1 Atasaloniyi 2
2
Bwulus ɓəvyitnutnu dna n Tasalonika
1Fye kpəlo, əmi azaje azanugbai n anyikwozai, nge əyi gnaɓyi ɓeɓe, n əfye aba, to ɓə zhni gbəloi nu m. 2Yi ɓəə kwu azhnìgye n shnisnu, jesnu a kwu awyesnugbegye ɓo wu yi fyi n Fyilibyi, ngye shi fye kpəlo nyi, ama ǹ əyi Shekwoyi bmazhnii, ya pawye ya gna fye əwo nabagyi manai ai gnyiapaapa n əyii n akalái. 3Ntuge əyi ɓwatna ta gbmiɓe n abaɓwi nu kwo ɓənubwozhni nukwoi m, kwo nge, yi ye ya dna fye kwoce nu m. 4Ama n əkwoɓwi, yi daɓo ngye aza nu n Shekwoyi wo la əgbe ga nge a la nabagyi manai fnyi ɓa əɓwa. Yi ta ye əyi əɓo kwa da azanyikwoci nu m, ama Shekwoyi, n wo nu mwu əyi adu nyi. 5Fye kpəlo nge yi to ɓə zhni apma n nyitala dadai nu m, nanyinanyi, kwo ya kwu əyi fnana pwuanya m, Shekwoyi nu zhni əyi ɓəgbmiyi. 6Yi to ɓə zhni yii ye azanyikwoci cici nu m, toge n əfye aba kwo n əzaho m, kwo shikwonyi ngye Kirisiti atnutnuloyi, yi ɓə ɓa kwu apmazhni n əyi ikwoi tu n fye. 7Ama yi ɓə wu ngye aɓyi nu n əfye atasni.
N ɓwasnu shi əɓyiya wu əwo yeye ga əwo aɓyinawyii nyi, 8nlonu əyihni yi ɓə kwu fye wnakna. Ntuge yi ɓə kwu ye n fyei n mwa, fyi n bwugbada, ya da fye Shekwoyi nabagyi manai jesnu ya wu fye əyi anyìgyi ce. 9Ɓəhnihni fye pá lo, əyi azaje azanugbai n anyikwozai, əyi tnutnu n azhnìgyei; yi ɓə zhni tnutnu n nyipyei n sukwoi, nabai to ya tu zahozahoyi azhnì, əsa n yi ɓə fyi zhi n Shekwoyi nabagyi manai waazizhni ga fye m. 10Fye zhni aɓəgbmiyi nu, nlonu Shekwoyi, ngye shi yi ɓə zhni aza gyigyiyi, aɓəfyeceyi jesnu atnaɓətuyi fyi ń fye atasni, n fye ɓə kwu gaiciyaga nyi. 11Ntuge fye kpəlo nge yi ɓə kwu znazna n zahozahoyi n əfye mi, ngye shi əda zhni wa znazna n wohni aɓyii nu nyi. 12Yii myi fye zhi, yii fu fye abwugba jesnu yii gyiwye nge fye gyianyì n kwnuce n Shekwoyii, n wo nu ɓə yi fye fyi n əwo əbemi ɓədo n latui nyi.
13Njesnu əyihni ce, yi sa Shekwoyi ami lo ciici ntuge, əsa n fye ɓə gwo Shekwoyi ɓədagbma ncei nyi, n fye ɓə wo ń yi nyi, fye to ɓə gwo kwo ngye azanyikwoci ɓədagbma nu m, ama ngye shi kwo kwusnu lo, Shekwoyi ɓədagbma, n əkwo nu lo tnutnu fyi n fye, ń fye kwu gaiciyaga nyi. 14Ntuge əfye, əyi azaje azanugbai n anyikwozai, fye ɓə kwu zè aza n ɓa shna Shekwoyi ikilisiya n ɓa nyi ń Yahudiya əknyi n fyi n Kirisiti Yeisu nyi. Fye ɓə kwu azhnìgye fyi n əfyehni aza akwnu, ngye shi aikilisiya dəyi ɓə gyeazhnì fyi ń Ayahudiyi akwnu nyi, 15ń ɓa ɓə wu Dagayi Yeisu ɓədo n sheaɓəgwognayii jesnu ɓa nya yi ya. Ɓa ɓə la Shekwoyi wnubwugba, jesnu ɓai pwunú n azai vnyanya 16ǹ əɓahni mwakpe, to ɓa ye nge yi zhni Abyedo waazi nabai ɓa ɓwa gnyignyi m. N zokwo ye nu, ń əɓa aleifyi yekpeaje gna mwamwa. Shekwoyi minagyi napyei kwo la kpma ɓe tu ń əɓa tukwo.
Bwulus ɓəpwawo wa gye Atasaloniyi
17Ama əyi azaje azanugbai n anyikwozai, she a ɓə la yi gnaje, a kwu yi zè akwuwyi, əsa fyewyi nya (n nayi, toge n ɓənubwozhni m), fyi n əyi ɓəpwawo yaakwo ya əyihni mwakpe n zokwo dəhodəhoi nge ya gye fye awye. 18Ntuge ɓəhnihni yi ɓə ncei pma ya ɓe da fye, əmi Bwulus, ma kwu zhni, mii jezhni, ama Shetam waa zokwo gwù yi. 19Knyiyi nu zhni əyi awyetu, əyi bwugbabwui, kwo fnunyi n yi ɓə ɓwa latu n Dagayi Yeisu abye, əsa n wo ɓə ɓe a? Əfye nu to m? 20Ɓəhnihni əfye nu zhni əyi latu n bwugbabwui.
දැනට තෝරාගෙන ඇත:
1 Atasaloniyi 2: GNB
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.