යෝනා 3:3-10

එවිට යෝනා නැගිට, ස්වාමින්වහන්සේගේ වචනයට අනුව, නිනිවය වෙත ගියේ ය. නිනිවය මහ විශාල පුරවරයක් විය. තුන් දවසක ගමන් දුරකින් යුක්ත ය. යෝනා එක්-දින ගමනක යෙදෙමින් පුරය මැදට ගමන් ඇරඹී ය. “තව හතළිස් දවසකින් නිනිවය බිඳ හෙළනු ලැබේ” යි ඔහු මොර ගසා ප්‍රකාශ කළේ ය. නිනිව වාසීහු දෙවියන්වහන්සේ විශ්වාස කළහ. ඔවුහු උපවාසයක් ප්‍රකාශයට පත් කොට, උත්තමයාගේ පටන් පහත් ම අය දක්වා සැවොම ගෝණි රෙදි හැඳ ගත්හ. නිනිවයේ රජුට මෙම පුවත සැල වූ කල, ඔහු තම සිහසුනෙන් නැගිට, රජ ඇඳුම් පසෙක ලා, ගෝණි රෙදි දවටාගෙන, අළු මත හිඳ ගත්තේ ය. තවද ඔහු නිනිවයෙහි ප්‍රසිද්ධ ප්‍රකාශයක් නිකුත් කළේ ය: “රජුගේ ද ඔහුගේ වංශාධිපතීන්ගේ ද නියමය පරිදි මෙසේ දැන්වී ය: “යම් මිනිසෙක්, සතෙක් හෝ ගව-එළු බැටළු කිසිවකු කිසිවක් හෝ රස නො බලත්වා! කිසිවක් කෑමට හෝ බීමට හෝ නො ගනිත්වා! මිනිසා මෙන් ම සත්වයා ද ගෝණි රෙදි දවටා ගනිත්වා! හැම කෙනෙක් ම ඉතා ඕනෑකමින් දෙවියන්වහන්සේට කන්නලව් කරත්වා! ඔවුහු තමන්ගේ දුෂ්ට මාර්ග ද ප්‍රචණ්ඩකම් ද අත්හරිත්වා! කවුරු දනිත් ද? අප විනාශ නො වන පිණිස, දෙවියන්වහන්සේ ඇතැම් විට සිත වෙනස් කර ගෙන, ලිහිල පා, තම රුදුරු කෝපය අස්කර ගනු ඇත.” එවිට ඔවුන් ක්‍රියා කළ අයුරු ද ඔවුන් තම දුෂ්ට මාර්ගවලින් ඉවත හැරුණු අයුරු ද දෙවියන්වහන්සේ දුටු සේක්, තම සිත වෙනස් කර ගෙන, ඔවුන්ට එරෙහිව ප්‍රකාශ කොට තිබූ විපත්තිය, ඔවුන් පිටට නො පැමිණ වූ සේක.