NDS 27
27
Pooli a dia Rɔmu
1Ǹ bɛ́ ǹ nə́ pɛ, mà wɔ n die we tà kuru ǹ goo ne wɔ wo Italii gána nɛ, ǹ nə́ Pooli laanka kòso nɛn kɔsɔn kɔ sɔraasin kuru mìilandɛnaa goon la, a tɔ n Zulusu. Sɔraasin kuru mɛn bɛ́ Kii Gole kɛ tɔ ná a ganaa, bɛa goledɛnaa nɛ. 2Wɔ́ wɔ Adramiti kiwi a tà kuru ǹ goo goon ne, bɛ doamaa nɛ a bɔ Azii gána genli a kiɛ̃. Wɔ́ wɔ, wɔ́ woo ka Aristarki-n kun wɔ nɛ, Masedoanɛ gána min ni, a n boe Tesaloniki kiwi. 3Wɔa woo a lɛawaa, wɔ́ dɔ Sidɔn. Zulusu na á goã Pooli kuĩ ka minbuiinbaa nɛ, á lɛ kɔ mà Pooli wo bɔ a giaáran li kiwi gɔ́ɔ̃ nɛ, bɛn na a laadoo siin zɛnaa nɛ. 4Wɔ bɛ́ wɔ́ yoo walan, Siipri gána mɛn bɛ́ mu bii, wɔ́ bɔ bɛ para li, a giala, bɛ̀ wɔ́ pɛ wáa wɔ n woe pepere, piɛ̃ nə n diɛ wɔ lɛ. 5Yìsi mu mɛn bɛ́ kaa-n Siliisii gána laanka Panfilii gána lɛ, wɔ́ bɛ kuru wɔ́ woo dɔ Miira kiwi, Liisii gána nɛ. 6Sɔraasin kuru mìilandɛnaa lɛ Alɛksandrii kiwi a tà kuru ǹ goo goon yɛ walan, woe Italii gána nɛ, á wɔ gisĩ á wɔ kaa bɛ nɛ.
7Wɔ́ lɛawaa gigiã zɛnaa bɛ̀ wɔ n mu kuri woe boɛboɛ. Wɔ n wɔ́ nɔmaa wɔ́ tɔ́n woo dɔ Kinidi gána paǹ li, sɛnɛ, piɛ̃ bɛ́ n diɛ wɔ lɛ, wɔ a boe la wɔ wo nyɛɛnɛ pepere wa. Wɔ́ n yɔrɔ dia gɔsɛ, Salmone bǎã la, wɔ́ daa bɔ Krɛti gána paǹ kɛ li. 8Mu-kurii lɛ kaka kɔ wɔ ganaa parsiini, sɛnɛ, wɔ bɛ́ kiɛ̃ gána lɛ paǹ li, wɔ́ woo dɔ bǎã goon ne, ǹ nə́ bíi «Goon golee ǹ bǎã sonbore», a wɔlɔ a sɔsɔɔ Laasee kiwi ganaa wa.
9Wɔ́ biikoo gigiã ziziɛ̃ walan, lɛ-sɔɔ kɛ dɔ́ kiɛ̃, mu-kurii a siĩn doo wa. Bɛ lɛ na á toa, Pooli nə́ n gɔn waa á pɛ: 10«Maa giaáran ganaa, masɛ yii ná a ganaa máa mu-kurii kɛ á re baraa koe. Bɔ̀n tá re tà kuru ǹ goo lɛ laanka a gɔ́ɔ̃gɔ́ɔ̃ ǹ mànan yii, ka wɔ dininmaan lɛn dɔn nɛ.»
11Sɛnɛ, sɔraasin kuru mìilandɛnaa lɛ sɛ foo na á goã doa-n tà kuru ǹ goo-dabaali lɛ laanka ǹ dɛnaa lɛ a boon ganaa, á la Pooli wɔ nɛ. 12Bɛa goon golee ǹ bǎã lɛ a siĩn min giã a-n bɔ̀nɔn wa, bɛ lɛ taman yii, tà kuru ǹ goo lɛ gɔ́ɔ̃gɔ́ɔ̃ ǹ minin lɛn gigiã mà wɔ daa wɔ wusoo wɔ mu kuru, wɔ ga a ganaa, bɛ̀ wɔ á boe la wɔ dɔ Feniksi kiwi, wɔ bɔ̀nɔn zɛnaa walan. Bɛ n Krɛti gána a goon golee ǹ bǎã goon lɛa, goo á boe la a n toa lɛ̀nyɛɛn laanka gusin a lɛ̀ gùrù gisi ganaa a wɔ a nɛ, á boe la a n toa lɛ̀nyɛɛn laanka gɔsɛ a lɛ̀ gùrù gisi dɔ ganaa a wɔ a nɛ.
Piɛ̃ gole n yui mu la
13Piɛ̃ boɛɛn kɔ́n yoo gusin a lɛ̀ gùrù ganaa á boe, ǹ nə́ taasɛ mà ǹsɛn sii á die yɔrɔ boe. Ǹ nə́ tà kuru ǹ goo lɛ a da mu-kurii ganaa giala kɔ, bɛ̀ ǹ nə ǹ ba ǹ wɔlɔ lui Krɛti gána lɛkoro ganaa wa. 14Sɛnɛ, boɛɛn nɛ gɔrɔ, nyɛ́ɛ da ǹ piɛ̃ gole mɛn bɛ́ boe lɛ̀giala laanka gɔsɛ a lɛ̀ gùrù gisi ganaa, bɛ́ yoo gána lɛ a kele bǎãn nɛ, á daa n duwəə wɔ la. 15Piɛ̃ lɛ tà kuru ǹ goo lɛ lɛ goa, wɔ bɛ́ wɔ a boe la wɔ á yɔ boe a ganaa wa, wɔ́ toa á tà kuru ǹ goo lɛ nyanaa á woo ne. 16Gána boɛɛn kɔ́n nə mu bii, a tɔ n Kloda, wɔ́ bɔ bɛa gusin a lɛ̀ gùrù ganaa á n kɔ wɔ siã boɛɛn nɛ, wɔ́ n doa wɔ́ boo la wɔ goo lɛ a boɛɛn kɛ kũ, sɛnɛ, bɛ ná a n zɛnaa ka nɔmaa gole ne. 17Ǹ bɛ́ ǹ nə́ da tà kuru ǹ goo gole lɛ nɛ, bɛ kio ǹ nə́ tà kuru ǹ goo gole lɛ yii ka biɛn nɛ. Ǹ bɛ́ ǹ ba li tà kuru ǹ goo lɛ wo dii Liibii a nyɔɔsɔ̃ la wa, ǹ nə́ goo lɛ a mɔnaa gole kɛ lɛ bɔ, ǹ ná a sii toa piɛ̃ gɔn, a dɔ́ wɔ nyanaa miɛ̃ á woo wɔ nɛ. 18A lɛawaa, piɛ̃ lɛ bɛ́ tɔ́n bìn diɛ wɔ ganaa taãn-taãnɛ, ǹ nə́ mɛ la ǹ nə́ tà kuru ǹ goo lɛ a guĩ zuĩ mu li. 19A lɛawaa sɔɔbaa ǹ wɔ pinaa, goo lɛ a dabaalin lɛn dininmaan nə́ tà kuru ǹ goo lɛ a gɔ́ɔ̃gɔ́ɔ̃ ǹ mànan waa, ǹ nə́ ǹ zũ mu li. 20Lɛawaa gigiã kiɛ̃ wɔ a wasa yii wa, wɔ a leeren dɔn yii tèlò-n wa. Piɛ̃ lɛ dɔ pàã bɛ́ tɔ́n gole taãn-taãnɛ, wɔ́ nɔmaa wɔ́ taasɛ wáa wɔ a re n boe kɛ-n wa.
21Á bele bɔ dɔn wɔ a màn bii wa. Pooli tɔ́n yoo á golee minin lɛn bii, á pɛ:
– Toa bɛ̀ ka n ka masɛ a boo si wɔ giã Krɛti, bɛ̀ fuu kɛ laanka bɔ̀n kɛ a wɔ yii wa. 22Sisia man pii ka nɛ, ka n foo taã, a giala, wɔ a min goon din ba re goɛ̃ kɛ-n wa, tà kuru ǹ goo lɛ sɛ n die bɔ̀n biɛ. 23Sonbore, tèlò-n, masɛ bɛ́ Lawa mɛn wɔ lɛa, man dí nyɛɛ nɛ, bɛa lon a dia dí-a wole goon ná a n din nyaa ma nɛ. 24Á pɛ ma nɛ: «Nsɛ Pooli baran nyɛ́ɛ baa wa, pàã nɛ, nsɛ golee Rɔmu kii gole gole lɛ yɔrɔ-a, kiri nə n wɔ n ganaa. Á pɛ dɔn, ma ma miãn mɛnɛn bɛ́ kun ka ma nɛ mu-kurii kɛ lɛ gɔ́ɔ̃ nɛ, mà Lawa á die bɛn dɔn boe a nɛ maa lɛa.» 25Maa giaáran lɛn, ka n foo taã! Masɛ foo á doa-n Lawa ganaa, ma boo mɛn pɛ ka nɛ, a nə n zɛnɛɛ miɛ̃. 26Wɔa goo lɛ doamaa nɛ a wo n din dɛ gána kɔ́n ganaa mu bii.
