යෙරමියා 29:1-23

නෙබුකද්නෙසර් විසින් යෙරුසලමේ සිට බබිලෝනිය වෙත වාලට ගෙන යන ලදුව, පිටුවහලුන් අතරේ ජීවත් ව සිටින වැඩිහිටියන්, පූජකයින්, දිවැසිවරුන් හා සෙසු සියලු ජනයා වෙත දිවැසිවර යෙරමියා යෙරුසලමේ සිට යැවූ ලිපියේ වූ වදන් මෙසේ ය; එය යැවුවේ, යෙකොනියා රජු ද මවු බිසොව ද රාජ්‍ය නිලධාරීන් ද යූදාහි හා යෙරුසලමෙහි ප්‍රධානීන් ද කර්මාන්ත ශිල්පීන් හා ආචාරීන් ද යෙරුසලමෙන් පිට මං වූ පසුව ය. ඔහු එම ලිපිය යැව්වේ, යූදාහි රජු වූ සෙදෙකියා විසින් බබිලෝනියේ නෙබුකද්නෙසර් රජු වෙත යවන ලද්දන් වන ෂාෆාන්ගේ පුත් එලෙයාසා හා හිල්කීයාගේ පුත් ගෙමරියා බාරයේ ය. ඉන් මෙසේ කියැවිණ: යෙරුසලමේ සිට බබිලෝනියට මා විසින් පිටුවහල් කරන ලද සියල්ලන් හට ඉශ්‍රායෙල්ගේ දෙවියන්වහන්සේ වන සේනාංකවල ස්වාමින්වහන්සේ මෙසේ පවසන සේක: “නිවෙස් තනා, ඒවායේ පදිංචි වන්න. වතු පිටි වවා, ඒවායේ පලදාව කන්න. අඹුවන් ගෙන, දූ පුතුන් උපද්ද වන්න. ඔබේ පුතුනට අඹුවන් ආවාහ කොට ගෙන, ඔබේ දූවරුන් සැමියනට විවාහ කොට දී, ඔවුනටත් දූ පුතුන් උපදින්නට සලස්වන්න. මෙසේ එහිදී ගණනින් වැඩි වර්ධන වන්න; අඩු නො වන්න. මා විසින් ඔබ පිටුවහල් කරන ලද පුරවරයේ සුබ සිද්ධිය ද සොයන්න. එය උදෙසා ස්වාමින්වහන්සේට යාච්ඤා කරන්න. මන්ද එහි සෞභාග්‍යය, ඔබගේ සෞභාග්‍යය වේ.” ඉශ්‍රායෙල්ගේ දෙවියන්වහන්සේ වන සේනාංකවල ස්වාමින්වහන්සේ මෙසේ කියන සේක: “ඔබ අතරේ සිටින දිවැසිවරුන්ට හා පේන කියන්නන්ට ඔබ රවටන්නට ඉඩ නො දෙන්න. ඔබ ඔවුන්ට දකින්නට සලසන සිහිනවලට සවන් නො දෙන්න. ඔවුහු මගේ නාමයෙන් බොරු අනාවැකි පවසති. මම ඔවුන් නො යැවීමි” යි ස්වාමින්වහන්සේ ප්‍රකාශ කරන සේක. ස්වාමින්වහන්සේ මෙසේ කියන සේක: “බබිලෝනිය සඳහා සැත්තෑ වසර සම්පූර්ණ වූ කල, මම නුඹලා සොයා බලා, මේ ස්ථානයට නුඹලා ආපසු ගෙන ඒමේ මගේ පොරොන්දුව, ඉෂ්ට කරන්නෙමි. මන්ද ඔබ උදෙසා මා වෙත ඇති සැලසුම් මම දනිමි” යි ස්වාමින්වහන්සේ ප්‍රකාශ කරන සේක. “ඒවා සමෘද්ධියේ සැලසුම් ය. ඔබට හානිදායක ඒවා නො වේ. ඔබට අනාගතයක් හා අපේක්ෂාවක් දීමේ සැලසුම් ය. එවිට ඔබ මට අයැදිනු ඇත. මා වෙත අවුත්, මට යාච්ඤා කරනු ඇත. මමත් ඔබට ඇහුම්කන් දෙන්නෙමි. ඔබ මා සොයනු ඇත; ඔබගේ මුළු හදින් ම ඔබ මා සොයන කල, ඔබට මා හමු වනු ඇත. ඔබ විසින් මා සොයා ගනු ලබනු ඇතැ” යි ස්වාමින්වහන්සේ ප්‍රකාශ කරන සේක. “ඔබගේ භාග්‍යය මම යළි ස්ථාපිත කරන්නෙමි. මා විසින් පලවා හරින ලද සියලු ජාතීන් වෙතින් හා සියලු ස්ථාන වෙතින් මම ඔබ එක් රැස් කරන්නෙමි. පිටුවහල් කොට මා විසින් ඔබ යවනු ලැබුවේ කොතැනක සිට ද එතැනට ම මම ඔබ ආපසු ගෙනෙන්නෙමි” යි ස්වාමින්වහන්සේ ප්‍රකාශ කරන සේක. “ස්වාමින්වහන්සේ අපට බබිලෝනියේදී දිවැසිවරුන් නැගිටුවා දුන් සේකැ” යි ඔබ කියනු ඇත. එහෙත් දාවිත්ගේ සිහසුනෙහි හිඳින රජු ගැන ද පිටුවහල් කොට ගෙන යනු නො ලැබූ ඔබේ රට වැසියන් වන මෙම පුරවරයෙහි නැවතී සිටින සියලු ජනයා ගැන ද ස්වාමින්වහන්සේ මෙසේ පවසන සේක: එසේය, සේනාංකවල ස්වාමින්වහන්සේ මෙසේ පවසන සේක: “මම කඩුව ද සාගතය ද වසංගතය ද ඔවුන්ට එරෙහිව මුදා හරින්නෙමි. එසේ ඔවුන් කන්නට බැරි තරම් නරක් වූ කුණු අත්තික්කා මෙන් වන්නට සලස්සමි. මම කඩුව ද සාගතය ද වසංගතය ද ගෙන, ඔවුන් ලුහුබඳිමි. පොළොවේ සියලු රාජ්‍යයන් අතරේ ඔවුන් භීතියක් වන්නට සලස්සමි. මා විසින් ඔවුන් පලවා හරින ලද සියලු ජාතීන් අතරේ ඔවුන් ශාපයට හා භීතියට හේතුවක් ද අවමානයට හා නින්දාවට හේතුවක් ද වන්නට සලස්වමි. මන්ද මගේ වචනයට, මගේ සේවක දිවැසිවරුන් අත නැවත, නැවතත් ඔවුන් වෙත මා යැවූ වචනයට, ඔවුන් සවන් දුන්නේ නැතැ” යි ස්වාමින්වහන්සේ ප්‍රකාශ කරන සේක. “නුඹලාත් මට සවන් දුන්නේ නැතැ” යි ස්වාමින්වහන්සේ ප්‍රකාශ කරන සේක. එබැවින්, යෙරුසලමේ සිට බබිලෝනියට මා විසින් පලවා හරිනු ලැබූ පිටුවහල් ව සිටින සියල්ලෙනි, ස්වාමින්වහන්සේගේ වචනය අසනු! මගේ නාමයෙන් නුඹලාට බොරු අනාවැකි පවසන කෝලායාගේ පුත් ආහාබ් ගැනත්, මාසේයාගේ පුත් සෙදෙකියා ගැනත් ඉශ්‍රායෙල්ගේ දෙවියන්වහන්සේ වන සේනාංකවල ස්වාමින්වහන්සේ මෙසේ පවසන සේක: “ඔන්න! බබිලෝනියේ රජු වූ නෙබුකද්නෙසර් අතට මම ඔවුන් හසුකර දෙන්නෙමි. නුඹලාගේ ඇස් පනා පිටදී ම ඔහු ඔවුන් ගසා හෙළනු ඇත. ඔවුන් හේතු කොට මෙම ශාප කියමන, බබිලෝනියේ සිටින යූදා පිටුවහලුන් හැම දෙනා විසින් භාවිත කරනු ඇත. එනම්, ‘බබිලෝනි රජු විසින් ගින්නෙන් පුළුස්සා දැමූ සෙදෙකියාට හා ආහාබ්ට මෙන්, ස්වාමින්වහන්සේ ඔබටත් කරන සේක්වා’ යනුවෙනි. මන්ද ඔවුන් ඉශ්‍රායෙල්හි දුෂ්ටකම් කර ඇත. ඔවුහු තම අසල්වාසීන්ගේ අඹුවන් සමඟ පරදාර සේවනයේ ගැලුනාහු, මා ඔවුනට අණ නො කළ දෑ ගැන මගේ නාමයෙන් බොරු කීවාහු ය. ඒ වග දන්නේ මා ය. මම සාක්ෂි දරමි” යි ස්වාමින්වහන්සේ ප්‍රකාශ කරන සේක.