ද්විතීය 31
31
යෝෂුවා නායකත්වයට
1තවදුරටත් සියලු ඉශ්‍රායෙල්වරුන්ට මෙවදන් පැවසූ මෝසෙස්, 2ඔවුන් අමතමින්, “දැන් මම එකසිය විසි අවුරුද්දක් වයස් ඇත්තෙමි. තවදුරටත් ඔබට නායකත්වය දරන්නට මට නුපුළුවන. ස්වාමින්වහන්සේ මට පවසා ඇත්තේ, ‘ඔබ මේ යොර්දානෙන් එතෙරට යන්නේ නැත’ කියායි. 3ඔබේ පෙරමුණ ගෙන, එතෙරට යන්නේ, ඔබේ දෙවියන්වහන්සේ වන ස්වාමින්වහන්සේ ම ය. ඔබ ඔවුන් පහ කොට, දේශය හිමි කර ගන්න පිණිස උන්වහන්සේ ඔබ ඉදිරිපිටින් මේ ජාතීන් විනාශ කර දමන සේක. ස්වාමින්වහන්සේ පැවසූ පරිදි යෝෂුවා ඔබට පෙරටුවෙන් එතෙරට යන්නේ ය. 4අමෝරිවරුන්ගේ රජුන් වූ සීහොන් හා ඕග් ද සමඟ ඔවුන්ගේ දේශය ද විනාශ කරමින්, ස්වාමින්වහන්සේ ක්‍රියා කළ ලෙස ම, උන්වහන්සේ මේ ජාතීන්ට ද කරන සේක. 5ස්වාමින්වහන්සේ ඔවුන් ඔබට යටත් කර දෙනු ඇත. එවිට ඔබ ඔවුනට, මා ඔබට අණ කළ සියල්ල පරිදි කළ යුතු ය. 6ශක්තිමත් වන්න; ධෛර්යවත් වන්න. ඔවුනට භය වන්න එපා; තැති ගන්න එපා. මන්ද ඔබ සමඟ යන්නේ ඔබේ දෙවියන්වහන්සේ වන ස්වාමින්වහන්සේ ය; උන්වහන්සේ කිසි කලෙක ඔබ හැර යන්නේ නැත; ඔබ අත්හැර දමන්නේ නැතැ” යි පැවසී ය.
7ඉන්පසු යෝෂුවා කැඳවූ මෝසෙස්, මුළු ඉශ්‍රායෙල් ජනයා ඉදිරියේ ඔහු අමතමින්, “ශක්තිමත් වන්න; ධෛර්යවත් වන්න. මේ ජනතාවගේ ආදි පියවරුනට දෙන්නට ස්වාමින්වහන්සේ දිවුළ දේශයට මොවුන් සමඟ යා යුත්තේ ඔබයි. ඔබ, එය ඔවුන්ට උරුම කොට දිය යුතුයි. 8ඔබට පෙරටුව යන්නේ ස්වාමින්වහන්සේ ය. උන්වහන්සේ ඔබ සමඟ ම වන සේක. උන්වහන්සේ කිසි කලෙක ඔබ හැර යන්නේ නැත; ඔබ අත්හැර දමන්නේ නැත. භය වන්න එපා; කැලඹෙන්න එපා” යි පැවසී ය.
ව්‍යවස්ථාව කියවීම
9ඉන්පසු මෝසෙස් එම නීතිය ලියා, ස්වාමින්වහන්සේගේ ගිවිසුම් කරඬුව ඔසවාගෙන යන්නන් වන ලෙවී පුත්‍රයින් වූ පූජකවරුනට ද ඉශ්‍රායෙල් වැඩිහිටියන් සියලු දෙනාට ද එය බාර දුන්නේ ය. 10ඉන්පසු මෝසෙස් ඔවුනට අණ කරමින්, “සෑම හත් අවුරුද්දක් අවසනදී, ණය කපා හැරීමේ අවුරුද්දේ නියමිත කාලය වන කූඩාරම් මංගල්‍යය අතරතුරදී 11සියලු ඉශ්‍රායෙල්වරුන් ඔබේ දෙවියන්වහන්සේ වන ස්වාමින්වහන්සේ අබියස පෙනී සිටින්නට, උන්වහන්සේ තෝරාගත් ස්ථානයට පැමිණි කල, ඔවුනට ඇසෙන පරිදි ඔබ මේ නීතිය ඔවුන් ඉදිරියෙහි කියවිය යුතු ය. 12මිනිසුන්, කාන්තාවන් හා දරුවන් ද ඔබේ නගරයේ වෙසෙන විදෙස්සන් ද අසා, උගෙන, ඔබේ දෙවියන්වහන්සේ වන ස්වාමින්වහන්සේට භය පක්ෂපාත වන පිණිසත්, මෙම නීතියේ සියලු වදන් ඕනෑකමින් ඔවුන් පිළිපදින පිණිසත් ජනතාව එක් රැස් කරවන්න. 13මේ නීතිය නො දන්නා ඔවුන්ගේ දරුවන් ද මෙය ඇසිය යුතු ය. අසා, අත්කර ගැනීමට යොර්දානෙන් එතෙරට ඔබ යන දේශයේ ඔබ ජීවත් වන තාක් කල්, ඔබේ දෙවියන්වහන්සේ වන ස්වාමින්වහන්සේට භයවීම උගත යුතු යැ” යි පැවසී ය.
මතු දවස් කලින් පැවසීම
14 ස්වාමින්වහන්සේ මෝසෙස් ඇමතූ සේක්, “ඔබේ මරණ මොහොත දැන් ළඟයි. යෝෂුවාත් කැඳවාගෙන, හමුවීමේ කූඩාරමෙහි පෙනී සිටින්න. එහිදී මම ඔහුට වගකීම පවරන්නෙමි” යි පැවසූ සේක. එබැවින් මෝසෙස් හා යෝෂුවා හමුවීමේ කූඩාරමේ පෙනී සිටියහ.
15එවිට ස්වාමින්වහන්සේ වලා ටැඹකින් කූඩාරමේදී පෙනුණු සේක්, වලාව කූඩාරම් දොරටුව ඉහළින් නැවතී සිටියේ ය. 16එකල ස්වාමින්වහන්සේ මෝසෙස් ඇමතූ සේක්, “ඔබගේ පියවරුන් සමඟ ඔබ සැතපෙනු ඇත. ඉන්පසු මේ ජනයා ඔවුන් ඇතුළු වන දේශයේ දෙවි-දේවතාවුන් සමඟ ඉක්මනින් වේශ්‍යාකම් කරනු ඇත. ඔවුන් මා අත්හැර දමමින්, මා හා කළ ගිවිසුම කඩ කරනු ඇත. 17ඒ දවසේ මම ඔවුන් හා උරණ වී, ඔවුන් අත්හැර දමමි. මම ඔවුන් වෙතින් මගේ මුහුණ සඟවා ගන්නෙමි. එවිට බොහෝ විපත්ති ද අසීරුතා ද ඔවුන් වෙත පැමිණ, ඔවුන් ගොදුරු කර ගනු ඇත. එවිට ඔවුන් ඒ දවසේ, ‘මේ විපත්ති අප පිට පැමිණියේ, අපේ දෙවියන්වහන්සේ අප සමඟ නො වන බැවින් නො වේ දැ?’ යි අසනු ඇත. 18සැබවින් ම මම ඒ දවසේ මගේ මුහුණ සඟවා ගන්නේ, වෙනත් දෙවිවරුන් වෙත හැරීමෙන් ඔවුන් කළ සියලු දුෂ්ටකම් නිසා ය.
