Jɛ́nɛ́sì 23
23
Seɖɔ́ɛ̀ mɛ́ jè
1Seɖɔ́ nyu ma zɔ̃ hɔ̃dɛ̀ɖɛ̀ ɖò kè kpáɖá-nyɔ sè mɛ̀nɛ̌ìn-sɔ̃́. Kǎà Seɖɔ́ɛ̀ zɔ̃ ɓě ɓɛ́ ɔ cĩ́ ma kɛɛ nyu jĩ̀ɛ̀. 2Ké ɔ mɛ́ìn ma ɖé Kíjà-Áɓà mɔ̀à Hɛ́bɔ̀nɔ̀-hwɔ̀ɖɔ̀, nìà ɖé Kénà-ɓòɖòɔ̀ kɔ̃ɛɛ mú. Ké Ééɓòɖòhɛ̃́ɛ̀ mu, ɓɛ́ ɔ ké ma Seɖɔ́ jè vĩ̌.
3Ti ɓɛ́ Ééɓòɖòhɛ̃́ɛ̀ ɖǎ ma vĩ̌ɛ hwɔɛɛ, ɔ sɔ̀ ma ɓó ɔ gmààɔ̀ xwɛ́ɔ̀ bũ̌. Ké ɔ cɛ̃ɛ ma Hítì-nyɔ̀ ɓěɔ̀ gbo, ké ɔ ɖá, 4“Ḿ mɔ̀ ɖéè, ké ḿ nìà nɔ̄ ɓě hwìɛ̀ cĩ́ɛń nyɛ̀. Ní ɓaà ɓě ní, ɓě mɛ pèɖèìn dà ḿ pá ɖò gbo ɓó xwɛ́ dyóɖóún zà jè, ɓɛ́ ḿ ké ɖé ní xwɛ́ dyóɖóún zàìn.”
5Ké Hítì-nyɔ̀ ɓěɔ̀ jǔ ma Ééɓòɖòhɛ̃́ɛ̀ gɔ̃̌, ké wa ɖá, 6“Ɓɔ̌ɔ̀, tò à ɖùǔ gbo. M̀ mɔ̀ nyɔ kpa ɖɛ ɖé à dyéɖéín. M̀ mɛ gã à kú-toɖoún#23:6 Ɖé wa mɔ̀ùn ɓíɖíɛɛ, nyɔ ɖò-ɖò séín ɓéɖé ɖé ɔ mìɔùn nììn kú-toɖoún. ɓěɔ̀ dɛ̀ nì hwòɖǒ mɔ́ kɛ, ɓɛ́ m̀ ké ɖé nì xwɛ́ dyóɖóún zàìn. À nyɔ ɖò se m̀ kú-toɖo ɖò ɓùɖùɛ̌n mu ɓó nì xwɛ́ dyóɖóún zà jè.”
7Hwɛ̀ ké Ééɓòɖòhɛ̃́ɛ̀ sɔ̀ ma dyí, ké ɔ taɓa ma dú hwuɖu ɓó Hítì-nyɔ̀ ɓě mɔ̀à ɓóɖóɔ̀ nyɔ ɓěɔ̀ kɛɛ dyúa. 8Ké ɔ cɛ̃ɛ wa gbo, ké ɔ ɖá, “Ɔ jǔ ké ɓě dyi wɔ̃́ ɓɛ́ ḿ ké nɔ̄ ní xwɛ́ dyóɖóún zàìn ní, nìí, ɓě mɛ wɔ̃́ ɓɛ́ ɓě ké Ɛ́fɔ̀nɔ̀ mɔ̀à Zóhàà dyú-gààɔ̀ kɛɛ gbo wùɖù ɓó ḿ bìì, 9ɓɛ́ ɔ ké Ɛ́fɔ̀nɔ̀ɛ̀ pá ɓɛ́ ɓíɔ̀ nìà kɔ̃ɛɛ ḿ gbo pèɖèìn. Ɓíɔ̀ nì ɖé ɔ páɔ̀ mánáín. Ɔ nì ɖé Màpéɖà-pàɔ̀ mú. Jĩ̀ kà ɓɛ́ páɔ̀ mu kpaùn wɛ̃ɛ, ɔ mɛ pèɖèɛ̀n ḿ gbo ɓó ɓě dyúa, ɓɛ́ ɔ ké ní xwɛ́-dyóɖóún-zàìn-naín jǔ.”
10Ɓó tia ɓaɖaa, Ɛ́fɔ̀nɔ̀ mɔ̀à Hítì-nyɔ̀ɔ̀ kɛɛ kò ma ɖé ɔ nyɔ ɓěɔ̀ hwìɛ̀ dyi. Ké ɔ jǔ ma Ééɓòɖòhɛ̃́ɛ̀ gɔ̃̌ ɓó Hítì-nyɔ̀ séín ɓě nì ma kà ɓó ɔ ɓíɖí-hwɔ̀ɖɔ̀ɔ̀ gmɔ-wɔ̃̀ɔ̀ gboɛɛ dyúa, ké ɔ ɖá, 11“Gbào, ɓɔ̌ɔ̀. Tò ḿ gbo ɖùǔo. Ḿ nyí m̀ ɓíɔ̀, hwɛ̀ ké ḿ nyí m̀ pá ɓɛ́ ɓíɔ̀ nìà kɔ̃ɛ. Ḿ nìɛ̀ m̀ nyíɛń pídyi ɓó ní nyɔ séín ɓěɛ̀ dyúa. Zàìn ɖé nì gmààɔ̀ dyóɖóún.”
