අද දවසේ මා ඔබට ආඥා කරන උන්වහන්සේගේ ආඥා, උන්වහන්සේගේ නියමයන් හා උන්වහන්සේගේ නියෝග පිළිපැදීම පැහැර හැරීමෙන්, ඔබේ දෙවියන්වහන්සේ වන ස්වාමින්වහන්සේ අමතක නො කිරීමට පරෙස්සම් වන්න. නැතහොත් ඔබ කා, බී, සෑහී, හොඳ ගෙවල් තනා, පදිංචි වූ පසු, ඔබේ ගව හා එළු, බැටළු රංචු වැඩිදියුණු වී, ඔබට රන්, රිදී බහුල වී, ඔබට ඇති සියල්ල සඵල වූ කල, ඔබේ හදවත අහංකාර වී, ඊජිප්තුවෙන් පිටතට, වහල්කමේ දේශයෙන් පිටතට ඔබ ගෙන ආ ඔබේ දෙවියන්වහන්සේ වන ස්වාමින්වහන්සේ ඔබට අමතක වනු ඇත. උන්වහන්සේ ඔබ ගෙන ආවේ, විසකුරු සර්පයින් හා ගෝනුස්සන්ගෙන් යුතු, වතුර නැති, ඒ පිපාසිත මහා රුදුරු පාළුකරය ඔස්සේ ය. කළු ගල් පර්වතයෙන් උන්වහන්සේ ඔබට වතුර දුන් සේක. පාළුකරයේදී උන්වහන්සේ ඔබ පෝෂ්‍ය කළේ, ඔබේ පියවරුන් කිසි කලෙක නො දැන සිටි මන්නාවලිනි. එසේ කළේ, කෙළවරදී ඔබට සෙත සැලසෙන පිණිස ඔබ යටත් කොට, ඔබ පරීක්ෂා කරනු පිණිස ය. ඇතැම් විට ඔබ, “මා මෙම සම්පත් සපයා ගත්තේ, මගේ බලයෙන් හා මගේ දෑතේ සවියෙන් යැ” යි ඔබට ම කිව හැකි ය. එහෙත්, ඔබේ දෙවියන්වහන්සේ වන ස්වාමින්වහන්සේ සිහි කරන්න. මන්ද, අද දවසේ තිබෙන පරිදි මේ සම්පත් රැස් කර ගැන්මේ හැකියාව ඔබට දෙන්නේත්, ඔබේ ආදි පියවරුනට උන්වහන්සේ දිවුළ ගිවිසුම එමඟින් සහතික කරන්නේත් උන්වහන්සේ ම බැවිනි.
යම් කලෙක ඔබේ දෙවියන්වහන්සේ වන ස්වාමින්වහන්සේ අමතක කර, අන් දෙවි-දේවතාවුන් පසු පස ගොස්, ඔබ ඔවුන්ට මෙහෙ කොට, නමස්කාර කළහොත්, සත්තකින් ම ඔබ වැනසී යන බවට අද මම ඔබට එරෙහිව සාක්ෂි දරමි. ඔබේ දෙවියන්වහන්සේ වන ස්වාමින්වහන්සේට අකීකරුවීමේ හේතුවෙන්, ඔබ වැනසී යනු ඇත්තේ, ස්වාමින්වහන්සේ ඔබ ඉදිරියෙන් ජාතීන් විනාශ කර දැමූ පරිද්දෙනි.
Bible App
Bible App for Kids