19“එබැවින් දැන්, මෙම ගීතය ලියාගෙන, ඉශ්‍රායෙල්වරුනට එය උගන්වන්න. මා වෙනුවෙන් එය ඉශ්‍රායෙල්වරුනට එරෙහි සාක්ෂියක් වන පිණිස, එය ඔවුන්ගේ මුවඟ තබන්න. 20කිරි හා පැණි ගලා යන දේශයට, ඔවුන්ගේ පියවරුනට දිවුරුමකින් මා පොරොන්දු වූ දේශයට මා ඔවුන් ගෙන ආ කල, ඔවුන් සිත් සේ කා, බී සෑහී, තර වූ පසු, මා ප්‍රතික්ෂේප කරමින්, මගේ ගිවිසුම කඩ කරමින්, වෙනත් දෙවිවරුන් වෙත හැරී, ඔවුනට නමස්කාර කරනු ඇත. 21විපත්ති හා අසීරුතා බොහෝ සෙයින් ඔවුන් පිට පැමිණි කල, මෙම ගීතය ඔවුන්ට එරෙහිව සාක්ෂි දරනු ඇත. මන්ද ඔවුන්ගෙන් පැවත එන්නන් වෙතින් එය අමතක වී නො යේ. දිවුරුමකින් මා ඔවුන්ට පොරොන්දු වූ දේශයට මා ඔවුන් ගෙන එන්නටත් කලින් පවා ඔවුන් කිරීමට අදහස් කර ගෙන සිටින දෑ මම දනිමි” යි පැවසූ සේක. 22එබැවින් මෝසෙස් එදින මෙම ගීතිකාව ලියා, ඉශ්‍රායෙල්වරුනට එය ඉගැන්වී ය.
23 ස්වාමින්වහන්සේ නූන්ගේ පුත් යෝෂුවාට මෙසේ අණ දුන් සේක. “ශක්තිමත් වන්න; ධෛර්යවත් වන්න. ඉශ්‍රායෙල්වරුනට මා දිවුරා පොරොන්දු වූ දේශයට ඔවුන් ගෙන එන්නේ ඔබ ය. මම ම ඔබ සමඟ සිටින්නෙමි” යි පැවසූ සේක.
24මෝසෙස් මෙම නීති සංග්‍රහයේ වචන මුල සිට අග දක්වා පොතක ලියා අවසන් කළ පසු, 25ස්වාමින්වහන්සේගේ ගිවිසුම් කරඬුව ඔසවාගෙන යන ලෙවීවරුනට මෙසේ අණ දුන්නේ ය. 26“නීති සංග්‍රහයේ මේ පොත රැගෙන, ඔබේ දෙවියන්වහන්සේ වන ස්වාමින්වහන්සේගේ ගිවිසුම් කරඬුව පසෙකින් තැන්පත් කරන්න. එය නුඹලාට එරෙහි සාක්ෂියක් ව තිබෙනු ඇත. 27මන්ද නුඹලා කෙතරම් කැරලිකාරී ද මුරණ්ඩු ද යන්න මම දනිමි. මා ඔබ අතරේ ජීවත් ව සිටියදී, ස්වාමින්වහන්සේට එරෙහිව නුඹලා කැරලිගසත් නම්, මා මළ පසු කොයි තරම් කැරලි ගසනු ඇද්ද? 28මෙම වචන ඔවුන්ගේ කනට ඇසෙන්නට පවසන්නටත්, ඔවුනට එරෙහිව සාක්ෂි පිණිස අහස හා පොළොවට හඬ ගසන්නටත්, ඔබේ ගෝත්‍රවල සියලු වැඩිහිටියන් හා ඔබේ සියලු නිලධාරීන් මා ඉදිරියට රැස් කරවන්න. 29මන්ද මගේ මරණින් පසු, ඔබ මුළුමනින් දූෂ්‍ය වී, මා අණ කළ මාවතින් ඉවත හැරී යන වග මම නිසැකයෙන් ම දනිමි. ඔබේ අත්වල වැඩවලින් ස්වාමින්වහන්සේගේ උදහස අවුළුවමින්, ඔබ උන්වහන්සේගේ ඇස් හමුවෙහි දුෂ්ටකම් කිරීම නිසා මතු දවස්හි දී ඔබ පිටට විපත්ති කඩා වැටෙනු ඇතැ” යි පැවසී ය.
මෝසෙස්ගේ ගීතය
30ඉන්පසු මෝසෙස් මෙම ගීතයේ වචන මුල සිට අග දක්වා මුළු මහත් ඉශ්‍රායෙල් සභාවට ඇසෙන පරිද්දෙන් හඬ නගා කියවී ය.
දැනට තෝරාගෙන ඇත:
ද්විතීය 31: SCV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.