Lugu 23
23
D-aw gə Jeju no ngɔ gangə tar gə
Mat 27.2,11-14; Mrk 15.1-5; Ja̰ 18.28,33-38
1D-uba nangə tɔ̰y d-ḭ taar naa gə kara baa, d-aw sə-a no ngon njekula gə lə njeko̰ ɓeje gə Rɔm gə ri-a na Pilad. 2D-un kudu gangə tar kunda t-ɛ gə na: J-inga dəw gə nee le ar aw sula dəw mə ɓeje lə-si gə mba kar d-ila karəw gə njeko̰ ɓeje, mba kar-je d-uga lar gədə ɓe lə mbay Sejar ang, ngaɓa ɓar rɔ-ɛ gə Kirisi, dəw gə d-um ubu dɔ-ɛ gə, ngaɓa gə mbay nəm tɔ. 3Pilad dəji-e tar na: ꞌTo mbay lə Jiibije wa? Jeju ila-a kəne na: ꞌI ja ꞌpa. 4Pilad pa ar buba njekapoloje gə bula dəwje na: M-o gəl ne kara gə m-a kila ne tar dɔ dəw gə nee ang. 5Ngaa d-ar dɔ gɔl-je gə njiriri ꞌpa na: N-sula dəw mə ɓeje mba kar-je d-al tar gə go ɗəw netɔji lə-a gə n-un kud-e dɔ nangə gə Galile gə saar n-ce nee dɔ nangə gə Jude, ɗaa ɓisine n-ɗe ne mə ɓe gə Jerujalɛm nee ngaa.
6Go tarje gə nee ɗaa, Pilad dəji na: Se jingaw gə nee le to dəw gə dɔ nangə gə Galile wa? 7Logə Pilad o tar-ɛ na Jeju to gə gəl ɓeko̰ gə lə Erɔdə ɗaa, təl ula-a ɓə lə-a, mba mə ndɔ-ɛje gə əng le, Erɔdə le kara ga̰ mə ɓe gə Jerujalɛm gə ja tɔ. 8Erɔdə unda kəm-e ta̰y o Jeju ɗaa, rɔ-ɛ ləl-e ya̰ mba ləw baa ja n-sangə ɗəw ko-e mba tarje tɔ̰y gə ꞌpa ɔji dɔ-ɛ ngaɓa n-unda m-e gə mba ko-e lo ɗa nemisi gə ban wo̰y tɔ. 9ꞌDəji Jeju tar ya̰, ngaa Jeju ar t-ɛ munduru. 10Buba njekapoloje gə njekɔr gəl toronduje gə ꞌga̰ lo-e gə nee le, ꞌgangə tar gə kədərə-kədərə d-um t-ɛ gə. 11Erɔdə gə njeɗɔje lə-a kara, d-a Jeju mbɛ̰ ngaɓa d-unda-a ꞌkogo ne tɔ; d-ula-a kubu gə may kəm-kəm ɗaa, Erɔdə ar-je ꞌtəl d-aw sə-a ɓə lə Pilad gugu. 12Ndɔ-ɛ gə əng le, mbay Erɔdə je gə njeko̰ ɓe Pilad gə kede ꞌto gə njeba̰a̰je le, ꞌtəl ꞌto gə njekuraje ngaa.
Mat 27.15-30; Mrk 15.6-19
13Be ɓa, Pilad ɓar buba njekapoloje gə njekɔr no dəwje gə dəw mə ɓeje, 14ngaɓa pa ar-je na: ꞌƊeje gə dəw gə nee le ɓə lə-m nee mba ꞌpaje to gə n-sula dəwje kar-je d-al tar. Ngaa ꞌma ɗaa, logə m-dəji gəl tarje ta kəm-si gə nee ɗaa, m-inga ne kara be rɔ dəw gə nee gə asə mba kar m-gangə ne tar dɔ-ɛ gə ɔji go neɗaje gə kṵra̰y tɔ̰y gə sisəy ꞌturaje dɔ-ɛ gə nee ang. 15Erɔdə kara, ɗəw kara baa, inga tar kara gə uwa dɔ-ɛ ang tɔ, ɓa təl ula-a ne ɓə lə-si nee. To gə be ɓa, dəw nee le, ɗa ne kara be gə asə mba kar-ɛ inga ne yo ang. 16Bənəng ɗaa, kunda ja m-a kar-je d-unda-a ɗaa, m-a kḭya̰-a kila-a taar. 17Ndɔ ɗa nay nama, Pilad ɔr dəw kara kəy kula gə, ila-a taar-taar.#23.17 Bar-ɛ gə nee le godo mə njekɔr gəl toronduje gə kɛm gə ləw.
