ᓗᒃ 12
12
ᒋᓴᔅ ᑲ ᐃᔭᒂᒥᒪᑦ ᐅᒋᔅᒋᓄᐊᒧᐛᑭᓇ ᐸᕆᓯᐊ ᐅᑦ ᐊᔭᒥᐊᐧᑲᓱᐅᓂᔪᐤ
ᒪᑎᔪᐤ 10.26,27
1ᒪᒂᒡ ᒪᒃ ᐊᓐ ᐊ ᐃᑎᓇᓄᐅᒡ, ᒥᒐᑥᐤ ᒐᓯᐱᔪᐤ ᐃᔪᒡ ᒋ ᐛᔅᑲᑲᐳᐅᒡ ᐊ ᓂᑐᑐᐛᒡ ᒋᓴᓴ᙮ ᐊᓂᔭ ᐊ ᐃᔅᐱᔅ ᒥᒐᑎᒡ ᓇᔅᒡ ᒋ ᑎᑎᑯᐃᔅᑕᔅᑲᑐᒡ᙮ ᓂᔅᑎᒻ ᒪᒃ ᒋᓴᔅ ᒋ ᐃᑕᐤ ᐅᒋᔅᒋᓄᐊᒧᐛᑭᓇ, “ᐃᔭᒂᒥᔅᑐᐛᐧᑯᒡ ᐸᕆᓯᔨᒡ ᐊᓂᔭ ᐊ ᐃᑕᔨᑕᑯᓯᒡ ᐛᔅ ᐊᔭᒥᐊᐧᑲᓱᒡ᙮ ᒧᔭᒻ ᐸᒂᓯᑭᓐ ᑲᐅᐱᔨᒡ ᑲ ᐃᑕᔨᑕᒂᒡ ᐊᑯᓐ ᐊ ᐃᑕᔨᑕᑯᓂᔨᒡ ᐊᓂᔭ ᐊ ᐃᑎᒡ᙮ 2ᐛᔅ ᐊᓐ ᒐᒂᓐ ᐊᑲ ᓄᒂᒡ ᒋᑭ ᓄᑯᑕᑭᓄᐤ ᐊᓐᑕ ᐊ ᐛᔅᑕᒡ᙮ ᒥᓯᐛ ᒐᒂᓐ ᒋᒧᑦ ᑲ ᐃᑐᑕᑭᓄᐅᒡ ᒋᑭ ᒋᔅᒐᔨᑕᑯᓐ᙮ 3ᐊᓐ ᑕᓐ ᑲ ᐃᓯ ᒋᒧᑦ ᐃᔨᒥᒡ ᐊᐛᓐᒋ ᐊ ᑎᐱᔅᑲᒡ ᐊᔅᒄ ᒋᑭ ᐸᑕᑯᓐ ᐊ ᒋᓯᑲᒡ᙮ ᐊᓐ ᑕᓐ ᑲ ᐃᓯ ᒋᒧᑦ ᐃᔨᒥᔨᓐ ᐊᔅᒄ ᒥᓯᐛ ᒋᑭ ᐎᑕᑭᓄᐤ ᒥᓯᐛ ᐊᐛᓐ ᒐᒋ ᒋᔅᒐᔨᑕᐧᒃ᙮”
ᐊᓐ ᐊᐛᓐ ᒋᐸ ᑯᔅᑕᓄᐤ
ᒪᑎᔪᐤ 10.28-31
4“ᒋ ᐎᑎᒪᑎᓇᐛᐤ ᓂᐎᒐᐛᑭᓂᑎᒄ, ᐊᑲᐎᔾ ᑯᔅᑕᒄ ᐊᐛᓐ ᑲ ᓂᐸᐊᑦ ᐊᐛᔪᐛ ᐛᔅ ᑕᐸ ᒐᒂᔪᐤ ᒋᑭ ᒋ ᐃᑐᑐᐛᐤ ᐊᒐᒂ᙮ 5ᒋ ᐸᒋ ᐎᑎᒪᑎᓇᐛᐤ ᐊᐛᓐ ᐊᓐ ᐊᐅᒄ ᒋᐸ ᑯᔅᑕᐛᐤ᙮ ᒋᓴᒪᓂᑐᐤ ᐊᐅᒄ ᐊ ᐃᑕᔨᑕᑯᓯᑦ ᒐᒋ ᑯᔅᑕᒄ ᐛᔅ ᐎᔾ ᐊᔭᐤ ᑎᐸᔨᒋᒐᐅᓂᔪᐤ ᒐᒋ ᐃᓯ ᐛᐱᓇᑕᒄ ᒥᒋ ᐃᔅᑯᑕᒡ ᐃᔅᐱ ᓂᐱᔭᒂ᙮ ᓂᐦᐃ, ᓂᑐᑐᐅᒄ ᐊᐅᒄ ᐅ ᑕᑈ ᒋᓴᒪᓂᑐᐤ ᒋᐸ ᑯᔅᑕᐛᐤ᙮”
ᒋᓴᒪᓂᑐᐤ ᒋ ᓂᓇᑭᑐᐛᔨᒥᑯᓄᐤ
6ᐊᑯ ᒋᓴᔅ ᒂ ᐃᔅᒋᔄᑦ, “ᓇᒪᐎᔾ ᓇᔅᒡ ᐊᐱᑕᔨᑕᑯᓱᐅᒡ ᐊ ᐊᔭᐱᓯᓯᒡ ᐱᔭᓯᓯᒡ, ᒥᒄ ᓂᓱ ᓱᒪᓂᒋᓴ ᐃᔅᐱᑕᔨᑕᑯᓱᐅᒡ ᐱᑕᑕᒡ ᐊ ᐅᑎᓇᑭᓄᐎᒡ, ᐃᔭᐱᒡ ᒪᒃ ᓇᒪ ᐛᒡ ᐸᐃᒄ ᐅᓂᔅᒋᔅᒋᓯᑕᑯᒡ ᒋᓴᒪᓂᑐᐛ᙮ 7ᒋᔨᐛᐤ ᒪᒃ ᐅᔅᑕ ᒋᑦ ᐃᑕᔨᒥᑯᐛᐤ ᒋᓴᒪᓂᑐᐤ ᐃᔅᐱᔅ ᐊᓂᔭ ᐱᔭᓯᓴ ᐊ ᐃᑕᔨᒪᑦ, ᐛᐛᒡ ᒋᐱᔎᐅᓄᐛᐛ ᒋ ᐊᒋᑕᑭᓄᐛ ᐊ ᑕᑥᐸᑲᒋ᙮ ᐊᑲᐎᔾ ᒪᒃ ᑯᔅᑕᒋᒄ ᐛᔅ ᐃᔭᐱᒡ ᒋᔨᐛᐤ ᐅᔅᑕ ᒋᑦ ᐃᑕᔨᑕᑯᓯᓇᐛᐤ ᐊ ᑭᓄᐛᐱᒥᑕᒄ ᒋᓴᒪᓂᑐᐤ ᐃᔅᐱᔅ ᐊ ᒥᒐᑎᒡ ᐱᔭᓯᓯᒡ᙮”