12Ké Ééɓòɖòhɛ̃́ɛ̀ sɔ̀ dyí, ké ɔ taɓa ma dú hwuɖu ɖe ɓó ɓóɖóɔ̀ nyɔ ɓěɔ̀ dyúa. 13Ké ɔ cɛ̃ɛ ma Ɛ́fɔ̀nɔ̀ gbo ɓó nyɔ ɓěɔ̀ dyúa, ké ɔ ɖá, “Ní ɓaà m̀ ní, tò ḿ gbo ɖùǔ. Ní mu píɔ́ ɓɛ́ páɔ̀ kpa kɛɛ pɛ́ɛ̀ìn. Wɔ̃́ ɓɛ́ ḿ kéɛ m̀ gbo dɔ̃, ɓɛ́ ḿ ké ɖé ní xwɛ́ dyóɖóún zàìn.”
14Ké Ɛ́fɔ̀nɔ̀ jǔ ma Ééɓòɖòhɛ̃́ɛ̀ gɔ̃̌, ké ɔ ɖá, 15“Ɓɔ̌ɔ̀, tò ḿ gbo ɖùǔ. Páɔ̀ kpa séɓàɖà-cɛ̀kò hɔ̃dɛ̀ɖɛ̀ hĩinyɛ.#23:15 Séɓàɖà-cɛ̀kò hɔ̃dɛ̀ɖɛ̀ hĩinyɛ mɔ̀ wíɖí jĩ̀ kà ɓɛ́ pá kpa ɓó tia ɓaɖa kɛ. Má, ɖɛa se ɖɛ ɖò kpa ɓó ḿ kè mɔ̀ pṹae? Zàìn ɖé nì gmààɔ̀ dyóɖóún.” 16Hwɛ̀ ké Ééɓòɖòhɛ̃́ɛ̀ wɔ̃́ìn ma ɖɛ Ɛ́fɔ̀nɔ̀ mɔ́ ma kà jɛ́ɛ́ kɛɛ gbo, ké ɔ ɖàɓàìn ma wíɖí jĩ̀ kà ɓɛ́ Ɛ́fɔ̀nɔ̀ ɖá ma kà nyɛ́nɛ́ ɓó Hítì-nyɔ̀ ɓěɔ̀ dyúa kɛ. Ɔ mɔ̀ ma séɓàɖà-cɛ̀kò hɔ̃dɛ̀ɖɛ̀ hĩinyɛ dyììn ɖé ɖɛ-mú-ɖàɓàìn-ɖɛ̀ ɓɛ́ ɖɛ-peɖe-nyɔ̀ ɓě ɖàɓàìn ma wíɖí mú ɓó tia ɓaɖa kɛɛ mú.
17Ɔ jèɛɛ, Ɛ́fɔ̀nɔ̀ɛ̀ pá ɓɛ́ ɔ nìà ɖé Màpéɖà-pà nìà ɓó Máwèɖè ɓíɖí-hwɔ̀ɖɔ̀ɔ̀ wáún wɛ̃ɛ múɛ kè ɓí nìà ɖéɛ múɛ ɔ kè cu séín nì páɔ̀ kɔ̃ dà séín nyɛɛ, 18wa mɔ̀ǎ ma Ééɓòɖòhɛ̃́ɛ̀ kɔ̃̀ɔ̀-ɖɛ̀. Hítì-nyɔ̀ séín ɓě nì ma kà ɓó Ɛ́fɔ̀nɔ̀ ɓíɖí-hwɔ̀ɖɔ̀ɔ̀ gmɔ-wɔ̃̀ɔ̀ gboɛɛ mɔ̀ ma zàse.
19Sɔ̀ìn ɓó ɖɛ ɓěa gboɛɛ, Ééɓòɖòhɛ̃́ɛ̀ zà ma ɔ gmàà Seɖɔ́ dyóɖóún ɖé ɓí nìà ɖé Màpéɖà-pà nìà ɓó Máwèɖè ɓíɖí-hwɔ̀ɖɔ̀ mɔ̀à Hɛ́bɔ̀nɔ̀ kɛɛ wáún wɛ̃ɛ mú ɖé Kénà-ɓòɖòɔ̀ kɔ̃. 20Ɔ jèɛɛ, sɔ̀ìn ɓó ti Hítì-nyɔ̀ ɓěɔ̀ ɖǎ ma páɔ̀ kè ɓí nìà ɖéɛ múɛɛ Ééɓòɖòhɛ̃́ɛ̀ gbo pèɖèìn nyɛɛ, ɔ mɔ̀ǎ ma ɔ xwɛ́-dyóɖóún-zàìn-naín.
දැනට තෝරාගෙන ඇත:
Jɛ́nɛ́sì 23: ƁB02
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Bassa Bible © Bible Society Liberia, 2002.