Jemyis 3
3
Nyitala wnashi
1Əmi agaiciyagayi aje, aza bəgyé nu to n fye, n ɓa ɓa kwu zè anyawuyi m, ntuge fye kpəlo nge əyi n yi wunya nyi, a ɓə da yi owa n əwyei bmyi n du azaje nya. 2Əyi vnyanya yi knyiabwonyi ń azokwoi gbowogbowo. Zahozahoyi n a ta ɓwa wo n ɓəgyii m, kpeekpe dna n əwo ɓəda, wo zhni əza nunui nu; n wo myi ń əwo nayi vnyanya wnashi.
3Əsa n yi kwu aluzhamyi fyi adokwo n əgbe nabai ɓa vyi əyi ɓəmwi, yi ɓa myi ya pmyi nyakpa yi vnyanya shi yi ncei pma. 4Fye shi aya nuwnanya awye n zhni ɓədogbe. Kwo shikwonyi ɓa kpaci jesnu ase akaládai nu knyi ɓa aɓwaya kpe n shikwo, əyadnayi zhni apma n əyadnanya ɓyiyii nu wa dna kwo lo ncei n aba n wo ye kwa lo. 5Nlonu ce, nyitala zhni əga ɓyiyi nu dna n nayi, ama kwo gyigbe yaakwo. Zhninubwo ha gye, shi ənápəce ɓyiyi cenadna n kwuci yaakwo, kwaa zè əná-gwogwoi. 6Nyitala zhni əná nu ce, kwo zhni əganukwoi nu dna n nayi aga. Kwo wnu nayi ya vnyanya n cegyei. Kwa dna əza anyìgyi wyewyeyi əná, jesnu əkwo n kwohni aa kwo dna n əná anápyi nya.
7Anyakpa dəhodəhoi vnyanya, alú fugyei, anya n ɓa kwó n nubwoi ɓədo n anya wyewyeyi shikwo nyai, a ta ɓa lo njesnu zanyikwoci wo la ɓa ta. 8Ama zanyikwoci ho to lo n wo ɓa myi n nyitala ta m. Kwo zhni nyanukwoi nu n kwo ta dna pyi m, n nunui n əmwu nukwoi zawu nyai.
9N nyitalai nu n yi ci əyi Dagayi n Dadai, njesnu n əkwoi nu n yi kpe azanyikwoci aknyi, n a ɓə zhni ɓa fyi n Shekwoyi dogbe nyi. 10Cici ɓədo n aknyikpei kwnuɓe n əgbe gbmanyi nu. Əmi azaje azanugbai n amapwii, kwo to gwo kwa wu nlonu m. 11Nuwna dadai n nuwna gnawnugnawnui ɓa ɓá pyiɓe n yaɓwo gbmanyi? 12Əmi azaje azanugbai n amapwii, gbaayi shnuwna ɓa gyi jemwunyi kwo jemwunyi shnuwna kwa gyi əgbà a? Akpəge yaɓwo gnawnugnawnui taa pyi nuwna dadai m.
Awyemwa pya lo ngwnu-aba
13Nyika nu zhni zacece n gənyikpeyi dna n əfye atasni a? Fa wa wu kwo dna ń əwo anyìgyi manai, ɓədo n aɓoi n wo zhni dna n tukwogba n kwo kwnuɓe ń wyemwa nyi. 14Ama ngye fye n bmyibmyi kasai n gnahohni bwugbaɓəye nyai sofyi lo n əfye adu, fye to gbma ntu nce ɓo m, kwo fyaa gaiciyanunui aɓəna m. 15“Wyemwa” yi pya ta gbmiɓe n əshemi nu m, ama kwo zhni anyìmi nya nu, ntna zafnu, ase nukwoi nya. 16Ntuge aba n bmyibmyi lo, n gnahohni bwugbaɓəyei, ho ɓa gye aɓo n gnamyizhi jesnu ai zhni ɓənukwoi dəhodəhoi n ɓo.
17Ama wyemwa n kwo gbmiɓe n əshemi, kpmisnui kwo zhni tnadodnai nu, nlonu kwo ye bwugbafu, kwo ta zhni azaje ɓənukwoii m, n əkwohnii gagai, kwo nunui n snusnugyei, kwoi ga gyigyi manai, kwo ta tnu aza tnu-tnu m jesnu kwo zhni ɓo n ədui gbmanyi nu. 18Aɓəwnazhiyi n ɓa bye ənya dna n bwugbafu ɓa ɓwa ɓəfyecezhni.
දැනට තෝරාගෙන ඇත:
Jemyis 3: GNB
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.