ᐊ ᐛᐎᑎᒪᒄ ᐊ ᒋᔅᒐᔨᒪᒄ ᒋᓴᔅ ᙭
ᒪᑎᔪᐤ 10.32,33; 12.32; 10.19,20
8“ᐊᐛᓐ ᐎᑎᒧᐛᒐ ᑯᑎᑲ ᐊᐛᔪᐛ ᐊ ᑕᑈᔭᔨᒥᑦ, ᐃᔪᐤ ᐅᑯᓯᓴᓇ ᑭᔭ ᒋᑭ ᐃᔅᒋᔄᔪᐛ ᐊ ᐅᑦ ᐃᔨᒥᑐᑕᑯᑦ ᐊᓐᑕ ᒋᓴᒪᓂᑐᐤ ᐅᑦ ᐊᓐᒋᓂᒪ ᐊ ᑕᔨᒋ᙮ 9ᐊᑯ ᒪᒃ ᐃᑕᒐ ᐊᐛᓐ ᐊ ᐃᑕᑦ ᐊᐛᔪᐛ ᐊᑲ ᑕᑈᔭᔨᒥᑦ, ᓂᑭ ᐃᑎᒪᔪᐛ ᑭᔭ ᒋᓴᒪᓂᑐᐤ ᐅᑦ ᐊᓐᒋᓇᒪ, ‘ᓇᒪᐎᔾ ᐊᓐ ᓂᑦ ᐃᔨᒻ᙮’ 10ᒥᓯᐛ ᐊᐛᓐ ᑲ ᒥᒋ ᐊᔨᒧᒪᑦ ᐃᔪᐤ ᐅᑯᓯᓴᓐ ᒋᑭ ᒋ ᐛᐸᔨᑎᒧᐛᑭᓄᐤ᙮ ᐊᑯ ᒪᒃ ᐊᓐ ᐊᐛᓐ ᑲ ᐸᔅᑕᒪᑦ ᑲ ᐸᔭᒋᓯᔨᒋ ᐊᒐᒂ ᓇᒪ ᒋᑭ ᐅᒋ ᐛᐸᔨᑎᒧᐎᑭᓄᐤ᙮”
11ᐊᑯ ᒋᓴᔅ ᒂ ᐃᔅᒋᔄᑦ, “ᒧᔭᒻ ᑎᐸᔅᑯᓂᒐᐅᒋᐛᐱᒡ ᐃᑐᑕᐃᑯᔨᓇ ᑭᔭ ᒍᐤ ᐊᔭᒥᐊᐅᒋᐛᐱᒡ ᑭᔭ ᒋᓴᐅᒋᒪᐛ ᐊ ᑕᔨᒋ ᒐᒋ ᑎᐸᔅᑯᓂᑯᔨᓐ ᐊᑲᐎᔾ ᒥᑯᔅᑲᑕᔨᑕ ᑕᓐ ᒐ ᐃᔅᒋᔄᔨᓐ ᑭᔭ ᑕᓐ ᒐ ᐃᓯ ᓂᔎᐅᓯᑥᔨᓐ ᒐᒋ ᐅᒋ ᐎᒋᐃᓱᔨᓐ᙮ 12ᐛᔅ ᑲ ᐸᔭᒋᓯᑦ ᐊᒐᐧᒄ ᒋᑭ ᒋᔅᑯᑎᒪᒄ ᑕᓐ ᐊᓐ ᒋᐸ ᐃᔅᒋᔄᓐ ᐊᓐ ᒪᒂᒡ ᐃᓯ ᓂᒋᔅᑭᒥᓇ᙮”
ᑲ ᐛᔪᑎᓯᑦ ᓇᐸᐤ
Luke 12.13-21 (Proper-13 Year C)
13ᐊᑯ ᐸᐃᒄ ᐊᓐᑕ ᓇᐸᐤ ᑲ ᓂᑐᑐᐛᑦ ᒋᓴᓴ, ᒋ ᐃᑕᐤ, “ᒋᔅᑯᑎᒪᒐᓱᐤ, ᐃᔨᒥᐃ ᒪ ᓂᐧᑲᓂᔅ ᒐᒋ ᑕᑕᐅᓂᒧᐅᑦ ᐊᓐ ᑲ ᐃᓯ ᓂᑭᑕᒧᐅᔨᒥᑦ ᐊᓂᔭ ᓄᑕᐎᓇᓐ᙮”
14ᐊᑯ ᒋᓴᔅ ᒂ ᐃᑕᑦ, “ᑕᐸ ᓇᒪᐎᔾ ᓂᔾ ᑲ ᐎᔭᔨᑕᐧᒃ ᑕᓐᑕ ᒐ ᐃᓯ ᑕᑕᐅᓂᑭᓄᔨᒋ ᐊᐛᓐ ᐅᑦ ᐊᐱᒋᑕᐅᓇ ᒪᒃ ᑲ ᐸᐱᔅᑎᓂᒧᐛᑦ ᐊᐛᔪᐛ ᐅᑦ ᐊᐱᒋᑕᐅᓂᔪᐛ᙮” 15ᐊᑯ ᒋᓴᔅ ᒥᓯᐛ ᑲ ᐃᑕᑦ ᐅᔭ, “ᐃᔭᒂᒥᒄ, ᒐ ᐊᑲ ᒋ ᒧᔅᑕᓇᔨᑎᒪᒐᔭᒄ ᐊ ᐃᔅᐱᔅ ᐎ ᐊᔭᔭᒄ ᒐᒂᓐ᙮ ᐛᔅ ᑕᐸ ᐊᓂᔭ ᐊ ᐃᓯ ᐛᔪᑎᓯᑦ ᐊᐛᓐ ᒪᒃ ᓇᔅᒡ ᐊ ᐛᔪᑎᓯᒂ, ᓇᒪᔭᔪᐤ ᐊᓂᔭ ᒐ ᐃᑐᑕᑯᑦ ᒐᒋ ᐅᒋ ᐊᔭᑦ ᑲᒋᒡ ᐱᒪᑎᓯᐅᓂᔪᐤ᙮”
16ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᒋᓄᐊᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᐸᐃᒂᐤ ᒋ ᑕᐤ ᐊ ᐛᔪᑎᓯᑦ ᓇᐸᐤ, ᐊᒋ ᐊᔭᑦ ᓂᑕᐅᒋᑕᑭᓐ ᐊᔅᒋᔪᐤ ᓇᔅᒡ ᐊ ᒥᔪ ᓂᑕᐅᒋᓂᔨᒋ ᐅᓂᑕᐅᒋᑕᑭᓇ᙮ 17ᐊᑯ ᒂ ᐃᑕᔨᑕᐧᒃ, ‘ᓴᔅ ᓇᒪ ᓂᑕᐱᔅᒋᓂᑕᓐ ᑕᓐᑕ ᒥᓯᐛ ᒐ ᓇᐅᔅᑕᔭᓐ ᐅᔭ ᑲ ᓂᑕᐅᒋᑕᔭᓐ ᓂᑕᐅᒋᑕᑭᓇ᙮’ ᐊᑯ ᑲ ᒪᒥᑐᓇᔨᑎᒥᐃᑯᑦ ᑕᓐ ᒐ ᐃᑎᑦ᙮ 18‘ᐅ ᒪᒃ ᓂᑭ ᐃᑎᓐ,’ ᒋ ᐃᔅᒋᔄᐤ, ‘ᓂᑭ ᐱᒂᐊᓐ ᐊᓂᔭ ᒥᓯᐛ ᓂᑦ ᐊᔅᑕᓱᐅᒋᐛᐸ ᐊᑯ ᒐ ᐅᓯᑕᔭᓐ ᐊᑐᐎᔅ ᐊ ᒥᓴᒋ ᒐᒋ ᓇᐅᔅᑕᔭᓐ ᒥᓯᐛ ᑲ ᐃᓯ ᓂᑕᐅᒋᑕᔭᓐ ᑭᔭ ᒥᓯᐛ ᓂᑦ ᐊᐱᒋᑕᐅᓇ᙮ 19ᐊᑯ ᒪᒃ ᒐ ᐃᑎᓱᔭᓐ, ᐊᔪᐛᒡ ᓂ ᐛᔪᒋᑕᓐ ᒐᒂᔪᐛ ᐊᓐᑕ ᓂᑦ ᐊᔅᑕᓱᐅᒋᐛᐱᒡ ᒥᒐᑐᐤ ᐱᐳᓇ ᒐᒋ ᐅᒋ ᐃᔅᐱᔭᓐ᙮ ᐊᑯ ᒪᒃ ᓇᒪ ᓂᑭ ᐅᒋ ᐊᑐᔅᒐᓐ᙮ ᓴᔅ ᓂᑭ ᐛᔪᒋᑕᓐ ᒥᒋᒻ ᑭᔭ ᐊ ᒥᓂᔭᓐ ᒐᒂᓐ ᑭᔭ ᒐ ᒧᒋᒐᔨᑎᒪᓐ᙮’ ”
20“ᐊᑯ ᒋᓴᒪᓂᑐᐛ ᒂ ᐃᑎᑯᑦ, ‘ᑕᑈ ᒋᐎᔭᓯᒥᑎᓱᓐ, ᐊᓄᒡ ᐅ ᒐ ᑎᐱᔅᑲᒡ ᒋᐱᒪᑎᓯᐅᓐ ᒋᑭ ᐅᑎᓇᑭᓄᐤ᙮ ᐊᐛᓐ ᒪᒃ ᒐ ᐊᔭᑦ ᒥᓯᐛ ᐊᓂᔭ ᑲ ᓇᐅᔅᑕᒪᓱᔨᓐ ᒐᒂᔪᐛ ?’ ”
21ᒋᓴᔅ ᒂ ᐃᔅᒋᔄᑦ, “ᐊᐅᑯᓐ ᒪᒃ ᒧᔭᒻ ᐊ ᐃᓯᓇᒂᒡ ᐊᐛᓐ ᐎᔾ ᑲ ᒪᐅᒋᑎᒪᓱᑦ ᒐᒂᔪᐤ᙮ ᓇᒪ ᐛᔪᑎᓯᐤ ᐃᑕᔨᒥᑯᐤ ᒋᓴᒪᓂᑐᐛ ᐊ ᑭᓄᐛᐱᒥᑯᑦ᙮”
ᐊ ᐃᔅᐸᔨᒧᑐᐛᐧᒄ ᒋᓴᒪᓂᑐᐤ
ᒪᑎᔪᐤ 6.25-34
