ගීතාවලිය 109:1-31

අහෝ මා ප්‍රශංසා කරන දෙවියන්වහන්ස, නිහඬ ව නො සිටිය මැනව. මන්ද, දුෂ්ට වූ ද රැවටිලිකාරවූ ද මිනිසුන් මට එරෙහිව, ඔවුන්ගේ මුව විවර කර, මට එරෙහිව, මුසා පවසා ඇත. ඔවුහු ද්වේෂ සහගත වදනින් මා වට කොට, අහේතුක ව මට පහර දෙති. මගේ මිත්‍රත්වය වෙනුවට ඔවුහු මට වරද පවරති; එහෙත් මම යාච්ඤාවේ මනුෂ්‍යයෙක්මි. කළ හොඳට ඔවුන් මට සලකන්නේ නො හොඳිනි; මා ආදරය පාද්දී ඔවුහු මට වෛර කරති. ඔහුට එරෙහි වීමට දුෂ්ට මිනිසකු පත් කරන්න; ඔහුට චෝදනාකරන්නකු ඔහුගේ දකුණු පසින් නැගී සිටීවා! විනිශ්චයේදී ඔහු වරදකරු වශයෙන් තීන්දු කෙරේවා; ඔහුගේ ආයාචනය ද ඔහු දඬුවමට පත් කෙරේවා! ඔහුගේ ජීවිත කාලය අල්ප වේවා; ඔහුගේ තනතුරට වෙනකකු පත් වෙත්වා! ඔහුගේ දරුවන් පියා නැති අනාථයින් ද ඔහුගේ බිරිඳ වැන්දඹුවක ද වේවා! ඔහුගේ දරුවෝ සිඟමින්, ඉබාගාතෙ යත්වා; ගරා වැටුණු ඔවුන්ගේ ගෙවලින් ඔවුහු පන්නා දමනු ලබත්වා! ණය හිමියා ඔහු සන්තක සියල්ල අත්කර ගනීවා; දුක් මහන්සියෙන් ඔහු උපයා ගත් දෑ විදෙස්සෝ පැහැර ගනිත්වා! කිසිවෙක් හෝ ඔහුට කරුණාව නො දක්වත්වා; කිසිවෙක් හෝ ඔහුගේ අනාථ දරුවනට අනුකම්පා නො කරත්වා! ඔහුගෙන් පැවත එන්නෝ සිඳ දමනු ලබත්වා; ඔවුන්ගේ නාම ඊළඟ පරම්පරාවේදී ම මකා දමනු ලැබේවා! ඔහුගේ පියවරුන්ගේ අයුතුකම්, ස්වාමින්වහන්සේ ඉදිරියේ සිහි කරනු ලැබේවා; ඔහුගේ මවගේ පාපය, කිසි කල නො මැකේවා! ඔවුන් පිළිබඳ මතකය, පොළෝ තලයෙන් සිඳ දමන පිණිස, ඔවුන්ගේ පාප, ස්වාමින්වහන්සේ ඉදිරියේ සදා පවතීවා! මන්ද, කිසි කල කරුණාවක් දක්වන්නට සිතුවේවත් නැති ඔහු, දුගියන් ද දුප්පතුන් ද බිඳුණු සිතැත්තන් ද මැරෙන තුරා ඔවුන් දඩයම් කළේ ය. ශාප කරන්නට ඔහු ඇලුම් කළේ ය; ශාපය ඔහු පිටට පැමිණේවා! ආශිර්වාද කරන්නට ඔහු මනාප නො වී ය; ආශිර්වාද ඔහුගෙන් දුරින් දුරු වේවා! ඔහු තම වස්ත්‍රය මෙන් ශාප කිරීම හැඳ සිටී; ජලය මෙන් ඔහුගේ සිරුර තුළට ද තෙල් මෙන් ඔහුගේ ඇට මිදුලු තුළට ද එය උරා ගනී. එය, ඔහු ඇඟ දවටා සිටින කබායක් මෙන් ද ඔහු බැඳ සිටින ඉඟ පටියක් මෙන් ද සදහට ම ඔහු වටා පවතීවා! මට චෝදනාකරන්නන්ටත්, මා ගැන නපුර කතාකරන්නන්ටත් ස්වාමින්වහන්සේගෙන් ලැබෙන ගෙවීම එය වේවා! එහෙත් ඔබ, අහෝ පරමාධිපති ස්වාමින්වහන්ස, මා සම්බන්ධ ව ඔබගේ නාමයේ ගෞරවයෙන් ක්‍රියා කළ මැනව; ඔබගේ නොමියෙන ප්‍රේමයේ යහ ගුණයෙන් මා මුදනු මැනවි. මන්ද මම දුප්පතෙක්මි. දිළින්දෙක්මි; මගේ හදවත වේදනාවෙන් පෙළෙයි. මැකීයන, සැඳෑ සෙවණැල්ල සේ මම පහව යමින් සිටිමි; පළඟැටියකු සේ මම ඉවත ගසා දමනු ලැබ සිටිමි. නිරාහාර ව සිටීමෙන් මගේ දණහිස් බෙලහීන ව ඇත; මගේ සිරුර වැහැරී, කෘශ ව ගොසිනි. මට චෝදනාකරන්නන්ට මා සමච්චලයට හේතුවකි; ඔවුහු මා දකින කල තමන්ගේ හිස් වන වනා යති. මට උපකාර කළ මැනව, අහෝ ස්වාමින්වහන්ස, මගේ දෙවියන්වහන්ස, ඔබගේ නොමියෙන ප්‍රේමයට අනුකූලව මා ගැලෙවුව මැනවි. තවද, එය කළේ ඔබ, ඔබේ ම හස්තයෙන් වග අහෝ ස්වාමින්වහන්ස, එය ඔබ ම කළ දෙයක් වග ඔවුන්ට දැනගන්නට සැලසුව මැනව. ඔවුහු ශාප කරත්දෙන්; එහෙත් ඔබ ආශිර්වාද කරන සේක; ඔවුන් මට පහර දෙන කල ලජ්ජාවට පත් කරනු ලබති. එහෙත් ඔබගේ සේවක මම ප්‍රීතිමත් වන්නෙමි. මට චෝදනාකරන්නෝ නින්දාවෙන් හඳවනු ලැබ, ලජ්ජාවේ කබායෙන් දවටනු ලබන්නෝ ය. මගේ මුවින් මම ස්වාමින්වහන්සේට මහත් සේ ප්‍රශංසා කරන්නෙමි. මහා ජන සමූහයා මැද මම, උන්වහන්සේට ප්‍රශංසා කරන්නෙමි. මන්ද දිළිඳාට මරණ දඬුවම දෙන්නන්ගෙන් ඔහු ගලවා ගනු පිණිස උන්වහන්සේ දිළිඳාගේ දකුණු පසින් සිටගන්නා සේක.