Jemyis 2
2
A la azawyeknyi əɓəkpma
1Əmi azaje azanugbai n amapwii, agaiciyagayi fyi n əyi Dagayi Yeisu Kirisiti latuyi, ɓəshishi nu to a wu bmyashi ai kaka m. 2N a gna ge, əzaho wa loɓe əfye ayezhiba n zinali ɓwanyi nyai dna n aje amanai anakwoi kpe, jesnu wyekwoyi ho n aje akwokwoi cegye nyai kpe, waa loɓe ce. 3N ha awye gnawna n əza yi nu n wo n aje amanai kpe nyi, ha gna wo, “Aseseba amanai n hoi shi nyi,” ama ha gna wyekwoyi, “La gnyi n ɓo” Kwo “La sase shi n əknyi, vyivyiwyi n əmi apitai,” 4ho too kwu kakai wu dna n əfye atasni jesnu ho la zhni owadayi n aɓənubwozhni nukwoii m?
5Fye knatnubwa, əmi azaje azanugbai n amapwii: Shekwoyi too la aza yi nu knyí, n anyì gye ɓa nge awyekwoyi nyi, nabai ɓa kwu zè anyaɓwayi fyi n gaiciyaga jesnu ɓai gyi əgwú əshebemi nya n wo ɓə la kwo shigbe n aza yi aba n ɓa ye wo nyi m? 6Ama fye kwu awyekwoyi ciwyegba. Fye ta pá lo ge, anyaɓwayi nu gyi fye fyi m? Əɓa nu ta kwu fye lo ncei n owada bwokwnu m? 7Əɓa nu ta da atukwopmi ɓo tu n Yeisu əye mwamwaida, əwo n fye zhni əwo anya nu nyi m?
8Ndei ɓəhnihni nu ge, fye kwu owa dnagbmai shiɓwa n kwo kafyilo ń Shekwoyi Nyakagyigyiyi nyi, “Wu əho kwnuzhiyi yeye she ho ye əhohni nyi,” ho zhni əɓo nu n kwo dnalo n zokwo. 9Ama n fya wu aza bmyashi fyei kaka, fye kwu leifyi zhni njesnu owa la fye pa n zhni owa agnanaznuyi. 10Ntuge əza n wa shi owa ɓwa vnyanya ama waa cebwonyi n ɓwasnu n əɓo gbmanyi, wo dnalo n ɓəgyi owa vnyanya gnanaznu. 11Ntuge əza n wo ɓə gna, “Ho taa zhni anagbái nyi m,” əwo nu naa je gna, “Ho to wu əza m,” N ho to zhni anagbái m, ama ha wu əza, ho la zè owa gnanaznuyi.
12Daɓo jesnu ha zhni əɓo ngye aza yi ń a ɓə da ɓa owa n owai n kwo ga loloya nyi. 13Ntuge owada n tna snusnugye nya nu ń a ɓə da tu n zahozahoyi tukwo n wo to n snusnugyei lo m. Snusnugye gyi nasala tu n owada.
Gaiciyaga ń atnutnui
14Əmi azaje azanugbai n amapwii, knyi əɓo manai nu lo n əza wa gna, wo n gaiciyagai lo, ama ntna atnutnu a? Gaiciyaga yi pya ɓa gnyi wo? 15N a gna ge əyido kwo mapwii gnyilo ntna ajekpe ɓədo n nyagyii fyegyifyegyi, 16n əzaho n fye wa gna wo, “Lo n bwugbafui; əse kwo la ho gyi jesnu nubwo kwo la ho fu,” ama to a kwu wo bmazhni n anyai n əwo nayi n əɓa apmai lo m, mi gye əkwo bmyabmya a? 17N ɓwasnu nlonu, gaiciyaga əkwohnikwohni, n kwo to kwnusnu lo n atnutnui m, kwo zhni fyífyii nu.
18Ama əzaho ɓa gna, “Ho n gaiciyagai lo, mi n atnutnui nu.” Wu mi əho gaiciyaga ntna atnutnu, əmi mi ɓa wu ho əmi gaiciyaga n əmi atnutnui n mi zhni nyi. 19Ho n gaiciyagai galo nge Shekwoyi ɓwasnu lo gbmanyi nu. Kwo bmyalo! Kwo ase, ɓa n gaiciyai ga lo lonu, njesnu ɓai vnyí.
20Əho əza mama, ho ye ɓəpəwu nu nge gaiciyaga ntna atnutnu kwo zhni gbəloi nu u? 21A to ɓə la əyi dada Ibrahim ba dna n ɓəfyecezhni ntu əɓo n wo ɓə zhni nyi, əsa n wo ɓə ga əwo nugwnu Ishakwu tu n bəgədi nyi m? 22Gye nge əwo gaiciyaga n əwo atnutnui ɓa ɓə kwnu tnutnuzhni nu, jesnu əwo gaiciyaga kwa kwu nu vnyanya ntu n əɓo ɓo n wo ɓə zhni nyi. 23Jesnu nyakagyigyiyi kwa kwu əgbənu n kwa gna, “Ibrahim ɓə la gaiciyaga Shekwoyi, aa kwo ba dna wo ge ɓəfyecezhni,” jesnu a yi wo ge Shekwoyi nugwnudo. 24A yi əza ɓəfyecezhniyi n əɓoi nu n wa zhni, toge n gaiciyanunui nu gbmanyi m.
25N ɓwasnu lonu, kwo Raham kaluwa, wo too ɓə la zè ɓəfyeceyi ntu əɓo ɓo n wo ɓə zhni nyi, əsa n wo ɓə gwo abawyekayi fyi fyaa nyi jesnu wa gna ɓa ami n zokwo doi m? 26Shikwonyi nayi ntna zafnu kwo zhni fyífyii nu nyi, nlonu gaiciyaganunui ntna atnutnuzhni kwo zhni fyífyii nu.
දැනට තෝරාගෙන ඇත:
Jemyis 2: GNB
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.