é mara lé, núngmòq a hkyut pyám byî é nghut le gi, núngmòq é Îwa le, núngmòq é mara lé hkyut pyám byi râ a nghut.
Zoshuq Túm Hkyô
16Núngmòq gi, zoshuq tûm é hkûn, gègùn labyoq kut bang su myòqdong hkâ lhoqnyhui kó; hkâsu mù gâ le, haú bang gi, yhángmòq zoshuq tûm é hkyô lé, tûn shit râ matú myòqdong lhoqnyhuî shit akô nghut ri. Ngò, núngmòq lé teng za taí kôlé, haú bang gi, yhángmòq é chyûnghuq wó yû bekô nghut ri. 17Núngmòq kúm gi, zoshuq tûm é hkûn, núngmòq zoshuq tûm é hkyô lé, byu pê hí má de de a dùt é za, núngmòq a byu-myang é Îwa za myàng sháng gàq, myòq chî pyám luî, u xû bùt keq; 18haû jáng shèq, ó a sé loshoq kut é hkyô lé myang é Sû, núngmòq é Îwa gi, núngmòq lé chyûnghuq shigyaú râ nghut lhê.
Mauhkûng Htoq Mâ É Sùtzè
Luk 12:33-34
19Jàngkon, jògyik èq wó lhoqhtên pyâm é eq hkaú su èq le wó wang hkaû yu pyám byî é myigùng htoq má, núngmòq é matú, sùtzè lé hkâhkong to kó. 20Jàngkon, jògyik èq le a wó lhoqhtên pyâm é eq, hkaú su èq le a wó wang hkaû yu pyâm byî é mauhkûng htoq má shèq, núngmòq é matú sùtzè hkong to keq. 21Hkâsu mù gâ le, náng é sùtzè jòq jang má, náng é i‑myìt le jé nyî râ nghut lhê.
22Myòqjí gi, gùngdû é myibung nghut nyi ri. Náng é myòqjí ge é nghut le gi, náng é gùngdu gón má maubó byíng mui to râ nghut lhê. 23Nghut kôlhang, náng é myòqjí a ge é nghut le gi, náng é gùngdu gón gi, mauchut tuq dùt nyì râ nghut lhê. Náng chyáng bo é maubó gi, mauchut byùq é nghut jáng, mauchut haû gi, hkâ-í yhang htû râ lhâ!
24Ó yùq nghut kôle, yhûmsîng í yùq lé wó dójaú râ a nghut. Hkâsu mù gâ le, yhang gi, rayùq lé a naù a wom kut mù, rayùq lé gi, chyitdàp râ nghut lhê; haû a nghut jáng, rayùq lé lhumzui mù, rayùq lé gi, hpau a tap kut râ nghut lhê. Núngmòq gi, Garai Gasang lé le, ngùnzè lé le, radá dâm wó dójaú kôrâ a nghut.
Hkâ-myìt Chiq Kó
Luk 12:22-31
25Haû mù luî, Ngò, núngmòq lé taí kôlé, núngmòq é chyungxê é matú haî zo haî shuq râ eq núngmòq é gùngdû matú haî wùt haî tsang râ lé, hkâ-myìt chiq kó. Chyungxe gi, zoshuq htoq má, gùngdu gi, mèbû htoq má, je ahkyàk lhê a nghut kó lhú? 26Maulat mâ é nghoqzô pé lé wú wú keq; yhángmòq gi, kyô hkyó kyô shu a kut é htoq agó, chyî pé má le haî a tsîng kat to kô é nghut le lháng, mauhkûng htoq mâ é núngmòq é Îwa gi, yhángmòq lé, byi tso byi huq nyi lhê. Núngmòq gi, nghoq haú pé htoq má je riyhang hpaudap nyi lhê a nghut kó lhú? 27Núngmòq má, ó yùq wá, myìt chiq é èq, yhûmsing é chyungxe lé radúng kô wó jàt yù kôrâ lhú?
28Haû nghut le nhîng, haî mù, mèbû matú myìt chiq akô lhú? Myigùng má yùq tô é htupbó ban pé hkâsu kut kô lo é lé, myìt wú keq. Haú pé gi, mû le a zui, hkyîng le a duì kó nghut ri. 29Nghut kôlhang, Ngò, núngmòq lé taî kyo kôlé, Hkóhkâm Sholumon hpung kô dik u lé wùt é mèbu lháng, ban haû rabó lé a hkyit nghut ri. 30Lùmjíng myìt tiq é bang ê, hkû-nyí jòq mù, nàpmá myihkyóm má dú kat pyám hui râ nghut é yòsô mhan pé lé za lháng, Garai Gasang haû su kut hut é nghut le gi, núngmòq lé je riyhang hut râ a nghut kó lhú? 31Haû mù, ‘Haî zo râ lhí?’, ‘Haî shuq râ lhí?’, ‘Haî wùt râ lhí?’ nghû hkâ-myìt chiq myhíng kó. 32Tûngbaù pé kúm gi, haú pé bànshoq lé châng hkat ho nyi akô; nghut kôlhang, mauhkûng htoq mâ é núngmòq é Îwa gi, haú pé lé núngmòq râ é hkyô, sé byî nyi lhê. 33Nghut kôlhang, Yhâng é mîngdán eq díngmán hkyô lé hí hô keq, haû jáng, haú pé bànshoq, núngmòq lé puq byi râ nghut lhê. 34Haû mù, nàpmá lhê é matú hkâ-myìt chiq kó; hkâsu mù gâ le, nàpmá gi, yhâng é yhang myìt chiq râ nghut lhê. Hkû-nyí é wuîhke hkyô gi, hkû-nyí é matú gé bê nghut ri.
දැනට තෝරාගෙන ඇත:
Mahte 6: znot
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2025, Wycliffe Bible Translators, Inc.