උත්පත්ති 39:1-10

මේ අතර, යෝසෙප් ඊජිප්තුවට ගෙන යනු ලැබී ය. එහි ඔහු ගෙන ගිය ඉෂ්මායෙල්වරුන් වෙතින් ඔහු මිලයට ගන්නා ලද්දේ, පාරාවෝ රජුගේ නිලධාරියකු වූ ඊජිප්තියානු ආරක්ෂක සෙන්පති පොතිෆර් විසිනි. ස්වාමින්වහන්සේ යෝසෙප් සමඟ වූ සේක. එබැවින් ඔහු සඵල විය. ඊජිප්තියානු තම ස්වාමියාගේ නිවසේ ඔහු වාසය කළේ ය. ස්වාමින්වහන්සේ ඔහු සමඟ වූ වගත්, ඔහු කළ හැම දෙයකදී ම ස්වාමින්වහන්සේ ඔහු සඵල කළ වගත් ඔහුගේ ස්වාමියා දුටුවේ ය. එබැවින් යෝසෙප් ඔහුගේ ප්‍රසාදය දිනා, ඔහුගේ පුද්ගලික සේවකයා බවට පත් විය. පොතිෆර් තම නිවසේ කළමනාකාරිත්වය හා තමා සතු සියල්ලේ භාරකාරත්වය ඔහුට පැවරී ය. ඔහු තම නිවසේත්, තමා සතු සියල්ලේත් කළමනාකාරිත්වය යෝසෙප්ට පැවරූ කාලයේ පටන්, යෝසෙප් නිසා ස්වාමින්වහන්සේ ඊජිප්තු ජාතිකයාගේ නිවසට ආශිර්වාද කළ සේක. ඔහුගේ නිවස තුළත්, ඔහුගේ වතු පිටිවලත් ස්වාමින්වහන්සේගේ ආශිර්වාදය විය. මෙසේ ඔහු තමා සතු ව තිබූ හැම දෙයක් ම යෝසෙප්ට බාර කළේ ය. ඒවා ඔහුගේ බාරයේ වූ බැවින්, තමාගේ ආහාර පාන ගැන මිස, අන් කිසිවක් ගැන ඔහු සොයා බැලුවේ නැත. මේ වන විට යෝසෙප්, රූපසම්පන්න, කඩවසම් පෙනුමින් යුතු කෙනෙක් විය. මද කලකින් යෝසෙප් වෙත ආශා දෑස යොමන්නට වූ ඔහුගේ ස්වාමියාගේ බිරිඳ, “මා හා යහනට එන්නැ” යි ඔහුට කතා කළා ය. එහෙත් එය ප්‍රතික්ෂේප කළ ඔහු, තම ස්වාමියාගේ බිරිඳ අමතමින්, “මගේ බාරයේ තිබෙන නිසා, මේ නිවසේ කිසි දෙයක් ගැන සොයා බලන්නට මගේ ස්වාමියා කරදර නො වෙයි. තමා සන්තක හැම දේ ම, ඔහු මගේ බාරයට පවරා තිබේ. මේ නිවස තුළදී මට වඩා උසස් කෙනෙක් නැහැ. ඔබ ඔහුගේ බිරිඳ බැවින්, ඔබ හැරුනු කොට මගේ ස්වාමියා අන් කිසිවක් මගෙන් වළක්වා නැත. එසේ නම්, මා මෙවැනි මහා දුෂ්ටකමක් කොට දෙවියන්වහන්සේට එරෙහිව පව් කරන්නේ කෙසේ දැ?” යි කීවේ ය. දවසින් දවස ඇය යෝසෙප්ට කතා කළ ද, ඇය හා යහන් වදින්නට හෝ ඇය ළඟ සිටීමට ඔහු ඇයට සවන් දුන්නේ නැත.