Aromayi 7

Ɓədogbe ǹ amwulapai

1Əmi azaje azanugbai n anyikwozai, kwo fye ta kpəlo m; mi gnyi mii daɓo n azai nu ń ɓa kpe owa əye lo; nge owa n ikwoi ɓwasnu tu ń əza, əsa ń wo ye gnyilo n wyewyeyii nu m? 2Ma ga fye ɓədogbe ye, dna ń owa, aa n nyikwo nuseyii cekpigyido n əwo əɓai, əsa nu ń əwo əɓa ye n wyewyeyii lo nu. Ama ń əwo əɓa wa fyi, a la wo loya ń mwulapa n əwo əɓai. 3Ntulonu nsaiye, ń wa wnagye n zanugbai ədoi, əwo əɓai yee gnyi n wyewyeyii, a yi wo nge nyikwo anagbáizhniyi. Ama ń əwo əɓa wo la fyí, a la wo loya n owa yi, jesnu kwo to zhni anagbáizhni nu ń wa so ənu ədo m.

4Ntulonu, əmi azaje n amapwuyii, əfyehni ce fye ɓə kwu fyí fyi ń owa dna ń Kirisiti nayi, nabai ń fye ɓa kwu zhni əzado nya, əza yi nya ń a ɓə la wo kala ń əfyí nyi, nabai ń fye ɓa myi fya ga gyigyi ga Shekwoyi. 5Ntuge she yi ɓə ye fyi ń nayi, aɓənukwoizhni əpwawo, n owa ɓə kwu ɓa kala zhi gaaga nyi, ɓə yee zhni tnutnu n yi, ń kwo nu ɓə zhni yii ga gyigyi əfyí nya. 6Ama nsaiye, she yi ɓə kwu fyí fyi n ənya n kwo ɓə n yii pashi nyi, a la yi loya n owa, nabai ya myi ya zhni tnutnu n Zafnu zokwo woiwoyi, toge dna n zokwo kwokwoi nyakakai shi nya m.

Owa ǹ leifyii

7To, yi ɓa da ɓəye ɓo nge nanu a? Owa zhni leifyi nu? Nanyinanyi! Dudulonu mi to ɓə ɓa kpe ənya n kwo gyi nge leifyi m, toge owa ɓə gna kwo nyi m. Ntuge mi to ɓə ɓa kpe shewo ye ɓəhnihni, to owai ɓə gna kwa gna, “Fye taa tuwye n əzado ənya m,” 8Ama leifyi, she kwo ɓə ɓwa aba ntu ɓəgbetu ɓo, kwa kwnu ashewo dəhodəhoi pya ɓe ncei fyi n mi. Ntuge ntna owa, leifyi ɓə fyífyii. 9Dna ń əsa ho, mi ɓə gnyi n wyewyeyii ntna owa, ama she ɓəgbetu ɓə ɓe, leifyi kwa tognyi n wyewyeyii, jesnu maa fyí. 10Mi ɓə kwu gye nge, ɓəgbetu ń kwo nu ɓə gwo kwa ga wyewyeyi nyi, ɓəhnihni, əkwo nu ɓə ɓe ń əfyíi. 11Ntuge leifyi, she kwo ɓə zhni apma n ɓəgbetui kwa dna mi kwoce, jesnu dna n ɓəgbetu nu, ń kwo ɓə wu mi. 12Ntulonu nsaiye, owa n gyigyii lo, jesnu ɓəgbetu n gyigyii lo, n cefyé jesnu n bmya.

13To, a ɓa gna nge ənya n kwo bmyabmyai əkwo nu la ɓe mi n əfyíi? Nlonu to m, nanyinanyi! Ama nabai ń a ɓa kpe leifyi əye n zhni leifyi, kwa ɓe mi n əfyíi, dna ń ənya ń kwo ɓə bmyabmyai. Nabai nge dna ń ɓəgbetu; ń leifyi ɓaa zè leifyi cikpacikpai.

14Yi kpəlo nge owa dnalo n zafnu; ama mi zhni tnazafnuda nu, n kwnukwnuí, dna n leifyi akwnu, n zhni fyenu. 15Mi to n awyegai lo əɓo nya n mi zhni nyi m. Ntuge əɓo n mi ye ma zhni, əkwo nu to n mi zhni m, ama ədo ń mi ta ye m, əkwo nu n mi zhni. 16Jesnu ndəi mi zhni əɓo nu ń mi to ncei pma ma zhni m, mi la ye nu nge owa bmyalo. 17Ngye shikwonyi, əmi nu to yee zhni kwo, n əmihnii m, ama leifyi ń kwo dna ń əmi nyi. 18Mi kpəlo nge ənya manai ho to dnalo ń mi m, ń kwo nu gyi nge, dna ń əmi nayi leifyizhni nya m. Ntuge a wo mi pwalo nge mi zhni əɓo manai, ama mi taa myi ma zhni kwo m. 19Ntuge mi ta myilo mii zhni əɓo manai ń mi ncei pma ma zhni nyi m; aawo, ama əɓo nukwoi ń mi to ncei pma ma zhni nyi m, əkwo nu ń mi gyiabye lo n zhnii. 20Nsaiye, n ma zhni əɓo ń mi to ncei pma ma zhni m, əmi nu to yee gnyi mii zhni kwo m, ama leifyi nu, n kwo dna n mi nyi, nu zhni kwo.

21Ntulonu mi kwu gye owa ye kwoi zhni tnutnu: əsa ń mi ncei pma ma zhni əɓo manai, əɓo nukwoi gnyilo ń abaayi ń kwnusnu n mii. 22Ntuge dna ń əmi ədu, mi n Shekwoyi owa əɓoi pmalo; 23ama mi gye owa do lo kwoi zhni tnutnu dna ń əmi nayi aga, kwoi snukwnú n owai əmi bwugba nya. Nlonu kwoi pa mi dna ń zhalu ń owa leifyi nyai, ń kwo zhni tnutnu fyi ń əmi aga nyi. 24Mi la zè əza aɓwawnayi! Nyika nu ɓa gnyi mi ń nayi leifyizhni nya ye, n kwo gnyi kwoi lo mii ń əfyí nyi a? 25Mi sa Shekwoyi ami lo, dna n Yeisu Kirisiti əyi Dagayi!

Ntulonu nsaiye, əmiihnihni dna ń əmi bwugba, mi zhni fyenu nu Shekwoyi owa nya, ama dna ń nayi leifyizhni nya, mi zhni fyenu nu dna ń owa leifyi nya.

දැනට තෝරාගෙන ඇත:

Aromayi 7: GNB

සළකුණු කරන්න

පිටපත් කරන්න

සසඳන්න

බෙදාගන්න