උත්පත්ති 18:9-12

“කෝ ඔබේ බිරිඳ සාරා කොහේ දැ?” යි ඔවුහු ඔහුගෙන් ඇසූහ. “ඇය කූඩාරමේ යැ” යි ඔහු පිළිතුරු දුන්නේ ය. එවිට, ආගන්තුකයාණෝ, “ලබන වසරේ මේ කාලයට මම නියතයෙන් ම යළි එන්නෙමි. එකල ඔබේ බිරිඳ සාරා, පුතකු ලබනු ඇතැ” යි පැවසූහ. එතුමාණන්ට පිටුපසින් වූ කූඩාරම් දොරකඩ හුන් සාරා එය අසාගෙන සිටියා ය. ආබ්‍රහම් මෙන් ම සාරා ද මේ වන විට සිටියේ වයස්ගත ව, හොඳට ම මහලු ව ය. ස්ත්‍රීන් පිළිබඳ නියමය සාරාට නැවතී තිබිණි. එබැවින් සාරා තමන් සිත තුළ, “මා මවක වන කාලය පසු කර, මගේ ස්වාමියා ද මහල්ලකු ව සිටියදී, දැන් මම දරුවකු ලැබීමේ ප්‍රීතිය ලබම් දැ?” යි කියා ගනිමින් සිනාසුණා ය.