සෙකරියා 8:1-8

සෙකරියා 8:1-8 SCV

සේනාංකවල ස්වාමින්වහන්සේගේ වචනය යළිත් පැමිණියේ ය. සේනාංකවල ස්වාමින්වහන්සේ මෙසේ පවසන සේක: “සියොන උදෙසා මම මහත් වූ ඊර්ෂ්‍යාවකින් ඊර්ෂ්‍යා වන්නෙමි. ඇය උදෙසා වූ ඉමහත් උදහසකින් මම ඊර්ෂ්‍යා කරන්නෙමි.” ස්වාමින්වහන්සේ මෙසේ පවසන සේක: “මම සියොන වෙත ආපහු හැරී එන්නෙමි. අවුත්, යෙරුසලමෙහි වාසය කරන්නෙමි. එවිට යෙරුසලම විශ්වාසවන්ත පුරවරය නමින් හැඳින්වෙනු ඇත. සේනාංකවල ස්වාමින්වහන්සේගේ කන්ද, ශුද්ධ කන්ද නමින් හැඳින්වෙනු ඇත.” සේනාංකවල ස්වාමින්වහන්සේ මෙසේ පවසන සේක: “නැවත වරක් හොඳ මහලු වයසේ වූ ගැහැණු-පිරිමි, වැඩිහිටි අය ඔවුන්ගේ වයෝවෘද්ධ භාවය නිසා සැරයටියක් ද අතැතිව යෙරුසලමේ වීදිවල වාඩිවනු ඇත. කෙළි සෙල්ලම් කරන දරු දැරියන්ගෙන් එපුර වීදි පිරී යනු ඇත.” සේනාංකවල ස්වාමින්වහන්සේ මෙසේ පවසන සේක: “එකල මේ ජනයාගෙන් ඉතිරි ස්වල්ප දෙනාට එය අරුමයක් සේ පෙනී ගිය හැකි ය. එහෙත් මට එය අරුමයක් වේ දැ?” යි සේනාංකවල ස්වාමින්වහන්සේ ප්‍රකාශ කරන සේක. සේනාංකවල ස්වාමින්වහන්සේ මෙසේ කියන සේක: “නැගෙනහිර හා බටහිර රටවලින් මගේ ජනයා මම මුදා ගන්නෙමි. යෙරුසලමෙහි වාසය කරන පිණිස, මම ඔවුන් ආපසු ගෙනෙන්නෙමි. ඔවුහු මගේ ජනයා වන්නෝ ය. විශ්වාසවන්තකමින් හා දමිටුකමින් මම ඔවුන්ගේ දෙවියන්වහන්සේ වන්නෙමි.”

මෙයට අදාළ වීඩියෝ

සෙකරියා 8:1-8 සම්බන්ධව නිදහස් කියවීමේ සැලසුම් සහ පූජනීයත්වය