18D-uru ꞌkuwi tɔ̰y na: ꞌTɔl-ɛ gə tɔl ja ɗaa Barabas ɓa ɔr-ɛ ar-si. 19Barabas le, d-uwa-a d-ila-a kəy kula gə mba bunga̰ dəwje um-je mə ɓe gə ar d-al tar ta njeko̰ ɓeje gə, ngaɓa tɔl dəw tɔ. 20Pilad təl pa tar to gə ɗangə ar-je gə kəji gə m-e gə mba kɔr ne Jeju kila-a taar. 21Nga ꞌjejee d-uru ꞌkuwi na: ꞌƁər-e kagə dəsə gə ja. 22Gɔl munda lə-a ja cibi n-pa n-ar-je na: Ne gə kṵra̰y gə ban ɓa dəw nee le ɗa wa? M-inga ne kara be rɔ-ɛ gə ang, gə asə mba kar n-inga nee yo ang. Be nama, kunda ja baa m-a kar-je d-unda-a ɗaa, m-a kḭya̰-a kila-a taar. 23Ngaa ꞌjejee d-ar dɔ gɔl-je gə njiriri d-uru ꞌkuwi gə ndu-je gə boy dɔ-je gə kede-kede, kar ꞌɓər-e kagə dəsə gə ja. 24Pilad un ndu kar ꞌɗa ne gə ꞌdəji le d-ar-je. 25N-ḭya̰ Barabas gə nje kɔsə dəwje kum-je neɗa gə kṵra̰y gə, gə nje tɔl dəw gə dəji-e le ngaa n-ila-a taar, ɗaa n-uwa Jeju n-ula-a mə ji-je gə kar ꞌɗa sə-a ne gə mə-je njigi.
ꞌƁərə Jeju kagə dəsə gə
Mat 27.31-44; Mrk 15.20-32; Ja̰ 19.17-24
26Kaw gə d-aw d-aw sə-a ɗaa, d-inga dəw kara, to gə ɓe gə Sirɛn ri-a na Simo ḭ ndɔɔ, ɗaa d-uwa-a d-ar-ɛ ta kagə dəsə dɔ Jeju gə odo nja ne go-e gə. 27Dəwje ꞌbula d-uwa go-e yug-yug, jeneje gə kɛm horo-je gə ꞌkunda kar-je rib-rib ꞌno ne rɔ-je ɔji dɔ-ɛ. 28Jeju turu rɔ-ɛ gə ɓə lə-je ɗaa pa ar-je na: Ngan mandəje gə Jerujalɛm, ꞌno-mje ꞌma ang, ngaa sisəy ja ꞌnoje rɔ-si, gə noje ngan si. 29Be ɓa, oje, ndɔje a ɗe gə dəwje d-a pa na: Nokarə to kar ꞌkaw kadəje gə nje gə d-uji nganje ang nəm, d-ula mba ta nganje gə ang nəm tɔ. 30Be ɓa d-a pa kar dɔ ərje na: ꞌTosoje dɔ-si gə, ngaɓa d-a pa kar dɔ wurije na: ꞌDəɓəje dɔ-si gə. 31To gə ɓo ꞌɗa kagə gə təbə to gə be ngaa se kar kagə gə tudu a to to gə ban wa? 32D-aw gə dəwje gə ɗangə joo, gə to gə gayimje, gə mba tɔl-je sə-a tɔ.
33ꞌCe lo gə ꞌɓar-ɛ Ka dɔ ɗaa, ꞌɓər-e kagə dəsə gə, gə gayimje joo sə-a, dəw gə kara dɔ ji kɔl-ɛ gə, dəw gə kara dɔ ji gəl-e gə tɔ. 34Cibi Jeju pa na: Bɔy, ɔr tar dɔ-je gə, mba ne gə ꞌɗa le ꞌgərə ang baa. ꞌƊa ꞌya̰a̰ ꞌkay ne naa kubuje lə-a. 35Dəw mə ɓeje d-ar gə lo-e gə əng d-a lo; njekɔr no dəwje kara, d-unda-a kogo nee na: Dəwje gə ɗangə ngaɓa ꞌne n-aji-je. Ngaa to gə ɓo n-to Kirisi, Luba mbər-e nama, may kar n-aji rɔ-ɛ ꞌne ja ɓa. 36Njeɗɔje kara d-unda-a ꞌkogo ne tɔ. D-aw mbɔr-ɛ gə ɗaa d-uwa man bḭyə̰ gə masə ꞌtɔj-ɛ, ɗaa ꞌpa na: 37To gə ɓo ꞌi to mbay lə Jiibije nama aji darɔ-i ngaa ləma! 38Ne gə d-unja bəgərə gə, d-unda dɔ-ɛ gə taar ɓa nee: Dəw gə nee le to mbay lə Jiibije.