22ᐊᑯ ᒋᓴᔅ ᐊᑕᑦ ᐅᒋᔅᒋᓄᐊᒧᐛᑭᓇ, “ᐊᐅᒄ ᒪᒃ ᐅ ᐛᒋ ᐃᑎᑎᑯᒡ ᒐ ᐊᑲ ᒋ ᒥᑯᔅᑲᑕᔨᑎᒪᒄ ᒥᒋᒻ ᑕᓐ ᓇᑐᐛᔨᑎᒪᒄ ᒐᒋ ᐅᒋ ᐱᒪᑎᓯᔭᒄ ᒪᒃ ᑭᔭ ᒐᒂᓐ ᒐ ᒋᔅᑭᒪᒄ᙮ 23ᐛᔅ ᐱᒪᑎᓯᐅᓐ ᐅᔅᑕ ᒋᔅᑕᔨᑕᑯᓐ ᐃᔅᐱᔅ ᒥᒋᒻ, ᑭᔭ ᒥᔪᐤ ᐅᔅᑕ ᒋᔅᑕᔨᑕᑯᓐ ᐃᔅᐱᔅ ᐊ ᒋᔅᑭᒥᓐ ᒐᒂᓐ᙮ 24ᒪᒥᑐᓇᔨᒥᒡ ᒪ ᑲᐧᑲᒍᐅᒡ, ᓇᒪ ᓂᑕᐅᒋᑕᐅᒡ ᒐᒂᔪᐤ ᑭᔭ ᓇᒪ ᒪᐅᒋᑕᐅᒡ ᒥᒋᒥᔪᐤ, ᓇᒪ ᐅᓯᑕᐅᒡ ᐊᔅᑕᓱᐅᒋᐛᐸ ᒪᒃ ᑕᓯᐱᑕᑭᓇ ᐊᓐᑕ ᒐ ᐊᔅᑕᒡ ᐅᒥᒋᒧᐛᐤ ᐃᔭᐱᒡ ᒪᒃ ᒋᓴᒪᓂᑐᐛ ᐊᓯᒥᑯᐅᒡ᙮ ᒋᔨᐛᐤ ᒪᒃ ᐊᑐᐎᔅ ᒥᔅᑎ ᒋᑦ ᐃᑕᔨᑕᑯᓯᓇᐛᐤ ᐃᔅᐱᔅ ᐊᓐᒡ ᐱᔭᓯᓯᒡ᙮ 25ᒐᒂᓐ ᐛᒋ ᓇᔅᒡ ᐊᔨᒪᔨᑎᒥᐃᑯᔭᒄ ᒐᒂᓐ ᐊᑲ ᒪᒃ ᐊᑐᐎᔅ ᒋ ᒋᓄᑕᔭᒄ ᒋᐱᒪᑎᓯᐅᓄᐛᐛ ? 26ᐊᑲ ᒋ ᐃᑐᑎᒪᒂ ᐊᑐᐎᔅ ᓇᐅᓴᓯᔅ ᒐᒋ ᐱᒪᑎᓯᔭᒄ ᐊ ᒥᑯᔅᑲᑕᔨᑎᒪᒄ ᐅᒋ, ᒐᒂᓐ ᒪᒃ ᒐ ᐅᒋ ᒥᑯᔅᑲᑕᔨᑎᒥᐃᑯᔭᒄ ᐅᔭ ᒐᒂᔪᐛ ?”
27“ᒪᒥᑐᓇᔨᑎᒧᒄ ᒪ ᐛᐳᑯᓂᓴ ᑕᓐᑕ ᐛᒋ ᓂᑕᐅᒋᒋ, ᓇᒪ ᐊᑐᔅᒐᒥᑭᓇ, ᐃᔭᐱᒡ ᒪᒃ ᓇᔅᒡ ᒥᔽᓱᐛ ᐊ ᑭᓄᐛᐸᑕᑭᓄᐅᒋ᙮ ᒋ ᐎᑎᒪᑎᓇᐛᐤ, ᐊᑎ ᐊᓂᔭ ᐊᒋ ᐃᔅᐱᔅ ᐛᔪᑎᓯᑦ ᐊᓂᔭᐧᑲ ᒋᓴᐅᒋᒪᐤ ᓴᓚᒥᓐ ᓇᒪ ᐃᔭᐱᒡ ᐅᒋ ᐃᔅᐱᔅ ᒥᔽᓯᔪᐛ ᐅᑦ ᐊᐱᒋᑕᐅᓇ ᐊ ᐃᓯᓇᑯᓂᔨᒋ ᐛᐱᑯᓇ᙮ 28ᐛᔅ ᒋᓴᒪᓂᑐᐤ ᓂᑕᐅᒋᑕᐤ ᒥᔅᑯᓱᐛ ᒐ ᒥᔪᓇᒂᒡ ᐊᔅᒋᔾ᙮ ᐊᓐ ᒥᔅᑯᓱᐛ ᐊ ᒥᔪᓇᒂᒡ ᐊᓄᒡ ᒐᓯᑲᒡ, ᐛᐸᒐ ᓴᔅ ᒋᑭ ᒋ ᐸᔅᑕᐛ᙮ ᐊᑯ ᒪᒃ ᑕᑈ ᒋᓴᒪᓂᑐᐤ ᓇᑕᐅᒋᑕᒂ ᒥᔅᑯᓱᐛ ᒐᒋ ᐅᒋ ᒥᔽᓯᒡ ᐊᔅᒋᔾ ᒐᔅᑎᓇᔅ ᒋᑭ ᒋ ᐃᑐᑎᒪᑯᐛᐤ ᒐᒋ ᒥᔨᑕᒄ ᒐᒂᔪᐤ ᒐ ᒋᔅᑭᒺᒄ᙮ ᑕᑈ ᑲ ᐊᐱᓴᓯᒡ ᒋᑕᑈᑎᒧᐅᓄᐛᐤ᙮”
29“ᐊᑲᐎᔾ ᒪᒃ ᒧᔅ ᒋᑭ ᐅᒋ ᒪᒥᑐᓇᔨᑎᒥᐃᑯᓇᐛᐤ ᒐᒂᓐ ᒐ ᒥᒋᔭᒄ ᑭᔭ ᒐᒂᓐ ᒐ ᒥᓂᔭᒄ᙮ 30ᒥᓯᐛ ᐊᐛᓐ ᐊ ᐃᑎᔅᑲᓇᓯᑦ ᐅᑕ ᐊᔅᒋᒡ ᐊᑲ ᑕᑈᔭᔨᒪᑦ ᒋᓴᒪᓂᑐᐛ ᒧᔅ ᒪᒥᑐᓇᔨᑎᒥᐃᑯᐤ ᐅᔭ ᒐᒂᔪᐤ᙮ ᒍᑕᐎᐛᐤ ᒪᒃ ᒋᔅᒐᔨᑎᒻ ᒥᓯᐛ ᑕᓐ ᐊ ᐃᓯ ᓂᑐᐛᔨᑎᒪᒄ᙮ 31ᐃᐛᒃ ᐃᑕᔨᑕᑯᓐ ᓂᔅᑎᒻ ᒐᒋ ᓇᓂᑐ ᒋᔅᒐᔨᑎᒺᒄ ᒋᓴᒪᓂᑐᐤ ᐅᒋᓴᐅᒋᒪᐅᓐ ᑭᔭ ᒐ ᐃᑐᑎᒪᒄ ᑕᓐ ᐊ ᐃᓯ ᓂᑐᐛᔨᑕᐧᒃ ᒋᓴᒪᓂᑐᐤ ᑭᔭ ᒥᒄ ᒐ ᐃᓯ ᒥᔨᑕᒄ ᐊᓂᔭ ᒐᒂᔪᐛ ᑲ ᓄᑕᐱᔨᔭᒄ᙮”
