ᒠᓐ 20
20
ᑲ ᐱᓯᒂᒡ ᒋᐱᐃᒋᐛᑉ
ᒪᑎᔪᐤ 28.1-8; ᒪᕐᒃ 16.1-8; ᓗᒃ 24.1-12
John 20.1-18 (Easter Sunday Year C)
1ᐊᓐ ᑲ ᒋᓴᐊᔭᒥᐊᐅᒋᓯᑲᒡ ᐎᐱᒡ ᒪᒃ ᒥᓐ ᐊ ᐊᑎ ᐛᐸᒡ, ᐊᔅᒄ ᐊ ᐊᒋᑲᔅᑕᔭᒡ ᐊᓐᑕ ᒋᐱᐃᒋᐛᐱᒡ ᒋ ᐃᑐᑕᐤ ᒪᕆ ᒪᒃᑕᓕᓐ ᒂ ᐛᐱᒪᑦ ᐊᓂᔭ ᐊᓯᓂᔭ ᐊᒋ ᐃᒐᑕᐊᑭᓄᐃᒂᓂ ᐊᓐᑕ ᐊ ᐅᒋ ᐱᒐᓄᐎᒡ᙮ 2ᒂ ᒋᒋᐸᑕᑦ ᒂ ᓂᑐᐛᐱᒪᑦ ᓴᐃᒥᓐ ᐱᑕᕋ ᑭᔭ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ ᒋᓴᓴ ᑲ ᓴᒋᐊᔨᒋ ᐊᑯ ᒂ ᐃᑕᑦ ᐅᔭ, “ᒋ ᐅᑎᓂᒧᐛᐅᒡ ᐅᑎᐸᔨᒋᒐᐛ ᐎᔭᔪᐤ ᓇᒪ ᒪᒃ ᓂ ᒋᔅᒐᔨᑎᒺᓐ ᑕᓐᑕ ᑲ ᓇᐅᔅᑕᐛᒡ᙮”
3ᐊᑯ ᐱᑕᕐ ᒂ ᐎᐎᑦ ᐃᔅᐱ ᑲ ᐃᔅᒋᔄᔨᒋ ᐅᔭ ᐊ ᐎᒐᐅᑯᑦ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ᙮ ᐊᓐᑕ ᒋᐱᐃᒋᐛᐱᒡ ᐊᑯᑕ ᑲ ᐃᓯ ᔅᑐᑕᒡ᙮ 4ᑕᐱᔅᑯᓐ ᒋ ᒋᒋᐸᑕᐅᒡ ᒥᒄ ᒪᒃ ᒋ ᐊᑯᔅᒋᐱᔨᔅᑕᑯᐤ ᐱᑕᕐ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ ᐊᑯ ᐎᔾ ᓂᔅᑎᒻ ᑲ ᐸᐸᑕᔨᒋ ᐊᓐᑕ᙮ 5ᐃᔅᐱ ᒪᒃ ᐱᔭᐸᑕᑦ ᐊᓐᑕ ᐊᓐ ᑯᑎᒃ ᒋᔅᒋᓄᐊᒧᐛᑭᓐ ᒋ ᓄᐛᑲᐳᐤ ᐊᓐᑕ ᐊ ᐊᑯᓯᒂᔭᐸᑕᐧᒃ ᐊᓂᔭ ᒋᐱᐃᒋᐛᐱᔪᐤ᙮ ᒥᒄ ᐱᒍᐎᔭᓂᓯᔪᐤ ᒋ ᐛᐸᑎᒻ ᐊᓐᑕ ᐊ ᐊᔅᑕᔨᒡ᙮ ᓇᒪ ᐅᒋ ᐱᒐᐤ᙮ 6ᒐᒃ ᒂ ᐅᒋ ᐸᐸᑕᑦ ᓴᐃᒥᓐ ᐱᑕᕐ ᐊᑯ ᐎᔾ ᐊᓐᑕ ᒂ ᐱᒐᑦ᙮ ᒋ ᐛᐸᑎᒻ ᐊᓂᔭ ᐱᒍᐎᔭᓂᔪᐤ ᐊᓐᑕ ᐊ ᐊᔅᑕᔨᒡ᙮ 7ᐊᑯ ᐊᓂᔭ ᑯᑎᒋᔪᐤ ᐱᒍᐎᔭᓂᓯᔪᐤ ᑲ ᐊᐱᑎᓂᔨᒡ ᒋᓴᓴ ᑲ ᐱᔎᔭᒋᓇᑭᓄᐎᒡ ᐅᔅᑎᒂᓂᔪᐤ ᑎᐸᓐ ᐊᓐᑕ ᒋ ᐊᔅᑕᔪᐤ ᐊᒋ ᒥᔽᒋᓂᑭᓄᐃᑯᐱᓇ᙮ 8ᐊᓐ ᑯᑎᒃ ᒋᔅᒋᓄᐊᒧᐛᑭᓐ, ᐊᓐ ᓂᔅᑎᒻ ᑲ ᐸᐸᑕᑦ ᐊᓐᑕ, ᑭᔭ ᐎᔾ ᒋ ᐱᒐᐤ ᐊᓐᑕ, ᒂ ᐛᐸᑕᐧᒃ ᑭᔭ ᒂ ᐊᑎ ᑕᑈᑕᐧᒃ ᐊ ᒋ ᐅᓂᔅᑲᐃᒂᓂ᙮ 9ᐅᔭ ᒪᒃ ᒪᒂᒡ ᐊᔅᒄ ᓇᒪ ᐅᒋ ᓂᔅᑐᑎᒧᒡ ᐊᓐᑕ ᐊᓂᔭ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᑲ ᐃᑎᔅᑕᔨᒡ ᒥᓐ ᒐ ᐅᓂᔅᑲᔨᒋ᙮ 10ᐊᑯ ᒂ ᒋᐛᒡ ᐎᒋᐛᐛᒡ ᐅᒡ ᒋᔅᒋᓄᐊᒧᐛᑭᓐᒡ᙮
ᒋᓴᔅ ᑲ ᓄᑯᓯᔅᑐᐛᑦ ᒪᕆ ᒪᒃᑕᓕᓇ
ᒪᑎᔪᐤ 28.9,10; ᒪᕐᒃ 16.9-11
11ᐊᑯᑕ ᐊᓐᑕ ᐎᐎᑎᒥᒡ ᐊᓂᔭ ᒋᐱᐃᒋᐛᐱᔪᐤ ᑲ ᓂᐳᐅᑦ ᒪᕆ ᐊ ᒪᑦ᙮ ᐊᓂᔭ ᒪᒃ ᐊ ᒪᑦ ᒋ ᓄᐛᑲᐳᐤ ᐊ ᐱᑕᔭᐸᑕᐧᒃ ᐊᓂᔭ ᒋᐱᐃᒋᐛᐱᔪᐤ᙮ 12ᐊᑯᑕ ᒂ ᐛᐱᒪᑦ ᓂᓱ ᐊᓐᒋᓇ ᐊ ᐛᐸᔅᐱᓱᔨᒋ ᐊ ᐊᐱᔨᒋ ᐊᓐᑕ ᒋᓴᓴ ᑲ ᓇᐅᔅᑕᑭᓄᐎᒡ ᐎᔭᔪᐤ᙮ ᐸᐃᒄ ᐊᓐᑕ ᐊᒋ ᐃᓯ ᐅᔅᑎᒂᓄᔨᒋ ᒋ ᐊᐳᐤ ᐊᑯ ᐊᓐ ᑯᑎᒃ ᐊᓐᑕ ᐃᑕᒐ ᐊᒋ ᐃᓯ ᐅᓯᑎᒡ ᐊᑯᑕ ᑲ ᐊᐱᑦ᙮ 13ᐊᑯ ᒂ ᐃᑎᑯᑦ ᐊᓂᔭ ᐊᓐᒋᓇ, “ᐃᔎᐤ, ᒐᒂᓐ ᐛᒋ ᒪᔨᓐ ?” ᐊᑯ ᒪᕆ ᒂ ᐃᑕᑦ, “ᒋ ᐅᑎᓇᐅᒡ ᓂᑎᐸᔨᒋᒐᓯᒪ ᓇᒪ ᒪᒃ ᓂ ᒋᔅᒐᔨᒪᐅᒡ ᑕᓐᑕ ᑲ ᐃᑐᑕᐊᒡ᙮”
14ᐅᔭ ᒪᒃ ᑲ ᐃᔅᒋᔄᑦ ᒋ ᒋᐛᔎᔪᐤ ᒂ ᐛᐱᒪᑦ ᐊᐛᔪᐛ ᐊ ᓂᐳᔨᒋ ᐊᓐᑕ ᐅᔅᐱᔅᑯᓂᒡ, ᒋᓴᓴ ᒪᒃ ᐊᓂᔭ ᒥᒄ ᓇᒪ ᐅᒋ ᓂᔅᑐᐅᓄᐛᐤ᙮ 15ᒋ ᐃᑎᑯᐤ ᒪᒃ, “ᐃᔎᐤ, ᒐᒂᓐ ᐛᒋ ᒪᔨᓐ ? ᐊᐛᓐ ᓇᓂᑐᐛᐱᒥᑦ ?” ᒂ ᑭᓄᐛᐱᒪᑦ ᒪᕆ ᐊᓂᔭ ᓂᑕᐅᒋᑕᑭᓇ ᑲ ᓇᑭᑐᐛᐸᑎᒥᔨᒋ ᐊ ᐃᑕᔨᒪᑦ, ᐊᑯ ᒂ ᐃᑕᑦ, “ᐸᒋ ᐎᑎᒧᐎ ᒪ ᑕᓐᑕ ᑲ ᐊᔨᑦ ᑭᔭ ᒐ ᓂᑐᐛᐱᒥᒃ᙮”
16“ᒪᕆ,” ᒋ ᐃᑕᐤ ᒋᓴᔅ᙮ ᒋ ᒂᔅᒋᑲᐳᐤ ᒪᕆ ᐊᑯ ᑲ ᐃᑕᑦ ᐊᓂᔭ ᒋᓴᓴ ᐃᑉᕈᐤ ᐊ ᐃᓯ ᐃᔨᒥᑦ, “ᕋᐳᓇᐃ,” ᒋ ᐃᑕᐤ᙮ ᐅ ᒪᒃ ᕋᐳᓇᐃ ᑲ ᐃᓇᓄᐅᒡ ᐊ ᐱᔭᑭᔅᒋᑕᑯᓯᓇᓄᐅᒡ ᐅᑎᐸᔨᒋᒐᐤ ᐃᓇᓄᐤ᙮
17ᒋᓴᔅ ᒂ ᐃᔅᒋᔄᑦ, “ᐊᑲᐎᔾ ᑕᒋᓂᔾ ᐛᔅ ᓇᒪ ᐊᔅᒄ ᓄᑕᐎᔾ ᐊ ᑕᑦ ᓂ ᐅᒋ ᐃᓯ ᐅᐱᔨᓐ᙮ ᓂᑐᐛᐱᒥᒡ ᓂᐧᑲᓂᓯᒡ ᒐ ᐎᑎᒧᐅᑥᐤ ᒐ ᐅᐱᔪᐅᒡ ᓄᑕᐎᔾ ᑭᔭ ᒋᔨᐛᐤ ᒍᑕᐎᐛᐤ ᐊ ᑕᑦ ᐃᔅ, ᓂᒋᓴᒪᓂᑐᒻ ᑭᔭ ᒋᔨᐛᐤ ᒋᒋᓴᒪᓂᑐᒧᐛᐤ᙮”
