ඉශ්රායෙල් ප්රජා මූලිකයින් ඇතැම් දෙනෙක් මා වෙත අවුත්, මා ඉදිරිපිට හිඳ ගත්හ. එවිට, ස්වාමින්වහන්සේගේ වචනය මා වෙත පැමිණියේ ය: “මනුෂ්ය පුත්රය, මේ මිනිස්සු තමන්ගේ හදවත්වල තම දේව රූප පිහිටුවා ගෙන, තමන් ඉදිරියෙහි දුෂ්ටකමට පමුණු වන බාධකයක් පනවා ගත්හ. මගෙන් විචාරන්නට මා ඔවුන්ට කොහෙත් ම ඉඩ දිය යුතු ද? එබැවින් ඔවුන්ට කතා කොට මෙසේ කියන්න: ‘පරමාධිපති ස්වාමින්වහන්සේ මෙසේ පවසන සේක: ඉශ්රායෙල් වංශික යම් මිනිසෙක් තම හදෙහි තම දේව රූප පිහිටුවා ගෙන, තමන් ඉදිරියෙහි දුෂ්ටකමට පමුණු වන බාධකයක් පනවා ගෙන, ඉන්පසු දිවැසිවරයා වෙත පැමිණියහොත්, ඔහුගේ පිළිම රාශියේ හැටියට ස්වාමින්වහන්සේ වන මම ඔහුට පිළිතුරු දෙන්නෙමි. එසේ කරන්නේ, තම දේව පිළිම සියල්ල නිසා, මා අත්හැර ගිය ඉශ්රායෙල් ජනයාගේ හදවත් යළි හරවා ගන්නා පිණිස ය.’
“එබැවින් ඉශ්රායෙල් වංශයට මෙසේ කියන්න. ‘පරමාධිපති ස්වාමින්වහන්සේ මෙසේ කියන සේක: පසුතැවිලි වන්න; ඔබේ දේව පිළිම වෙතින් ඉවත හැරෙන්න. ඔබේ පිළිකුල් සහගත ක්රියා මාර්ග සියල්ල අත්හරින්න.
“ ‘යම් ඉශ්රායෙල් වංශිකයකු හෝ ඉශ්රායෙල්හි වාසය කරන විදේශිකයකු මගෙන් වෙන් ව තම හදෙහි දේව පිළිම පිහිටුවා ගෙන, තම මුහුණ ඉදිරිපිට දුෂ්ටකමට පමුණු වන බාධකයක් පනවා ගෙන, ඉන්පසු මගෙන් විචාරන පිණිස දිවැසිවරයා වෙත යන කල, ස්වාමින්වහන්සේ වන මම ම ඔහුට පිළිතුරු දෙන්නෙමි. මම ඒ මිනිසාට එරෙහිව මගේ මුහුණ යොමා, ඒ මිනිසා උපහැරණයක් ද උපදේශයක් ද වන්නට සලසමි. මගේ ජනතාව වෙතින් මම ඔහු සිඳ දමන්නෙමි. එවිට ස්වාමින්වහන්සේ මා වග නුඹලා දැනගන්නවා ඇත.
“ ‘දිවැසි වැකියෙන් පැවසීමට එම දිවැසිවරයා පොලඹවනු ලද්දේ නම්, එම දිවැසිවරයා පොලඹවන ලද්දේ ස්වාමින්වහන්සේ වන මා විසිනි. මම ඔහුට එරෙහිව මගේ හස්තය දිගු කොට මගේ ජනයා වන ඉශ්රායෙල් අතරින් ඔහු සිඳ දමන්නෙමි. ඔවුන්ගේ වරද ඔවුන් පිට ම වන්නේ ය. දිවැසිවරයා ද ඔහුගෙන් විචාරන්නා ද එක සේ වරදකරුවකු වන්නේ ය. එකල ඉශ්රායෙල් ජනතාව තවදුරටත් මවෙතින් ඈත් ව මංමුළා ව නො යනු ඇත. තම පාප සියල්ලෙන් ඔවුන් තවත් අපවිත්ර නො වනු ද ඇත. ඔවුහු මගේ ජනතාව වන්නෝ ය. මම ඔවුන්ගේ දෙවියන්වහන්සේ වන්නෙමියි පරමාධිපති ස්වාමින්වහන්සේ ප්රකාශ කරන සේක.’ ”
ස්වාමින්වහන්සේගේ වචනය මා වෙත පැමිණ කියනුයේ: “මනුෂ්ය පුත්රය, යම් රටක් අවිශ්වාසවන්තවීමෙන් මට එරෙහිව පව් කරන්නේ නම්, මම මගේ හස්තය ඊට එරෙහිව දිගු කොට, එහි ආහාර සැපයුම සිඳ දමන්නෙමි. සාගතය එහි යවා එහි මිනිසුන් ද ඔවුන්ගේ සතුන් ද මරා දමන්නෙමි. නෝවා, දානියෙල් හා යෝබ් යන තිදෙන එහි සිටින්නේ වුව ද තමන්ගේ දමිටුකමෙන් ඔවුන්ට ගලවාගත හැකි වන්නේ තමන්ගේ ම ජීවිත පමණකැයි පරමාධිපති ස්වාමින්වහන්සේ ප්රකාශ කරන සේක.
“නැතහොත්, මවිසින් රට මුළුල්ලෙහි වන මෘගයින් යවනු ලැබ, ඒ මෘගයින් නිසා කිසිවකුත් රට හරහා ගමන් කිරීමට නො හැකි වන සේ උන් එය ඔබේ දරුවන්ගෙන් තොර කෙරෙනු ඇත. එය පාළුවට යන කල, මෙම තුන් දෙනා රට තුළ සිටින්නේ වුව ද පරමාධිපති ස්වාමින්වහන්සේ වන මා ප්රකාශ කරන්නේ, මා ජීවත් වන වග සැබෑ සේ ම, තමන්ගේ දූ පුතුන් වුව ගලවා ගැනීමට ඔවුනට නො හැකි වග ය. ඔවුන් පමණක් ගැලවී යනු ඇත. දේශය පාළුවක් ම වන්නේ ය.
“එසේ නැතහොත්, එම රටට එරෙහිව මා අසිපතක් ගෙනැවිත්, ‘දේශය මුළුල්ලෙහි අසිපත යේවා’ යි පරමාධිපති ස්වාමින්වහන්සේ ප්රකාශ කර සිටින්නේ, මා ජීවත් වන වග සැබෑ සේ ම මෙම මිනිසුන් තුන් දෙනා රට තුළ සිටින්නේ වුව ද ඔවුන්ට තමන්ගේ ම දූ පුතුන් වුව ගලවා ගැනීමට නො හැකි වග ය. ඔවුන් පමණක් ගැලවී ගනු ඇත.
“එසේ ද නැතහොත්, මා ඒ දේශය තුළට වසංගතයක් එවා ලේ වැගිරීමකින් එරට මිනිසුන් ද ඔවුන්ගේ සතුන් ද මරා දමමින්, මගේ උදහස ඒ පිට වගුරු වන කල, නෝවා, දානියෙල් හා යෝබ් යන මිනිසුන් තිදෙනා එරට තුළ සිටින්නේ වුව ද පරමාධිපති ස්වාමින්වහන්සේ වන මා ප්රකාශ කර සිටින්නේ, මා ජීවත් වන වග සැබෑ සේ ම ඔවුන්ට පුතකුවත්, දුවකවත් ගලවාගත නො හැකි වන වග ය. තමන්ගේ දමිටුකමින් ඔවුන්ට තුමූම පමණක් ගැලවීගත හැකි වනු ඇත.
Bible App
Bible App for Kids