ᐛᔪᑎᓯᐅᓐ ᒋᒋᒋᓯᑯᒡ ᐊ ᑎᒂᒡ
ᒪᑎᔪᐤ 6.19-21
Luke 12.32-40 (Proper-14 Year C)
32“ᐊᑲᐎᔾ ᓴᒋᓯᒄ, ᐊᑎ ᐊᑲ ᒥᒐᑎᔭᒄ, ᐛᔅ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᓇᔅᒡ ᑕᑈ ᓇᐊᔨᑎᒥᐃᑯᐤ ᒐᒋ ᒥᔨᑕᒄ ᐅᒋᓴᐅᒋᒪᐅᓐ᙮ 33ᐊᑕᐛᒐᒄ ᐊᓂᔭ ᒐᒂᔪᐛ ᐊ ᐃᓯ ᑎᐱᔨᐛᐅᓯᔭᒄ ᐊᑯ ᒐ ᒥᔭᑯᒡ ᑲ ᒋᔅᑎᒪᑎᓯᒡ ᐊᓂᔭ ᓱᓇᔭᔪᐤ᙮ ᐛᔅ ᐅ ᐃᓯ ᐃᑐᑎᒪᒂ ᒋᓴᒪᓂᑐᐤ ᒋᑭ ᑎᐸᐊᒪᑯᐛᐤ ᐊᓐᑕ ᒋᒋᒋᓯᑯᒡ᙮ ᐛᔅ ᑕᓐ ᒐ ᐃᓯ ᑎᐸᐊᒪᑕᒄ ᒋᓴᒪᓂᑐᐤ ᓇᒪ ᓂᑕ ᒋᑭ ᐅᒋ ᐃᔎᐱᔪᐤ ᐛᔅ ᓇᒪ ᓂᑕ ᒋᑭ ᒋ ᑭᒐᒧᑎᒪᑯᓇᐛᐤ ᑭᔭ ᒥᓐᑐᓯᒡ ᓇᒪ ᒋᑭ ᒋ ᓂᓱᐅᓇᒋᑕᐅᒡ᙮ 34ᐊᓐᑕ ᐊ ᑎᒂᒡ ᒋᐛᔪᑎᓯᐅᓄᐛᐤ ᐊᑯᑕ ᒧᔅ ᒐ ᐃᓯ ᒪᒥᑐᓇᔨᑎᒪᒄ᙮”
ᒋᓴᔅ ᑲ ᐊᔨᒧᑕᐧᒃ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ
35“ᐊᔭᔅᑯᐎᒄ ᐊ ᐊᓱᐛᐱᒪᒄ ᐅᑎᐸᔨᒋᒐᐤ, ᓇᔅᒡ ᒋᐸ ᐃᑕᔅᐱᓱᓇᐛᐤ ᑭᔭ ᒋᐛᔅᑕᓂᐱᒪᑭᓄᐛᐛ ᒋᐸ ᓯᔅᑲᐊᓇᐛᐤ᙮ 36ᒧᔭᒻ ᐊᐱᒋᐊᑭᓐᒡ ᒋᐸ ᐃᓯᓇᑯᓯᓇᐛᐤ ᐊ ᐊᓱᐛᐱᒪᒡ ᐅᒋᒪᒧᐛᐛ ᒐᒋ ᐸᒋ ᒋᐛᔨᒋ ᐊᒋ ᓇᒋ ᒥᑯᓴᔨᒋ ᐊ ᓂᐳᐅᓇᓄᐎᒡ᙮ ᑎᑯᓯᓂᔨᒐᓂ ᑎᐛᒡ ᒋᑭ ᔪᑕᓂᒧᐛᐅᒡ᙮ 37ᒋᑭ ᓱᐛᔨᑕᑯᓱᐅᒡ ᒪᒃ ᐊᓐᒡ ᐊᐱᒋᐊᑭᓐᒡ ᒥᔅᑲᑯᑥᐛ ᐊᓂᔭ ᐅᒋᒪᒧᐛᐛ ᐊᒋ ᐊᔭᔅᑯᐎᔅᑐᐛᒡ᙮ ᒋ ᐎᑎᒪᑎᓇᐛᐤ ᒪᒃ, ᐊᓐ ᐅᒋᒪᐤ ᒋᑭ ᐊᔭᔅᑯᐎᔪᐤ ᐎᔾ ᒂᔅᒋᐱᓐ ᒐᒋ ᐃᑐᑎᒧᐛᑦ ᑕᓐ ᑲ ᐃᓯ ᐃᑐᑎᒪᑯᑦ ᑭᔭ ᒐ ᐎᓴᒪᑦ ᒐᒋ ᒥᒋᓱᔨᒋ, ᐛᐛᒡ ᐎᔾ ᒋᑭ ᐎᔅᑐᐛᐤ᙮ 38ᒋᑭ ᓱᐛᔨᑕᑯᓱᐅᒡ ᐊᓐᒡ ᐊᐱᒋᐊᑭᓐᒡ ᐊᔭᔅᑯᐎᑥᐛ ᐃᔅᐱ ᑎᑯᓯᓂᔨᒐᓂ ᐅᒋᒪᒧᐛᐛ ᐊᑎ ᐊᐱᑕᑎᐱᔅᑲᔨᒐ ᑭᔭ ᒪᒃ ᓯᔅᒋᑯᒡ ᑎᑯᓯᓂᔨᒐᓂ᙮”
