Exodus 24
24
De hagadonu o de hagatoo donu hagaheloongoi
1Gai Tagi Maolunga ne hai ange gi Moses, “Goodou ma Aaron, ma Nadab, ma Abihu, aama denga dagi o de gau Israel e dinohidu gi kage age gi ogu daha. Gai goodou ga daumaha i de mommee mmao, 2aagai go Moses donu huu e humai gi baa mai gi Tagi Maolunga; gai de gau ange laa e dee loomai gi paa mai. Gai de huaadangada e dee loomai hogi madali ia.”
3Gai Moses ne humai ga tala ange gi de huaadangada muna alodahi a Tagi Maolunga ma mee alodahi gu hagamodu. Gai dangada ga pasa ange i de leo e dahi, ga hai ange, “Gimaadeu e hai donu gi bei muna alodahi a Tagi Maolunga gu tala adu gi de goe.” 4Gai Moses ga sisi ga daohi muna alodahi a Tagi Maolunga.
Taiao age gai Moses ga bae de mommee o ssigidaumaha i gaogao de mounga aama de hagatuu age e madaangahulu ma lua duludulu hadu, go taelodo o denga aamuli o Israel e dinoangahulu ma dogolua. 5Gai ia ga hai hanu dama daane mai i de gau Israel gi haia ssigidaumaha dudu, aama ssigidaumaha hagadanuaa magavaa i hanu kaau daane ange gi Tagi Maolunga. 6Gai Moses ga hagasahu ange dahi luu baasi o dodo laa gi lodo beisini, gai dahi luu baasi gai ia ga dabudabui ange gi honga de mommee o ssigidaumaha. 7Gai ia ga kave de beebaa e sisi ai laa de hagatoo donu hagaheloongoi ga dau ange muna e sisi ai gi dangada. Gai gilaadeu ga hai ange, “Gimaadeu e daudali naa donu i muna alodahi a Tagi Maolunga gu tala.”
8Gai Moses ga kave denga dodo ga dabudabui ange gi honga o dangada, ga hai ange gi gilaadeu, “Aanei dodo o de hagatoo donu hagaheloongoi a Tagi Maolunga ne hai madali goodou, bei dagodo o muna nei alodahi.” #Mat 26.28; Mark 14.24; Luke 22.20; 1 Co 11.25; Heb 9.19-20; 10.29
9Dua mee laa gai Moses ma Aaron, ma Nadab, ma Abihu, aama dagi o de gau Israel e dinohidu ga loage gi de mounga, 10gai gilaadeu ne gidee de Maadua o Israel: de mommee i lalo luoono vae e bei dagodo o de mommee e hai i sapphire,#24.10 sapphire se hadu hagamogomogo e blue bei lo te langi i lunga. gai e masalaba bei dagodo o lo te langi i lunga. 11Aagai de Maadua tee hagaduasala donu denga dagi aamua o de gau Israel, e dee galemu donu gilaadeu ne gidee de Maadua. Muli mai gai gilaadeu ne gaimee ma de unu i kilaa.
12Gai Tagi Maolunga ga hai ange gi Moses, “Gage age humai gi ogu daha i honga de mounga ma gi noho ai, gai au ga gaavadu gi de goe luu duu hadu e sisi ai hainga ma muna aagu gu lava i de sisi e agoagona ange ai gilaadeu.”
13Gai Moses ma Joshua, dono dangada bale ne loage gi de mounga, gai go Moses donu huu ne hanage ga dae gi ulu de mounga o de Maadua. 14Gai ia ne hai ange gi denga dagi, “Goodou daalia gimaau i kinei ga dae ai gi demaau aahe mai. Gai Aaron ma Hur e nnoho i oodou daha; be goai naa huu e hanu alaadeu mee e dee heloongoi ai, gai gilaadeu gi loomai gi olaau daha.”
15Gai Moses ga hanage gi de mounga, gai de hagausinga ga haoli de mounga laa. 16Gai de mahamaha o Tagi Maolunga gu hano iho ga haoli de mounga go Sinai i e ono laangi. Aagai de hidu laangi huu gai ia ga hagahi mai Moses i lo te hagausinga laa. 17Gai de gau Israel ne gidee de mahamaha o Tagi Maolunga bei dagodo o de ahi ula i ulu de mounga. 18Gai Moses ne hanage i de mounga ga ulu gi lo te hagausinga laa, ga noho i kilaa i e madahaa laangi ma boo.#Deut 9.9
දැනට තෝරාගෙන ඇත:
Exodus 24: DBD
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2022, Wycliffe Bible Translators, Inc. All rights reserved.