Ɓəkpəkpəyawu 3
3
Paka ga Ikilisiya n Sadis
1“Kanya, kwa lo da maləka Ikilisiya nya dna n Sadis:
“Aɓədagbma nu nyi n əwo, ń wo n azafnu ngwnu-tnaaba Shekwoyi nyai shi n akpasi ngwnu-tnaabai nyi. Mi kpé əfye atnutnu əye lo; fye n əyei tu lo nge fye n wyewyeyi lo, ama fye zhni afyífyiyi nu. 2Fye kwnúagyewyi! Fye ga ənya kalá n kwo ceshi lo kwoi ye kwa fyí nyi, ntuge mi to gye əfye atnutnu nunui əwye n əmi Shekwoyi awyeba m. 3Ntucenu, fye pá ənya ɓo n fye la gwo jesnu fye nyii kwu wo; fye shi kwo ɓwa kpa, jesnu fya yeabwi. Ama n fye to kwnúagyewyi m, mi ɓe lo ngye əvyì nu jesnu fye to ɓə kpe əsa n mi ɓə ɓe ncei m.
4“Dudulonu, fye n azai lo fyewyi, n ɓa fyilo n Sadis n ɓa too da əɓahni fyi n əɓənukwoi m. Ɓa ɓə kwnu znazna n mii, n aje abwuibwui kpe, ntuge ɓa kwnuce lo. 5Əza n wa gyi nasala, ngye əɓa, wo ɓə kpe aje abwuibwui. Mi taa gbmi əza yi əye ya n pafyi wyewyeyi nya m nanyinanyi, ama mi ɓə da əwo əye ɓo n əmi Dada abye n əwo amaləkai. 6Əza n wo n atnubwai lo, akpəge wo wo əɓo n Zafnu gna aikilisiya nyi.
Paka ga Ikilisiya n Fyiladefyiya
7“Kanya, kwa lo da maləka Ikilisiya nya dna n Fyiladefyiya:
“Aɓədagbma nu nyi n wo, ń wo nu zhni gyigyiyi n gaiciyai, əza n wo n Dawuda anyagwunyai shi. Ənya n wa gwuya zahozahoyi taa myi wa gwu kwo m, jesnu ənya n wa gwu, zahozahoyi taa myi wa gwu kwo ya m. 8Mi kpe əfye atnutnu əye lo. Gyewye, mi la abwokwnumi gwuya shi n əfye abye n əzaho taa myi wa gwu m. Mi kpəlo nge fye n kalái lo n ɓwasnu cewyi nu, dudulonu fye la əmi ɓədagbma shiɓwa jesnu to fyei na əmi əye aɓo m. 9Mi ɓa zhni aza yi n ɓa fyi n Ayahudiyibwokwnu Shetam nya nyi, n ɓa gna ge ɓa zhni Ayahudiyi, kwo shikwonyi ɓa to zhni əɓa nu m, ama akataceyi; Mi ɓa zhni ɓa, ɓa ɓe ɓa myiya zhi n əfye apitabwada aba, ɓa kwu kpe nge mi kwu yeye wu fye. 10Shikwonyi fye kwu əmi ɓəgbetu shiɓwa, fye kwu nubwo ɓwa n myizhii, əmihni ce ɓə kna fye n mwumwu əsai, n kwo ɓə ɓe kpe n anyì vnyanya nyi, kwoi mwi aza n ɓa fyilo n anyi.
11“Mi ɓe lo n pyeepye. La ənya shiɓwa n ho ncei lo, nabai n zahozahoyi to ɓə gwo əho fnunyi m. 12Əza n wa gyi nasala, mi ɓə la wo zè zhigwo dna n əmi Dagayipwuwa. Ɓa to ɓə shna kwnuya n kwo m nanyinanyi. Mi ɓə kwu əmi Shekwoyi əye kakpe n ɓa, n əye əmi Shekwoyi əzhiyaakwo nyai, Urishelima woiwoyi, n kwo ɓə shnizhi ɓe n əshemi kwoi gbmi n əmi Shekwoyi aba. Njesnu mi ɓə la əmi əye woiwoyi ka tu n ɓa. 13Əza n wo n atnubwai lo, akpəge wo wo əɓo n Zafnu gna aikilisiya nyi.
Paka ga Ikilisiya n Lawudisiya
14“Kanya, kwa lo da maləka Ikilisiya nya dna n Lawudisiya:
“Aɓədagbma nu nyi Aamyi nya, gaiciyazhninunui n ɓəgbmiyi gaiciya nya, əbegyiyi tu n Shekwoyi anyazhnizhni. 15Mi kpe əfye atnutnu əye lo, nge fye to fufui lo kwo n pyena m. A wo mi lo ngye fye ye zhni dəho gbmanyi nu n ɓa! 16Ntulonu, shikwonyi fye wo lo ɓwalaɓwala; fye to pyena lo m, fyenyi to fufui lo m; mi la ye ma knyiaknyiya n fyei n əmi əgbe. 17Fye gna lo, ‘Mi n gyiwyei lo; mi la nyaɓwa yezhi jesnu mi to n nyaho apmai lo m.’ Ama fye ta kpəlo nge fye zhi n əsnai nu m, n wna snusnu wnawnai, awyekwoyi, awyebwayi jesnu n zhi n ɓwotoloyii m. 18Əmi əfye n mi wu fye kwo nu nyi, nge fye si zinali əmi, n a la kwo pmya n ənái, nabai fya kwu zè agyiwyeda. Njesnu fye si aje abwuibwui n fye ɓa kpe, nabai fya ɓwi əfye aɓwotoloyi avnyinkwo nya; n tousegyii fya fyi n əfye awye, nabai fya gyewyeba.
19“Aza n mi ye ɓa, mi gnaknyi ɓa jesnu ma tá ɓa. Ntulonu fye la əwye nyi, jesnu fya yeabwi. 20Mi gnyi nyi n ya! Mi gnyi n abwokwnumi nu mii je kpakwo. Zahozahoyi n wa wo əmi bəgye waa gwu kpakwo ya, mi ɓa loɓe da wo, ma kwnu nyagyi gyi n woi, əwohni ce n kwnusnu n mii.
21“Əza n wa gyi nasala, mi ɓə ga wo aba woi kwnu asese tu n mii n əmi əbeshnikpegye, n ɓwasnu ngye shi mi ɓə gyi nasala, minyi kwnu asese tu n əmi Dadai n əwo əbeshnikpegye nyi. 22Əza n wo n atnubwai lo, akpəge wo wo əɓo n Zafnu gna aikilisiya nyi.”
දැනට තෝරාගෙන ඇත:
Ɓəkpəkpəyawu 3: GNB
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.