39“ᐎ ᓂᔅᑐᑎᒧᒄ ᐅ᙮ ᒧᔭᒻ ᐊᐛᓐ ᐎᒋᒡ ᐊ ᑕᑦ ᒋᔅᒐᔨᒪᑦ ᒪᒃ ᑲᓂᑕᐅᒋᒧᑎᔨᒋ ᒐ ᐸᒋ ᑎᑯᓯᓂᔨᒋ, ᒋᐸ ᐊᔭᔅᑯᐎᔅᑐᐛᐤ᙮ ᐊᑐᒡ ᐎ ᒋᐸ ᐅᒋ ᐱᔅᑎᓇᐤ ᒥᒄ ᒐᒋ ᐃᓯ ᑭᒐᒧᑎᔨᒋ ᐊᓐᑕ ᐎᒋᒡ᙮ 40ᐊᐅᒄ ᒪᒃ ᐅ ᐛᒋ ᐃᓯᓇᒂᒡ ᑭᔭ ᒋᔨᐛᐤ ᒧᔅ ᒐᒋ ᐊᔭᔅᑯᐎᔭᒄ᙮ ᐛᔅ ᐃᔪᐤ ᐅᑯᓯᓴᓐ ᒋᑭ ᑎᑯᓯᓐ ᐊᓐᑕ ᐊᑲ ᓇᔅᒡ ᐸᓱᐛᔨᒪᒂ ᒐᒋ ᑎᑯᓯᐧᒃ᙮”
ᐊᐱᒋᐊᑭᓐ ᑲ ᐃᑈᐧᑲᑦ ᑭᔭ ᐊᓐ ᐊᐱᒋᐊᑭᓐ ᐊᑲ ᐃᑈᐧᑲᑦ
ᒪᑎᔪᐤ 24.45-51
41ᐱᑕᕐ ᒋ ᐃᔅᒋᔄᐤ, “ᐅᑎᐸᔨᒋᒐᐤ, ᓂᔭᓐ ᐊ ᒥᒄ ᒋᑦ ᐃᔨᒥᐃᓇᓐ ᐅ ᑎᐸᒋᒧᐅᓐ ᑲ ᐎᑎᒥᓐ ᑭᔭ ᒪᒃ ᒥᓯᐛ ᐊᐛᓐ ᐊ ᐃᔨᒪᐊᐅᑕ ?”
42ᐅᑎᐸᔨᒋᒐᐤ ᒋ ᐃᔅᒋᔄᐤ, “ᐊᐱᒋᐊᑭᓐ ᑯᐃᔅᒄ ᑲ ᐃᑐᑕᐧᒃ ᐅᑦ ᐊᑐᔅᒐᐅᓐ ᑭᔭ ᑲ ᐃᑈᐧᑲᑦ ᐊᐅᒄ ᒐ ᐅᑎᓂᑯᑦ ᐅᒋᒪᒪ ᐎᔾ ᒐᒋ ᐅᒋᒪᐧᑲᑐᐛᑦ ᒥᓯᐛ ᐊᓂᔭ ᑯᑎᑲ ᐊᐱᒋᐊᑭᓇ ᑭᔭ ᒐᒋ ᓂᓇᑭᑐᐛᔨᑕᒺᑦ ᐊᓂᔭ ᒐᒋ ᐃᓯ ᐊᓯᒪᑭᓄᔨᒋ ᐃᔅᐱ ᐅᑎᒋᐱᔨᒐ ᒐ ᐊᓯᒪᑭᓄᔨᒋ᙮ 43ᒋᑭ ᓱᐛᔨᒪᑭᓄᐤ ᐊᓐ ᐊᐱᒋᐊᑭᓐ ᒥᔅᑯᐛᑭᓄᒐ ᑯᐃᔅᒄ ᐊ ᐃᑐᑕᐧᒃ ᐊᓂᔭ ᐅᑦ ᐊᑐᔅᒐᐅᓐ ᐃᔅᐱᔅ ᑎᑯᓯᓂᔨᒐᓂ ᐅᒋᒪᒪ᙮ 44ᑕᑈ ᒋᑦ ᐃᑎᓇᐛᐤ, ᒋᑭ ᒥᔨᑯᐤ ᐊᓂᔭ ᐅᒋᒪᒪ ᒥᓯᐛ ᒐᒋ ᓂᓇᑭᑐᐛᔨᑕᒺᑦ ᑕᓐ ᐊ ᐃᓯ ᑎᐱᔨᐛᐅᓯᔨᒋ᙮ 45ᒥᒄ ᒪᒃ ᐃᓯ ᒪᒥᑐᓇᔨᑕᒐ ᐊᓐ ᐊᐱᒋᐊᑭᓐ, ᐊᔅᒄ ᓇᐅᔅ ᒐ ᐃᔅᐱᔅ ᑎᑯᓯᐧᒃ ᒥᓐ ᓄᒋᒪᒻ, ᐃᑕᔨᑕᒐ᙮ ᐊᑯ ᒪᒃ ᓇᔅᒡ ᓂᓇᐧᑲᒋᐊᒐ ᐊᓂᔭ ᐎᒋ ᐊᐱᒋᐊᑭᓇ ᑲ ᐅᒋᒪᐧᑲᑐᐛᑦ ᐊ ᐅᑎᑕᒪᐛᑦ ᑭᔭ ᒥᒄ ᒥᒋᓱᒐ ᒪᒃ ᒋᔎᐸᒐ, 46ᐃᔅᐱᔅ ᐅᒋᒪᒪ ᑎᑯᓯᓂᔨᒐᓂ ᐊᑲ ᐸᓱᐛᔨᒪᑦ ᑭᔭ ᐊᑲ ᒋᔅᒐᔨᑕᐧᒃ, ᐊᑯ ᒐ ᐛᐛᓯᐊᑭᓄᐅᑦ ᓇᔅᒡ ᒐᒋ ᐛᐎᓯᒐᔨᑕᐧᒃ᙮ ᐊᑯ ᒪᒃ ᐊᓐᑕ ᒐ ᐃᑎᓴᐛᑭᓄᐅᑦ ᐊᑲ ᑕᑈᑎᒥᔨᒋ ᐊ ᑕᔨᒋ ᒐᒋ ᐃᓯ ᓂᓇᐧᑲᑕᔨᒧᑦ᙮”
