යෝබ් 36:15-23

එහෙත් උන්වහන්සේ පීඩා විඳින්නවුන් ඔවුන්ගේ පීඩාවෙන් මුදනා සේක. ඔවුන්ගේ ආපදා අතරින් උන්වහන්සේ ඔවුනට කතා කරන සේක. “උන්වහන්සේ විපත්තිය වෙතින්, සීමා-බාධක නැති පුළුල් තැනකට ඔබ මුදා ගෙන ගොස්, අගනා භෝජන පුරවා ඔබේ මේසය අතුරන සේක. එහෙත් දැන් දුෂ්ටයින්ට නියමිත සම්පූර්ණ දඬුවම ඔබ පිට පැටවී ඇත; විනිශ්චය හා දඬුවම විසින් ඔබ ග්‍රහණයට ගෙන ඇත. ධන සම්පතින් කිසිවකුත් ඔබ නො පොලඹවන ලෙසට පරෙස්සම් වන්න; ලොකු අල්ලසකින් ඔබ ඉවත හරවන්නට ඉඩ නො දෙන්න. ඔබගේ ධනය හෝ ඔබගේ සියලු ප්‍රබල ක්‍රියාකාරකම්, විපත්තියෙන් ඔබ ඈත්කර තැබීමට සමත් වේ ද? ජනයා තම නිවෙස්වලින් අතුරුදහන් වන රාත්‍රියට ආශා නො වන්න. නපුරට නො හැරෙන්නට වග බලා ගන්න; මන්ද පීඩාවට වඩා ඔබ එයට මනාප වග පෙනේ. “බලන්න! දෙවියන්වහන්සේ ස්වකීය බලයෙන් උත්කෘෂ්ට ව සිටින සේක; උන්වහන්සේ හා සමාන ගුරුවරයා කවුරු ද? උන්වහන්සේගේ මාර්ග උන්වහන්සේට නියම කළේ කවුරුන් ද? ‘ඔබ වරදක් කර ඇතැ’ යි උන්වහන්සේට කිව හැක්කේ කවරකුට ද?