39Kara horo gayimje gə ꞌɓərə-je kagə dəsə gə taj-ɛ na: ꞌTo gə Kirisi, ang baa wa? ꞌI ja aji darɔ-i ɓo aji sijee tɔ. 40Ngaa ꞌye gə kara ḭ sə-a na: ꞌI ꞌɓəəl Luba ang wa? Tar gə kara ja baa ꞌgangə dɔ-i gə. 41Sijee le, kar-si to gə ɗəb-e arə ngadə, j-inga nekuga dɔ ji ɔji dɔ kula ɗa si, ngaa ꞌne le, n-ɗa ne gə kṵra̰y kara ang baa. 42Ɗaa n-pa na: Jeju, ar mə-i ole dɔ-m gə logə a təl ɗe gə singamongə ko̰ ɓe lə-i. 43Jeju ila kəne na: Tɔgərɔ, m-pa m-ar-i, ɓogəne ja a ga̰ sə-m naa gə kara baa mə dara gə.
44Kar gə ar lum dɔ gə be gə saar ce ne kar gə ila mbɔr-ɛ gə ja cil ciməri oso dɔ nangə nee tɔ̰y. 45Ne udu kəm kar ar-ɛ igi sərərə. Ngaɓa, Bal dɔ kubu gə gangə ne mə kəy lə Luba ḭ taar ja cir dana njarara 46Jeju ɗa ne gə ndu-e gə boy wəəl na: Bɔy, m-ila njil-m mə ji-i gə. Logə n-pa tar nee n-ila nangə ɗaa, kəm lə-a ce. 47Njekun dɔ njeɗɔje gə tɔl o ne gə nday le ɗaa ɔsə gaji Luba na: Tɔgərɔ ja, dəw gə nee le ɗaa to dəw gə dana gadə-gadə. 48Ɗaa, bula dəwje tɔ̰y gə mbo̰ naa lo ne ko gə kəm gə nee le, d-o ne gə nday le ɗaa, ꞌtəl yaw-yaw dɔ-je gə gugu, d-unda nee kar-je taar rib-rib. 49Njekuraje lə-a tɔ̰y gə jeneje gə un kud-e dɔ nangə gə Galile ja ꞌdan-ɛ le, d-ar dɔ ji ndə̰w̰ d-o neje gə aw nday.
D-ila nin Jeju buwa yo gə
Mat 27.57-61; Mrk 15.42-47; Ja̰ 19.38-42
50Dɔ ndɔ-ɛ gə əng le, dəw kara ri-a na Jəjəb, n-to nje kar tar ndəji nje gə no ngɔ gangə tar lə Jiibije, n-to dəw gə may ngaɓa dəw gə dana gadə-gadə nəm tɔ. 51N-um naa gə gə nje gə kɛm dɔ ndu kun gə lə-je gə dɔ kula ɗa-je gə ang tɔ. Gəl-e ḭ ɓe gə lə Jiibije gə ri-a na Arimate, ꞌne kara n-unda m-e dɔ ɓeko̰ gə lə Luba tɔ. 52Dəw gə nee le, aw inga Pilad dəji-e nin Jeju. 53N-ɗisi nin Jeju kagə dəsə gə n-ila nangə, n-ɓiri gə ta kubu ɗaa n-ila-a buwa gə gə ꞌsɔɔ mə ər gə dəw kara kara d-ila kəne kede ang ɓi. 54To ndɔ gɔl rɔ, ɗaa ndɔ kuwa kɔr aw nay dəb. 55Jeneje gə d-ḭ sə-a dɔ nangə gə Galile le, ꞌndole go Jəjəb; d-a lo gə buwa yo gə, d-o ne pa kila gə d-ila nin-e kəne. 56Ngaɓa ꞌtəl d-aw ɓee ɗaa ꞌgɔl dɔ ba̰yi kəndə mambo̰je gə ubuje. Ndɔ kuwa kɔr lə-je gə d-uwa kɔr-je to gə ndu Luba pa.
දැනට තෝරාගෙන ඇත:
Lugu 23: lap
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2020, ATALTRAB. All rights reserved