47ᒋᓴᔅ ᒥᓐ ᒂ ᐊᑎ ᐎᑎᒧᐛᑦ, “ᐊᐱᒋᐊᑭᓐ ᑲ ᒋᔅᒐᔨᑕᐧᒃ ᑕᓐ ᐊ ᐃᓯ ᓂᑐᐛᔨᑎᒥᔨᒋ ᐅᒋᒪᒪ ᒐᒋ ᐃᑐᑕᐧᒃ ᐊᑲ ᒪᒃ ᐊᔭᔅᑯᐎᐃᑎᓱᒐ ᒐᒋ ᐃᑐᑕᐧᒃ ᐊᓂᔭ ᑲ ᐃᑎᓱᒪᑭᓄᐅᑦ ᒋᑭ ᒥᔅᑎ ᐸᐱᓯᔅᑕᐛᑭᓄᐤ ᐊ ᐛᐛᓯᐊᑭᓄᐅᑦ᙮ 48ᐊᑯ ᐊᓐ ᐊᐱᒋᐊᑭᓐ ᐊᑲ ᒋᔅᒐᔨᑕᐧᒃ ᑕᓐ ᐊᓐ ᑲ ᐃᓯ ᓂᑐᐛᔨᒥᑯᑦ ᐅᒋᒪᒪ ᒐᒋ ᐃᓯ ᐃᑐᑕᐧᒃ ᑭᔭ ᐊ ᐃᓯ ᐃᑐᑕᐧᒃ ᒐᒂᔪᐤ ᐊᓂᔭ ᐊᑲ ᒋᐸ ᐃᓯ ᐃᑐᑎᒧᑯᐱᓇ ᒋᑭ ᐛᐛᓯᐊᑭᓄᐤ ᑭᔭ ᐎᔾ, ᒥᒄ ᒪᒃ ᐊᐱᓯᔅ ᒥᒄ ᒋᑭ ᐱᓯᔅᑕᐛᑭᓄᐤ᙮ ᐛᔅ ᒋ ᐅᓂᐱᔪᐤ ᐊᑲ ᐅᒋ ᒋᔅᒐᔨᑕᐧᒃ ᐊᒋ ᐅᓂᐱᔨᑦ᙮ ᐊᓐ ᐊᐛᓐ ᒥᔅᑎ ᑲ ᒥᔭᑭᓄᐅᑦ, ᒥᔅᑎ ᒋᑭ ᓂᑐᐛᔨᑎᒪᑯᐤ ᒋᓴᒪᓂᑐᐛ ᑭᔭ ᐊᓐ ᐊᑐᐎᔅ ᒥᔅᑎ ᑲ ᒥᔭᑭᓄᐅᑦ ᐊᑐᐎᔅ ᒥᔅᑎ ᒋᑭ ᓂᑐᐛᔨᑎᒪᑯᐤ ᒋᓴᒪᓂᑐᐛ ᒐᒋ ᐃᑐᑕᐧᒃ᙮”
ᒋᓴᔅ ᐅᒋ ᐊᐅᒄ ᒐ ᐅᒋ ᑎᐸᓂᐱᔨᓇᓄᐅᒡ
ᒪᑎᔪᐤ 10.34-36
Luke 12.49-56 (Proper-15 Year C)
49ᒋᓴᔅ ᒋ ᐃᔅᒋᔄᐤ, “ᐊᐅᒄ ᐅ ᐛᒋ ᑎᑯᓯᓂᔭᓐ ᒧᔭᒻ ᐊ ᐸᒋ ᐃᔎᓯᒪᓐ ᐅ ᐊᔅᒋᔾ ᒐᒋ ᐃᓯᓇᑯᓯᔭᓐ᙮ ᑭᒪ ᒪᒃ ᓴᔅ ᒋ ᐛᔭᑕᑯᓄᑯᐱᓇ᙮ 50ᐛᔅ ᓇᔅᒡ ᑕᑈ ᒋᑭ ᐊᔨᒥᓐ ᒐᒂᓐ ᒐ ᐃᓯ ᓂᒋᔅᑭᒪᓐ ᐊᔪᐛᒡ ᒪᒃ ᓂ ᒥᑯᔅᑲᑕᔨᑕᓐ ᑭᒪ ᓴᔅ ᐅᑎᒋᐱᔨᒡ ᐊ ᐃᑕᔨᑎᒪᓐ᙮ 51ᒋᑦ ᐃᑕᔨᑕᓐ ᐊ ᐊᒋ ᑎᑯᓯᓂᔭᓐ ᐅᑕ ᐊᔅᒋᒡ ᒋᔭᒪᔨᑎᒧᐅᓐ ᒐᒋ ᑎᒂᒡ ? ᓇᒪ, ᒋ ᐎᑎᒪᑎᓇᐛᐤ ᓂᒋ ᐸᒋ ᑎᑯᓯᓐ ᒐᒋ ᑎᐸᓂᐱᔨᓇᓄᐅᒡ᙮ 52ᐊᑯ ᒪᒃ ᒪᐅ ᒐ ᐃᔅᐱᔨᒡ ᓂᔾ ᐅᒋ, ᒧᔭᒻ ᐸᐃᒄ ᐅᑕᓇᐤ ᐱᑕᑕᒡ ᐃᔪᒡ ᓇᒪ ᒋᑭ ᐅᒋ ᓂᐃᔅᑲᑐᐅᒡ᙮ ᓂᔅᑐ ᐊᓐᒡ ᓇᒪ ᒋᑭ ᐅᒋ ᓂᓇᐃᑐᐛᐅᒡ ᐊᓂᔭ ᓂᓱ ᑕᓐ ᐊ ᐃᔅᒋᔄᔨᒋ᙮ ᑭᔭ ᐊᓐᒡ ᓂᓱ ᓇᒪ ᒋᑭ ᐅᒋ ᓇᐊᔨᑎᒺᐅᒡ ᐊᓂᔭ ᓂᔅᑐ ᑕᓐ ᐊ ᐃᔅᒋᔄᔨᒋ᙮ 53ᐅᑕᐎᒪᐤ ᓇᒪ ᒋᑭ ᐅᒋ ᓂᐃᔅᑲᑐᐅᒡ ᐅᑯᓴ, ᑭᔭ ᐅᑲᐎᒪᐤ ᓇᒪ ᒋᑭ ᐅᒋ ᓂᐃᔅᑲᑐᐅᒡ ᐅᑕᓂᓴ᙮ ᑭᔭ ᐅᓯᑯᓯᒪᐤ, ᐊᓂᔭ ᒪᒃ ᐅᓇᐊᑭᓂᔎᒪ ᓇᒪ ᒋᑭ ᐅᒋ ᓂᐃᔅᑲᑐᐅᒡ᙮”