18ᒪᕆ ᒪᒃᑕᓕᓐ ᒂ ᔅᑐᑕᑦ ᐊ ᓇᓂᑐᐛᐱᒪᑦ ᐊᓂᔭ ᒋᔅᒋᓄᐊᒧᐛᑭᓇ ᐊᑯ ᒂ ᐎᑎᒧᐛᑦ ᐊ ᐃᑕᑦ, “ᐅᑎᐸᔨᒋᒐᐤ ᓂᒋ ᐛᐱᒪᐤ᙮” ᒋ ᐎᑎᒧᐛᐤ ᑭᔭ ᐊᓂᔭ ᑕᓐ ᑲ ᐃᑎᑯᑦ ᒐ ᐃᑕᑦ᙮
ᒋᓴᔅ ᑲ ᓄᑯᓯᔅᑐᐛᑦ ᐅᒋᔅᒋᓄᐊᒧᐛᑭᓇ
ᒪᑎᔪᐤ 28.16-20; ᒪᕐᒃ 16.14-18; ᓗᒃ 24.36-49
John 20.19-31 (Easter-2 Year A, B, C)
19ᐊᓂᔭ ᒪᒃ ᐊ ᐊᑎ ᐅᑕᑯᓯᔨᒡ ᐊᓂᔭ ᓂᔅᑎᒻ ᐊᑎ ᒋᓯᑲᔨᒡ ᒋ ᒪᒧᐎᐅᒡ ᐊᓐᒡ ᒋᔅᒋᓄᐊᒧᐛᑭᓐᒡ᙮ ᒋ ᐊᑎᓴᑲᐎᓱᐅᒡ ᒪᒂᒡ ᐊᓂᔭ ᐊ ᒪᒧᐎᒡ ᐛᔅ ᒋ ᑯᔅᑕᐅᒡ ᐊᓂᔭ ᒍᐤ ᐅᒋᒪᐛ᙮ ᓯᔅᒋᑯᒡ ᒪᒃ ᒋ ᐅᒋ ᐛᐱᒪᐅᒡ ᒋᓴᓴ ᐊ ᓂᐳᔨᒋ ᐊᓐᑕ ᐊ ᑕᒡ᙮ ᒋ ᐃᑎᑯᐅᒡ ᒪᒃ, “ᒋᔭᒪᔨᑎᒧᒄ᙮” 20ᐃᔅᐱ ᒪᒃ ᑲᒋ ᐃᓯ ᐛᒋᔭᒪᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊᑯ ᒂ ᐛᐸᑎᔭᑦ ᐅᑎᒋᔭ ᑭᔭ ᐅᔅᐱᑭᔾ᙮ ᒋᒋᐛ ᒪᒃ ᒋ ᓯᒋᔭᓱᐅᒡ ᐊᒋ ᐛᐱᒪᒡ ᐅᑎᐸᔨᒋᒐᓯᒧᐛᐛ᙮
21ᒥᓐ ᒂ ᐃᔨᒪᐊᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, “ᒋᔭᒪᔨᑎᒧᒄ᙮ ᒧᔭᒻ ᓄᑕᐎᔾ ᑲ ᐸᒋ ᐃᑎᓴᐅᑦ ᒋᔭᒪᔨᑎᒧᐅᓂᒡ ᐃᔅ, ᑭᔭ ᓂᔾ ᒋᑦ ᐃᑎᓴᐅᑎᓇᐛᐤ ᒋᔭᒪᔨᑎᒧᐅᓂᒡ ᐃᔅ᙮” 22ᐊᑯ ᐊᓐᑕ ᐊ ᑕᔨᒋ ᑲ ᐃᓯ ᐃᔭᔭᑦ ᒂ ᐃᑕᑦ, “ᐅᑎᓇᐧᒄ ᑲ ᐸᔭᒋᓯᑦ ᐊᒐᐧᒄ᙮ 23ᐛᐸᔨᑎᒧᐛᒂ ᐊᐛᓐ ᒋᑭ ᐛᐸᔨᑎᒧᐛᑭᓄᐤ, ᐊᑲ ᐛᐸᔨᑎᒧᐛᒂ ᐊᐛᓐ ᓇᒪ ᒋᑭ ᐅᒋ ᐛᐸᔨᑎᒧᐛᑭᓄᐤ᙮”
