Mataayo 2
2
Abhasombookerwa bha jinjota abhaja okuramya Yeesu
1Yeesu ꞉eebhuriiywe mu‑musi gwa Bhetereyeemu mu‑mukoowa gwa Yuudeya, omwanya gwa obhutungi bhwa omukama Yeroode.#2:1 Yeroode. Ku‑meeresyo amaafu, ringira Yeroode Omukuru mu‑Meeresyo inguru ya Emisango Emikomeeye. Mbe, ku‑mwanya ogwo, nigwo abhasombookerwa bha jinjota okusooka ebhuwuruka esuubha, ꞉bhaakingire mu‑musi gwa Yerusareemu. Bhejire bhaakinga omwo, nibhabhuusya abhaanu ati, 2“Ari aaki omwana unu eebhurwa abhe omukama wa Abhayawudi? Echimenya ati eebhuuywe, kwa okubha, ꞉chaarorere injota ya echibharikisyo cha okwibhurwa kwaye omwanya gunu ꞉yaabhonekeene ebhuwuruka esuubha. Kurwa ejo, chaaja okumuramya.”
3Omukama Yeroode ejire oongwa emisango jeebhwe, ˆnaayaya muno. Noorwo abhaanu bhoone bha Yerusareemu, wone nibhayaya. 4Niwo Yeroode ˆnaakofya abhakuru bhoone bha abhagabhisi na abheeyigisya bha ebhiraagiro bhya Muusa,#2:4 Abhagabhisi na abheeyigisya bha ebhiraagiro bhya Muusa. Ku‑meeresyo amaafu, ringira mu‑Meeresyo inguru ya Emisango Emikomeeye. ˆnaabhabhuusya ati, “Kirisito kaja okwibhurirwa aaki?” 5Abheene nibhamusubhya ati, “Kaja okwibhurirwa mu‑musi gwa Bhetereyeemu mu‑mukoowa gwa Yuudeya. Echimenya ejo, kwa okubha Nyamuwanga ꞉aayikire kutyo, okutura mu‑bhikaame bhya omuragi waaye ati,
6‘Awe Bhetereyeemu mu‑chaaro cha Yuuda,
utari musi gwa okugaywa wuri agati ya abhatungi bha echaaro cha Yuuda.
Okubha omutungi omukuru okusooka kw‑awe aritangasya abhaanu bhaani Abhayisirayeeri,
rwa kutyo omureefi kaareebha jinaama jaaye.’#2:6 Ringira Miika 5:2.”
7Niwo Yeroode ˆnaabhirikira bhumbise abhasombookerwa bha jinjota bharya, korereki bhaaje bhamutondere kisi obhwambiro bhwa omwanya gunu ꞉bhaarorere injota irya. 8Neeya, ˆnaabhatuma Bhetereyeemu, ˆnaabhabhwira ati, “Mugende mutatirisye kisi, korereki mumenye anu omwana oyo ari. Mbe, mukamubhona muuje bhwangu mumbwire, korereki anye wone nigende okumuramya.”
9Abhasombookerwa bha jinjota abho, bhejire bhoongwa emisango ja omukama, nibhasooka awo. Awoawo, injota inu ꞉bhaarorere ebhuwuruka esuubha niibhonekana rindi, niibhatangatira, niimereeguru obhwima na anu omwana oyo aariga ari. 10Bhejire bhaarora injota eyo, nibhakonderwa muno. 11Mbe, nibheengira mu‑nju, nibharora omwana aamwi na Maryamu nyiramwene, nibheefukama nibharamya omwana oyo. Nibhasuruumura jisagwa jeebhwe, nibhasoosya‑mo ebhiyaanwa bhya inaaryo, obhubhaani na amafuta amarange, nibhayaana omwana oyo. 12Mbe, Nyamuwanga ejire aamara okubhakengya mu‑chirooto ati, bhaasiga okusubha rindi ku‑Yeroode, nibheemuka, nibhatura ku‑njira eyindi nibhasubha eweebhwe.
Yeesu na abheebhusi bhaaye abheerukira mu‑chaaro cha Miisiri
13Abhasombookerwa bha jinjota abho bhejire bhaasooka awo, awoawo maraayika wa Raatabhugenyi ˆnaasoromokera Jejefu mu‑chirooto, ˆnaamubhwira ati, “Iimuka! Gega omwana na nyiramwene, mwirukire mu‑chaaro cha Miisiri. Mubhe eyo, okukingira omwanya gunu niribhabhwira ati musubhe, kwa okubha Yeroode kaja okuyenja omwana oyo, korereki amwite.” 14Mbe, ingeta eyoeyo, Jejefu ˆneemuka, ˆnaagega mukaaye aamwi na omwana, nibheerukira mu‑chaaro cha Miisiri. 15Bhejire bhaakinga mu‑chaaro echo, nibhabha omwo, okukingira omwanya gunu Yeroode ꞉aafuuwe. Emisango ejo ꞉jaakorekeene kutyo, korereki gukuumire omusango gunu Raatabhugenyi ꞉aayikire ku‑njira ya omuragi waaye ati, “꞉Naabhirikiiye omwana waani okusooka Miisiri.”#2:15 Ringira Woseya 11:1.
Abhaana bha echirume bha Bhetereyeemu abheetwa
16Yeroode ejire aarora ati, abhasombookerwa bha jinjota bharya bhaamujiga, ˆnaabhiyirwa muno. Niwo ˆnaatuma abhasirikare bhaaye bhaje Bhetereyeemu aamwi na ku‑nguuyo ja yeeyi nagwo. ˆNaabharagirira ati, bheete abhaana bhoone bha echirume okwambira abha emiguuga ebhiri okusubha emwaro. ꞉Aakorere kutyo okwingana na omwanya gunu aariga abhwiriiywe na abhasombookerwa bha jinjota. 17Niwo nigukuumira omusango gunu ꞉gwayikirwe na omuragi Yeremiya ati,
18“Echiriro ꞉chaasookereeye mu‑musi gwa Raama,
echiriro na obhusurumbaaye bhwafu.
Rayeeri kaaririra abhaana bhaaye,
atakwenda okusiiriisibhwa,
kwa okubha abhaana bhaaye bhamaamire nyombe.”#2:18 Ringira Yeremiya 31:15.
Yeesu na abheebhusi bhaaye abhasubha okusooka mu‑chaaro cha Miisiri
19Yeroode ejire aafwa, maraayika wa Raatabhugenyi, ˆnaasoromokera Jejefu mu‑chirooto Miisiri eyo, 20ˆnaamubhwira ati, “Iimuka! Ugege omwana na nyiramwene, musubhe mu‑chaaro cha Yisirayeeri, kwa okubha abhaanu bhanu bhaariga nibheenda okwita omwana oyo, bhaafuuwe.” 21Mbe, Jejefu ˆneemuka, ˆnaagega mukaaye aamwi na omwana, nibhasubha mu‑chaaro cha Yisirayeeri. 22Nawe ejire oongwa ati, Arikeraawo omwana wa Yeroode aatungaga Yuudeya, Jejefu ˆnoobhaya okuja eyo. Nyamuwanga ˆnaamukengya mu‑chirooto ati, asige okusubha eyo. Kurwa ejo, nibheemuka, nibhagenda mu‑mukoowa gwa Gariraaya. 23Nibhaja mu‑musi gunu gwatogwaga ati Najareeti, nibheekara eyo. Niwo omusango ꞉gwakuumiiye gunu ꞉gwayikirwe inguru ya Yeesu ku‑njira ya abharagi ati, “Aritogwa Omunajareeti.”
Currently Selected:
Mataayo 2: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.