එස්තර් 9:1-10

රජුගේ නියෝගය හා ආඥාව ක්‍රියාත්මක කිරීමට නියමිත දොළොස් වන මාසයේ, අදාර් මාසයේ දහතුන් වන දිනය, එදින යුදෙව්වරුන් මැඬලීමට ඔවුන්ගේ සතුරන් බලාපොරොත්තු වූ දවස වුව ද, තත්වය අනෙක් අතට පෙරැළිණ; යුදෙව්වරු එය, තමන්ට වෛරකළවුන් මැඬලීමේ දවසකට හරවා ගත්හ. අහෂ්වේරොෂ් රජුගේ හැම ප්‍රාන්තයක ම යුදෙව්වරු, තමන් විනාශ කරන්නට සෙවූවන්ට පහර දෙන පිණිස, තම පුරවරයන්හි එක් රැස් වූහ. අන් හැම ජාතියකට ම අයත් ජනයා පිට යුදෙව්වරුන් කෙරේ වූ භයක් පතිත වූ බැවින් යුදෙව්වරුන්ට එරෙහිව නැගිටින්නට සමත් කිසිවකු හෝ නො වී ය. සියලු රජුගේ ප්‍රාදේශීය ආණ්ඩුකාරවරු ද විවිධ ප්‍රාන්ත-පාලකයෝ ද විවිධ ජන කොටස් හි අධිපතීහු ද මොර්දෙකයි කෙරේ වූ බියෙන් ඇලළී ගියාහු, යුදෙව්වරුන්ට ම උදවු උපකාර කළහ. මොර්දෙකයි, රජ මැදුරෙහි බලවතා විය. ඔහුගේ කීර්තිය ද ප්‍රාන්ත මුළුල්ලෙහි පැතිර ගියේ ය. මෙසේ මොර්දෙකයි වඩ වඩා බලවත් විය. යුදෙව්වරු ඔවුන්ගේ සියලු සතුරන් මරා දමමින්, වනසාලමින්, ඔවුන් කඩුවෙන් ගසා හෙළූහ. ඔවුහු, තමන්ට වෛර කළවුනට තමන් රිසි පරිද්දෙන් කළහ. යුදෙව්වරු ෂූෂන් බළකොටුවේ මිනිසුන් පන්සිය දෙනෙක් මරා දැමූහ. තවද ඔවුහු පර්ෂන්දාතා, දල්ෆෝන්, අස්පාතා, පෝරාතා, අදලියා, අරීදාතා, පර්මෂ්තා, අරීසයි, අරිදයි හා වයිසාතා යන දස දෙනා මරා දැමූහ. යුදෙව්වරුන්ගේ හතුරා වූ හම්මෙදාතාගේ පුත් හාමාන්ගේ පුතුන් දස දෙනා ඔවුහු ය. එහෙත් යුදෙව්වරුන් වස්තුව කොල්ලකෑමට අත පෙව්වේ නැත.