Malahkiq 1
1
1Myìqhtoi dang: Malahkiq dông mai Isira-elaq é byu pê é matú byî é, haû Yhûmsîng Garaî é mungdang gi, shí dông nghut ri.
Garai Gasâng É Chyitdàp Myìt Lé Isira-elaq Byu Pé A Dê Lum É Hkyô
2-3Haû Yhûmsîng Garai gi, “Ngò, núngmòq lé chyitdàp bê nghut lhê.” ga taî ri.
“Nghut kôlhang, núngmòq gi, ‘Nàng, ngá-mòq lé hkâsu kut chyitdàp é lhú?’ ga myî akô. Goì ê! Eso gi, Yakup é yhang mang nghut lhê, a nghut kó lhí? Nghut kôle, Ngò gi, Yakup lé chyitdàp bê nghut lhê. Nghut kôlhang, Eso lé gi, a ngui é nghut mù, yhâng é bum mau lé chamchyuîyuì kut pyám luî, yhâng é silî wunlî maumyî lé, yòsô dànghkuî pê é matú tô to byi bê nghut lhê.” ga haû Yhûmsîng Garai taî pyo ri.
4Edom byu pé gi, “Lhoqhkyop pyâm é ngá-mòq hui kôlhang, htên byòq tô é lé ngá-mòq dum saî saí râ nghut lhê.” ga taí kôrâ nghut lhê.
Nghut kôlhang, haû Wum-o a-tsam dìk shoq bò Sû Yhûmsîng Garai shî su ga taî ri; “Yhángmòq saî saí kôle, Ngò gi, hpyoq hpyi pyám byi râ nghut lhê. Yhángmòq gi, Agè Ashop é Mîngdán, Yhûmsîng Garaî é nhikmó-yô é ahkaû má ayang nyi é byu pé, ga wùt é hui kôrâ nghut lhê. 5Núngmòq gi, múzó haú lé yhûmsing é myòqjí èq yhang myàng mù, ‘Haû Yhûmsîng Garai gi, Isira-elaq é maukyo lai shoq lháng kô hkìk ri.’ ga taí kôrâ nghut lhê.
A Sansêng É Hkungga Nhông Byî É Dông Dangshikaq Lé Lhoqhtên Pyâm É Hkyô
6Zo gi, yhâng wa lé, jùn gi, yhâng é yhûmsîng lé, hkunggâ ri. Ngò gi, îwa nghut é nghut jáng, Ngo lé hkúnggâ é hkyô gi, hká má kó lhú? Ngò gi, yhûmsîng nghut é nghut jáng, Ngo lé gyùq hkúnggâ é hkyô gi, hká má kó lhú?” ga, haû Wum-o a-tsam dìk shoq bò Sû Yhûmsîng Garai taî ri.
“Hkyangjông pé núngmòq gi, Ngá é myìng lé wú myhuq pyâm akô.
Nghut kôlhang, núngmòq gi, ‘Náng é myìng lé, ngá-mòq hkâsu kut wú myhuq pyâm ri lhú?’ ga myî akô nghut ri.
7Núngmòq gi, a san a sêng é zoshuq lé, Ngá é hkungga gyàp má nhông byi bekô nhung! Nghut kôlhang, núngmòq gi, ‘Ngá-mòq, Nang lé hká dông mai a sanséng dùt nhâng bê lhú?’ ga myî akô nghut ri.
Haû gi, Yhûmsîng Garaî é zangbó lé gi, ge wú tiq pyâm lhê nghû nau é dông nghut ri. 8Núngmòq, myòqjìt é shigu gaunyhaú lé nhông byi jáng, haû gi, shut é hkyô nghut bê, a nghut kó lhí? Núngmòq, hkyî htên é, a nghut jáng, no nyi é shigu gaunyhaú lé nhông byi jáng, haû gi, shut é hkyô nghut bê, a nghut kó lhí? Haú sû é pé lé, núngmòq é zau lé chyûnghuq byî wú keq mhaî! Yhang, núngmòq lé lhom gabú kôrâ lhú? Yhang lhom hàp yù râ nghut lhê lhú?” ga, haû Wum-o a-tsam dìk shoq bò Sû Yhûmsîng Garai taî ri.
9“Ahkuî, Garai Gasang, ngá-nhúng lé jeju shit râ matú, Yhang lé kyûdûng wú keq. Núngmòq é lòqmú nghut é, haû sû é hkungga pé lé, Yhang hàp yù byi râ nghut lhê lhú?” ga, haû Wum-o a-tsam dìk shoq bò Sû Yhûmsîng Garai taî ri.
10“Ngá é hkungga gyàp má myi akôm a tap pyám sháng gàq, núngmòq mâ é rayùq yùq, noqkuq yhûm mâ é hkum pé lé myhî pyám sháng gàq! Ngò gi, núngmòq lé a ngui é nghut lhê.” ga, haû Wum-o a-tsam dìk shoq bò Sû Yhûmsîng Garai taî ri. “Ngò gi, núngmòq é lòq mai shigu hkungga lé hàp yù râ a nghut. 11Hkâsu mù gâ le, Ngá é myìng gi, buìhtoq mai buìwàng jé shoq, gótû byù myû wui chyáng kô hkìk râ nghut lhê. Ngá é myìng gi, gótû byù myû wui chyáng kô hkìk râ nghut é yánmai, jowò hkangmó má, namngón hkungga eq sân-yúng é shigu hkungga pé nhông byi kôrâ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.
12“Nghut kôlhang, núngmòq gi, ‘Haû Yhûmsîng Garaî é zangbó gi, a sanséng dùt byùq bê nghut mù, haú mâ é zoshuq gi, wú myhuq pyâm é hui bê nghut ri.’ ga taî é dông, Ngá é myìng lé a sanséng dùt nhâng bekô nghut ri. 13Hau htoq agó, núngmòq gi, ‘Haû gi, wò mó yhang nghut ri!’ ga taí kômù, haú lé wú myhuq pyâm é dông nhô myìng mying pyám byî akô nghut ri.” ga, haû Wum-o a-tsam dìk shoq bò Sû Yhûmsîng Garai taî ri.
“Núngmòq, lú lo é, hkyî htên é eq no nyi é shigu gaunyhaú lé yu lé mù, lé nhông byi jáng, Ngò gi, núngmòq é lòq mai haú pé lé hap yû râ nghut lhê lhú?” ga, haû Yhûmsîng Garai taî ri. 14“Byi râ ga dâkam to luî, yhûmsing é sau hpúng má hàp yù gíng é saulo bo to kôle, mhaú mù, haû Yhûmsîng Garai lé, râ é hkyô bo é shigu gaunyhaú nhông byî é sû gi, dingnyé wó ri. Hkâsu mù gâ le, Ngò gi, kô hkìk é hkóhkâm nghut lhê. Haû mù, Ngá é myìng gi, byù myû wui chyáng gyùq chiq gíng râ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.
දැනට තෝරාගෙන ඇත:
Malahkiq 1: znot
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2025, Wycliffe Bible Translators, Inc.