27A tèlò fulusiibaa ǹ wɔ n ke, piɛ̃ lɛ n wɔ biĩ mu gole gole lɛ la. Làan biikoo li, goo-dabaalin lɛn nə́ taasɛ ǹ nə́ dɔ̃, mà wɔ diri tán kɔ́n la. 28Ǹ nə́ biɛ zũ ka màn na a ganaa, ǹ nə́ ga mu lɛ a zuzulubaa ganaa, ǹ nə́ yɛ mà mu lɛ a zuzulubaa n mɛtərə pusi. Nyɛɛn boɛɛn doo ǹ nə́ wusoo ǹ nə́ biɛ lɛ zũ, ǹ nə́ yɛ mà mu lɛ a zuzulubaa n mɛtərə pɔsɔɔ. 29Nyɛ́ɛ na á goã ǹ ganaa mà wɔa tà kuru ǹ goo lɛ á re n toe kɔlɔn nɛ, bɛ lɛ nɛ ǹ nə́ goo lɛ a kurəə ǹ kɔlɔ dadara sii a biɛ yii goo lɛ kio ganaa, ǹ nə́ ǹ gisĩ mu li, ǹ nə́ n yii da mà lɛ̀ waa fufuu. 30Goo lɛ a dabaalin lɛn man giɛ li ǹ soo ǹ baa si, ǹ nə́ goo boɛɛn kɛ bɔ ǹ nə́ diɛ mu la, mà ǹsɛn man woe kɔlɔ dadaran yii goo lɛ nyɛɛn dɔ nɛ. 31Pooli pɛ sɔraasin laanka ǹ mìilandɛnaa lɛ nɛ: «Bɛ̀ minin kɛn nə giã goo lɛ gɔ́ɔ̃-n wa, ka ba boe la ka la wa.»
32Sɔraasin lɛn nə́ goo boɛɛn lɛ a biɛn kuru ǹ nə́ toa á woo.
33Wɔ bɛ́ n yii diɛ lɛ̀ a waa la, Pooli pɛ mà min din tumaa màn bii: «A lɛawaa fulusii n ke pelo wɔ nə n yii diɛ, wɔ n wɔ a màn kɔ́n bii wa. 34Masɛ n pii ka nɛ, ka màn bii, a giala, ka laadoo tá màn-bii ganaa ka yii boo la a goã koo. Masɛ n pii ka-n doo, màn ba re pɔrɛɛ ka kɔ́n-a wa.»
35Pooli bɛ́ á bɛa boon kɛn da á nya, á buuru saa, á barka da Lawa nɛ min tumaa yɔrɔ-a, á tɔ́n pɔrɔ á sɔ̃. 36Wɔ tumaa foo taã, wɔ gogoonmaa màn bii. 37Wɔ tumaa a kaa kun na á goã min biɛ paa ka pɔsɔbaa ka sɔrɔ (276) tà kuru ǹ goo lɛ gɔ́ɔ̃ nɛ. 38Wɔ bɛ́ wɔ́ màn bii wɔ́ nya, ǹ nə́ *belee lɛ sɛ waa ǹ nə́ zũ mu li, màn mɛn bɛ́ toɛ, tà kuru ǹ goo lɛ puusə kɔ.
Tà kuru ǹ goo lɛ a ziziɛ̃
39Lɛ̀ bɛ́ á waa, goo-dabaalin lɛn nə tán lɛ dɔ̃ wa. Sɛnɛ, maǹ nə́ mu a na kɔn-a ǹ bǎã kɔ́n yɛ, nyɔɔsɔ̃ na a lɛ-a. Ǹ nə́ ga li bɛ̀ maǹ boe la, ǹ wo tà kuru ǹ goo lɛ doa bɛ ganaa. 40Ǹ nə́ kɔlɔ dadaran lɛn fore ǹ nə́ ǹ kaa mu li, ǹ ná a da baa ǹ lasan kɛn yii ǹ biɛn dɔn fore. Bɛ kio ǹ nə́ mɔnaa goon yii tà kuru ǹ goo lɛ a nyɛɛnaan ganaa, màn mɛn bɛ́ toɛ, piɛ̃ nyanaa, ǹ bɛa nyɔɔsɔ̃ bǎã kɛ lɛ a zii saa. 41Sɛnɛ, tà kuru ǹ goo lɛ woo n dɔ nyɔɔsɔ̃ li, á kũ walan, mu lɛ a duwəə baraa lɛ ná a kio yiyiɛ.
42Sɔraasin lɛn mà ǹ daa ǹsɛn nə́ kòso nɛn lɛn dɛ, mà bɛ bie wa mà ǹ tá re mu biɛ ǹ baa si. 43Sɛnɛ, sɔraasin kuru mìilandɛnaa lɛ bɛ́ a ba li a Pooli dɛ wa, á n piã ka n miãn lɛn taasiɛ lɛ nɛ. Min mɛnɛn bɛ́ boe mu baa la, á pɛ bɛn manɛ mà ǹ parɛ bibinaa nɛ, ǹ nə n dɔ mu li ǹ wo tán lɛ ganaa. 44Gialakunun kɛn tá re dii gɔn-sɛlɛɛn la hinlaa tà kuru ǹ goo lɛ a yiyiɛ lɛkoron la. Wɔ tumaa dɔ́ woo dɔ tán lɛ la ka yɔrɔ kɛ lɛ nɛ, bɛ̀ màn kɔ́n ná a pɔrɔ wɔ ganaa wa.
දැනට තෝරාගෙන ඇත:
NDS 27: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.