ᐎ ᒋᔅᒐᔨᑎᒧᒄ ᑕᓐ ᐊ ᐃᓯ ᐃᑐᑕᐧᒃ ᒋᓴᒪᓂᑐᐤ ᐊᓄᒡ ᒐᓯᑲᔨᒡ
ᒪᑎᔪᐤ 16.2,3
54ᒋᓴᔅ ᐊᔪᐤ ᒂ ᐊᑎ ᐃᑕᑦ ᐊᓂᔭ ᐃᔪᐛ, “ᐊ ᐛᐱᒪᒄ ᑭᔅᑯᐅᓐ ᐊᓐᑕ ᐊᑎᒪᐱᓯᒧᑕᒡ ᐃᑕᒐ ᑎᐛᒡ ᒋᑦ ᐃᔅᒋᔄᓇᐛᐤ ᒐ ᒋᒺᒡ ᑕᑈ ᒪᒃ ᒋᒧᓐ᙮ 55ᑭᔭ ᐊ ᒧᓯᑕᔭᒄ ᐊ ᓴᐅᓄᐊᒡ ᒋᑦ ᐃᔅᒋᔄᓇᐛᐤ ᒐ ᒋᓯᑕᒡ, ᒋᓯᑕᐤ ᒪᒃ᙮ 56ᒋᔨᐛᐤ ᑲ ᐊᔭᒥᐊᐧᑲᓱᔭᒄ ᒋ ᒋᔅᒐᔨᑕᓇᐛᐤ ᑕᓐ ᒐ ᐃᔅᐱᔨᒡ ᒥᒄ ᐊ ᑭᓄᐛᐸᑎᒪᒄ ᐊᔅᒋᔾ ᑭᔭ ᒋᓯᒄ᙮ ᑕᓐᑕ ᒪᒃ ᐛᒋ ᐊᑲ ᒋ ᓂᔅᑐᓂᒪᒄ ᑕᓐ ᐊᓐ ᐊ ᐃᓯ ᐃᑐᑕᐧᒃ ᒋᓴᒪᓂᑐᐤ ᐊᓄᒡ ᒐᓯᑲᔨᒡ ?”
ᐃᔨᒥᐃ ᐊᓐ ᑲ ᐊᑕᒪᔨᒥᔅᒃ ᒐᒋ ᐅᒋ ᒥᔪᐱᔭᒄ
ᒪᑎᔪᐤ 5.25,26
57“ᒐᒂᓐ ᐛᒋ ᐊᑲ ᒋ ᐎᔭᔨᑎᒪᓱᔭᒄ ᑕᓐ ᐊᓐ ᑯᐃᔅᒄ ᒐᒂᓐ ᒐᒋ ᐃᓯ ᐃᑐᑎᒧᐛᐛᒂ ? 58ᓇᐸᐤ ᒪᒃ ᒪᒥᓯᒥᔅᒃ ᒐᒂᓐ ᐊᒋ ᐃᓯ ᐅᓂᑐᑎᒥᓐ, ᐃᑐᑕᔅᒐ ᒪᒃ ᒐᒋ ᐃᑐᑕᐃᔅᒃ ᑎᐸᔅᑯᓂᒐᐅᒋᐛᐱᒡ, ᒋᐸ ᑯᒋᐊᐤ ᐸᑎᒪ ᓂᔅᑎᒻ ᒐᒋ ᒥᔪ ᐃᔨᒥᐃᑦ ᒐ ᐊᑲ ᒋ ᐃᑐᑕᐃᔅᒃ ᐊᓐᑕ᙮ ᐊᑯᑕ ᒪᒃ ᒐᒋ ᐅᒋ ᓇᑲᐎᔨᑦ ᐊᓐᑕ ᐊ ᐎ ᐃᑐᑕᐃᔅᒃ᙮ ᐊᑲ ᒪᒃ ᐃᑐᑎᒥᓇ ᐅ ᐊᑯ ᐊᓐ ᑲ ᑎᐸᔅᑯᓂᒐᑦ ᒐ ᐱᔅᑎᓂᔅᒃ ᐊᓐᑕ ᐃᓯ ᑲᒪᑯᓄᐛᓯᔨᒋ ᐊ ᑕᔨᒋ᙮ ᒐ ᒋᐸᐅᔅᒡ ᐊᓐᒡ ᑲᒪᑯᓄᐛᓯᒡ᙮ 59ᐅ ᒪᒃ ᐃᔅᐱᔨᒐ ᒋ ᐎᑎᒪᑎᓐ ᑕᐸ ᒋᑭ ᒋ ᐎᐎᔨᓐ ᐊᓐᑕ ᑲᒪᑯᓄᐛᓯᐅᒋᐛᐱᒡ ᐸᑐᔅ ᓇᔅᒡ ᒋ ᒋᓯᐧᑭᒥᓇ ᑕᓐ ᐊᓐ ᒋᐸ ᐃᓯ ᒋᓯᐧᑲᓱᓐ᙮”
දැනට තෝරාගෙන ඇත:
ᓗᒃ 12: ᓇᔅᑲᐱ
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada