එසකියෙල් 12
12
පිටුවහල් කරනු ලැබීම පිළිබඳ සලකුණ
1යළි, ස්වාමින්වහන්සේගේ වචනය මා වෙත පැමිණ, කියනුයේ, 2“මනුෂ්‍ය පුත්‍රය, ඔබ වාසය කරන්නේ කැරලිකාරී ජනතාවක් අතරේ ය. බලන්නට ඔවුන්ට ඇස් ඇතත්, ඔවුන් බලන්නේ නැත. අසන්නට ඔවුන්ට කන් ඇතත් ඔවුන් අසන්නේ නැත. මන්ද ඔවුහු කැරලිකාරී වංශයකි.
3“එබැවින් මනුෂ්‍ය පුත්‍රය, ඔවුන් බලා සිටියදී, පිටුවහල් ව යෑමට ඔබේ බඩු මුට්ටු පොදි බඳින්න. ඔවුන් බලා සිටියදී, ඔබ දැන් සිටින තැනින් පිටත් වී, වෙනත් තැනකට යන්න. කැරලිකාරී වංශයක් වුව ද ඇතැම් විට ඔවුන් වටහා ගනු ඇත. 4පිටුවහල් වීමට පොදි බැඳගත් ඔබේ බඩු බාහිරාදිය, දහවල් කාලයේ ඔවුන් බලා සිටියදී ගන්න. පසුව සවස් වේලෙහි ඔවුන්ගේ ඇස් හමුවේ පිටුවහල් ව යන්නකු සේ පිටත් වී යන්න. 5ඔවුන් බලා සිටියදී, බිත්තිය හාරා, ඔබේ බඩු මුට්ටු එතුළින් පිටතට ගන්න. 6ඔවුන් බලා සිටියදී ම ඒවා කරට ගෙන, ගොම්මන් අඳුරේදී ඒවා රැගෙන යන්න. දේශය නො පෙනෙන ලෙස ඔබේ මුහුණ වසා ගන්න. මන්ද, ඉශ්‍රායෙල් වංශයට මම ඔබ ලකුණක් කොට තැබුවෙමි” යි යනුවෙනි.
7මම අණ ලද පරිදි ම කළෙමි. පිටුවහල් කරනු ලැබීමට පොදි බැඳි මගේ බඩු, මම දහවලේදී පිටතට ගත්තෙමි. ඉන්පසු සවස මගේ ම අත්වලින් බිත්තිය හෑරුවෙමි. ඔවුන් බලා සිටියදී, ගොම්මන් අඳුරු වේලේ මම මගේ බඩු පිටතට ගෙන, මගේ කර පිට තබාගෙන ගියෙමි.
8 ස්වාමින්වහන්සේගේ වචනය උදෑසන මා වෙත පැමිණියේ ය: 9“මනුෂ්‍ය පුත්‍රය, ඒ කැරලිකාරී ඉශ්‍රායෙල් වංශය ඔබ අමතා, ‘මොනවද ඔබ මේ කරන්නේ?’ යි ඇසුවේ නැති ද?
10“ඔවුන්ට මෙසේ කියන්න. ‘පරමාධිපති ස්වාමින්වහන්සේ මෙසේ කියන සේක: මෙම දිව්‍ය ප්‍රකාශනය අදාළ වන්නේ, යෙරුසලමෙහි අධිපතියා හා එහි වෙසෙන මුළු ඉශ්‍රායෙල් වංශයට ය.’ 11ඔවුන්ට කතා කොට, ‘මම නුඹලාට ලකුණක් වන්නෙමි’ යි කියන්න.
“මා කර ඇති පරිද්දෙන් ම ඔවුන්ට කරනු ලබන්නේ ය. ඔවුහු සිරකරුවන් ලෙස පිටුවහල් ව යන්නෝ ය.
12“ඔවුන් අතරේ අධිපතියා ගොම්මන් අඳුරු වේලේ තම බඩු, තම කර තබා පිටත් ව යනු ඇත. ඔහුට රිංගා යෑමට බිත්තියේ සිදුරක් හාරනු ලැබේ. දේශය තමාට නො පෙනෙන ලෙස ඔහු තම මුහුණ වසා ගනු ඇත. 13මම ඔහු පිට මගේ දැල එළමි. මගේ උගුලට ඔහු හසු වන්නේ ය. මම කල්දිවරුන්ගේ දේශය වන බබිලෝනියට ඔහු රැගෙන එන්නෙමි. එහෙත් ඔහු එය දකින්නේ නැත. එහිදී ඔහු මියෙන්නේ ය. 14ඔහු වටා සිටින සියල්ලන් වන ඔහුගේ නිලධාරී මඬුල්ල ද ඔහුගේ හේවාපන්න ද මම සියලු සුළං අතට විසිරුවා, ඇදගත් කඩුවෙන් යුතු ව ඔවුන් පසු පස ලුහුබඳින්නෙමි.
15“මම ජාතීන් අතරෙහි ඔවුන් විසුරුවා, රට රටවලට ඔවුන් පලවා හරින කල, ස්වාමින්වහන්සේ මා වග ඔවුන් දැනගනු ඇත. 16තමන්ගේ සියලු පිළිකුල්කම්වල වරද, තමන් විසිරී යන ජාතීන් අතරදී පිළිගන්නා පිණිස, මම ඔවුන්ගේ සුළුතරයක් කඩුවෙන් ද සාගතයෙන් ද වසංගතයෙන් ද ගලවා ඉතිරි කරන්නෙමි. එවිට, මා ස්වාමින්වහන්සේ වග ඔවුන් දැනගන්නවා ඇත.”
17 ස්වාමින්වහන්සේගේ වචනය මා වෙත පැමිණ කියනුයේ: 18“මනුෂ්‍ය පුත්‍රය, ගැහි-ගැහී ඔබේ ආහාර කමින්, භීතියෙන් වෙවුල වෙවුලා ඔබේ වතුර බොන්න. 19දේශයේ ජනයාට මෙසේ පවසන්න: ‘යෙරුසලම් වාසීන් වන ඉශ්‍රායෙල් දේශයේ සිටින්නන් ගැන පරමාධිපති ස්වාමින්වහන්සේ මෙසේ පවසන සේක. ඔවුන් තම අහර අවුල් තැවුල් සිතින් යුතු ව කමින්, ඔවුන්ගේ වතුර තැතිගැන්මෙන් යුතු ව බොනු ඇත. එසේ වන්නේ, එහි වෙසෙන්නවුන්ගේ සැහැසිකම් හේතුවෙන් ඔවුන්ගේ දේශයේ සෑම සියලු දෙයක් ම පාළු කර දමනු ලබන බැවිනි. 20ජනාවාස නගර ආලාපාළු කර දමනු ලැබ, දේශය පාළුවට යනු ඇත. එවිට, ස්වාමින්වහන්සේ මා වග නුඹලා දැනගන්නවා ඇත’ ” යනුවෙනි.
ප්‍රමාදවීමක් නැත
21 ස්වාමින්වහන්සේගේ වචනය මා වෙත පැමිණ කියනුයේ: 22“මනුෂ්‍ය පුත්‍රය, ‘දවස් ගෙවී යතේ, සෑම දර්ශන ව්‍යර්ථ වෙතේ’ යනුවෙන් ඉශ්‍රායෙල් දේශයේ පවතින ආප්තෝපදේශය මොකක් ද? 23ඔවුන්ට මෙසේ කියන්න: ‘පරමාධිපති ස්වාමින්වහන්සේ මෙසේ පවසන සේක: මෙම ආප්තෝපදේශය මම නවතා දමන්නෙමි. ඉශ්‍රායෙලය තුළදී ඔවුන් එය තවත් භාවිත නො කරනු ඇත.’ එනිසා ඔවුන් අමතා මෙසේ කියන්න: ‘සෑම දර්ශනයක් ම ඉෂ්ට කෙරෙන දවස් ළඟා වෙතේ. 24මන්ද, ඉශ්‍රායෙල් ජනයා අතරෙහි ව්‍යාජ දර්ශන හා ඉච්චා පේනකීම් තවත් නො වන්නේ ය. 25එහෙත් ස්වාමින්වහන්සේ වන මම මා කැමති පරිදි පවසන්නෙමි. පමා නො වී ඒ දෑ ඉටු කරනු ලැබේ. එම්බා කැරලිකාරී වංශය, මා පවසන කවරක් වුව නුඹලාගේ දවස්වලදී ඉෂ්ට කරන්නෙමියි පරමාධිපති ස්වාමින්වහන්සේ ප්‍රකාශ කරන සේක’ ” යනුවෙනි.
26තවද ස්වාමින්වහන්සේගේ වචනය මා වෙත පැමිණ කියනුයේ: 27“මනුෂ්‍ය පුත්‍රය, ඉශ්‍රායෙල් වංශය පවසන්නේ, ‘ඔහු දකින දර්ශන අවුරුදු ගණනාවක් මතුමත්ත සඳහා ය. ඔහු දිවැසි වැකි පවසන්නේ ඈත අනාගතය ගැන ය’ කියා ය.
28“එබැවින් ඔවුන්ට මෙසේ කියන්න: ‘පරමාධිපති ස්වාමින්වහන්සේ මෙසේ පවසන සේක: මගේ එක වචනයකුදු තවත් පමා නො වේ. මා පවසන කවරක් වුව ඉටු කරනු ලැබේ ය කියා පරමාධිපති ස්වාමින්වහන්සේ ප්‍රකාශ කරන සේක’ ” යනුවෙනි.
දැනට තෝරාගෙන ඇත:
එසකියෙල් 12: SCV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.