Aromayi 14
14
Akalágbai n akaládaii
1Fye gwo əza n əwo gaiciyaganunui n akalágbai lo, ntna anyàwu kpe n aɓo aɓənakpeaje nya. 2Əzaho gaiciyaganunui ye wo nge wo gyi nyahonyahoi, ama zado n əwo gaiciyaganunui n gbakalá lo, wo ɓwa afnyitolo nu gyi. 3Əza n wo gyi nyahonyahoi nyi, wo to ci əza wyegba n wo ta gyilo nyi m. N kasnu əza n wo ta gyi nyahonyahoi lo nyi m, wo to da əza owa n wo gyilo m, ntuge Shekwoyi wo la ɓa kwnu gwo. 4Ho zhni nyikanu, ha da zado tnutnuyi owa a? N əwo Dagayi aba nu, n wo ɓa gnyiagnyi, kwo wa myiya. Njesnu n wo ɓaa myignyi ntuge əwo Dagayi ɓa myi wa zhni wo waa myignyi.
5Əzaho n nyipyei gbmanyi knyignyi n du nyipyei ədo n gyigyi; zado wa gye anyipyei vnyanya n zhni gbmanyigbmanyi nu. Zahozahoyi wo zhni əɓo n kwo la wo kwnuawye n əwo bwugba. 6Zahozahoyi n wo n nyipyei gbmanyi knyi, n zhni duduyi, wo zhni dəye ga Dagayi nu. Zahozahoyi ń wo gyi abwu, wo gyi ga Dagayi nu, ntuge wo ga Shekwoyi amisa; jesnu zahozahoyi n wo na abwu gyi ɓo, wo zhni dəye ga Dagayi nu, jesnu wo ga Shekwoyi amisa. 7Ntuge əzaho to lo ń wo gyianyì ga əwohni nu gbmanyi m, jesnu əzaho to lo n wo fyí əwohni əfyí nu gbmanyi m. 8N yi gyianyì lo, yi gyianyì ga Dagayi nu; jesnu n ya fyí, yi fyí ga Dagayi nu. Ntulonu, kwo yii gyianyì nu, kwo n ya fyí nu, yi zhni Dagayi anya nu. 9Ntu n ɓəye ɓo nu, n Kirisiti ɓə fyí jesnu wa jezeɓe n wyewyeyii nabai n wo ɓaa zè Dagayi afyífyiyi nya ɓədo n awyewyeyidai.
10Nlonu, əho, knyiyi nu zhni hoi da əhozado kwo mapwi owa a? Kwo knyiyi nu zhni hoi ci əzado wyegba a? Ntuge əyi vnyanya, yi ɓe gnyiagnyi zhi ń Shekwoyi owada shnikpegye abye. 11Kwo kafyilo:
“Dagayi ncei da lo, ‘Ndei mi ye shnisnusnu lo ń wyewyeyii,
nyikwutukwo dəhodəhoi ɓə ceakwokwo shi n əmi abye;
nyitala dəhodəhoi ɓə ci Shekwoyi.’ ”
12Ntulonu, zahozahoyi n yi, wo ɓə ga əwo nyadokwu ń Shekwoyi aba.
13Ntucenu, yi kwu fa əyihni aje owada ɓo. N əkwoɓwi, la bwugbadna, to ha zhni zahozahoyi wa cebwonyi m, kwo ha znu ənya dushi, əhozado kwo mapwi wa myiya m. 14Kwo la mi kwnuawye, jesnu kwo la mi la n əmi bwugba vnyanya dna ń Dagayi Yeisu, nge nyaho to lo ń kwo tucegye dna ń əkwohni m. Ama ngye zaho, wo la nyaho cewye nge tnagyigyii, nlonu kwo zhni tnagyii nu ń əza yi aba. 15Ngye bwugba kwo la əhozado kwo mapwii wnu ntu ənya ɓo n ho gyi, ho to ye znazna dna ń yeye nu m. To ye ənya n ho gyi nyi, kwa zhni zaho agbma, n Kirisiti ɓə fyi ntu n wo əɓo nyi m. 16Ntucenu, to fa a da ənya ɓo ń ho kpəlo ge kwo bmyalo kwaa zedna n zhni nukwoi m. 17Ntuge Shekwoyi əbemi, to zhni nyagyi gyi ɓo nu, ń ənyasnisnii m, ama ɓəfyecezhni, bwugbafu n agbmadai dna n Zafnu Gyigyiyi. 18Ntuge zahozahoyi n wo zhni Kirisiti tnutnu ń zokwo ye, əwo ɓo dá Shekwoyi, jesnu wo ɓwa azanyikwoci ɓəye.
19Ntucenu, fye fa ya ye əyihni ya zhni əɓo n kwo ɓe n bwugbafui jesnu kwa kwu əfye ɓwadodna myizhi. 20To kwu Shekwoyi tnutnu zhniagbma ntu nyagyi ɓo m. Anyagyi vnyanya n gyigyii lo, ama kwo to bmyalo əza wa gyi ənya n kwo ɓa zhni zado gbowo, wa cebwonyi m. 21Kwo gnabmya lo to əza wa gyi nyagyi, kwo wa sni anamnuwna kwo wa zhni ɓədo gbowo, n kwo ɓa zhni əwodo kwo mapwi wa myiya m.
22Ntulonu, ɓəhoɓəhoi n ho n gaiciyagai lo n aɓo ye nya, kwu ɓa fyi ń əho bwugba atasni n Shekwoyi. Anabəlikada nu ń əza yii, ń wo to znu əwohni əknyi, ntu anya ɓo, ń wo la tuɓwa nge aɓo gnabmyai nu m. 23Ama zahozahoyi ń wo kwu abwugba-aba fyi, ń wa gyi kwo, wo la əwohni znuknyi, ntuge wo ta gyi kwo dna n gaiciyaga nu m. Njesnu nyahonyahoi n kwo ta gbmi n gaiciyaganunui nu m, kwo zhni leifyi nu.
දැනට තෝරාගෙන ඇත:
Aromayi 14: GNB
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.