ᒋᓴᔅ ᑭᔭ ᑥᒥᔅ
24ᐊᓐ ᒪᒃ ᐸᐃᒄ ᒋᔅᒋᓄᐊᒧᐛᑭᓐ ᑥᒥᔅ ᑲ ᐃᓯᓂᐧᑲᓱᑦ ᐊᔭᒡ ᐊ ᐃᓯᓂᐧᑲᑕᑭᓄᐅᑦ ᐸᐃᒄ ᐊᓐ ᑲ ᓂᓯᒡ ᒋ ᐃᓯᓂᐧᑲᑕᑭᓄᐤ, ᓇᒪ ᐅᒋ ᑕᐤ ᐎᔾ ᒋᓴᓴ ᑲ ᑎᑯᓯᓂᔨᒋ᙮ 25ᐊᓂᔭ ᒪᒃ ᐊ ᐎᑎᒪᑯᑦ ᐊᓂᔭᔪᐛ ᑯᑎᑲ ᒋᔅᒋᓄᐊᒧᐛᑭᓇ ᐊᒋ ᐛᐱᒪᔨᒋ ᒋᓴᓴ, ᓇᒪ ᐅᒋ ᑕᑈᑐᐛᐤ᙮ ᒋ ᐃᑕᐤ, “ᓇᒪ ᓂᑭ ᐅᒋ ᑕᑈᑕᓐ ᐸᑐᔅ ᒋ ᑕᒋᓂᒧᒐ ᐅᑎᒋᔭ ᐊᓐᑕ ᑲ ᒋᔅᑕᔎᑕᑭᓄᐅᑦ ᑭᔭ ᐸᑐᔅ ᒋ ᑕᒋᓂᒐ ᐊᓐᑕ ᐅᔅᐱᑲᒡ᙮”
26ᔭᓇᐤ ᑕᑐᐤ ᒋᓯᑲᐛ ᒪᒃ ᐃᔅᐱᔅ ᐊᑯ ᒥᓐ ᑲ ᒪᒧᐎᒡ ᐊᓐᒡ ᒋᔅᒋᓄᐊᒧᐛᑭᓐᒡ᙮ ᑥᒥᔅ ᒪᒃ ᑭᔭ ᐎᔾ ᐊᑯᑕ ᑲ ᑕᑦ᙮ ᒋ ᐊᑎᓴᑲᐛᑭᓄᐎᒡ ᔅᑐᐧᑭᓐᒡ ᐃᔭᐱᒡ ᒪᒃ ᒋᓴᔅ ᒋ ᐸᒋ ᐱᒐᐤ ᒂ ᐸᒋ ᐅᑎᔅᑯᑲᐳᔅᑐᐛᑦ᙮ 27ᒂ ᐃᑕᑦ ᐊᓂᔭ ᑥᒥᓴ, “ᑕᒋᓇ ᓂᑎᒋᔭ ᑭᔭ ᐅ ᓂᔅᐱᑭᔾ ᐸᒋ ᑕᒋᓇ, ᐊᑯᓐ ᐊᑯ ᐃᔅᐱᔅ ᐊᓏᑕ, ᑕᑈᑕ ᐊᑯ᙮”
28ᐊᑯ ᑥᒥᔅ ᒂ ᐃᑕᑦ, “ᓂᑎᐸᔨᒋᒐᓯᒻ ᑭᔭ ᓂᒋᓴᒪᓂᑐᒻ᙮”
29ᒋᓴᔅ ᒂ ᐃᑕᑦ, “ᒋ ᑕᑈᑕᓐ ᐊ ᒥᒄ ᐊ ᐸᒋ ᐛᐱᒥᔨᓐ᙮ ᓱᐛᔨᑕᑯᓱᐅᒡ ᐊᓐᒡ ᑲ ᑕᑈᑕᒡ ᐊᑎ ᐊᑲ ᐅᒋ ᐛᐱᒥᒡ᙮”
ᑕᓐ ᐊ ᐃᑕᐸᑎᒡ ᐅ ᒥᓯᓇᐃᑭᓐ
30ᒋᓴᔅ ᐅᒋᔅᒋᓄᐊᒧᐛᑭᓇ ᒥᒐᑦ ᒋ ᐛᐱᒥᑯᐤ ᒪᒥᔅᑲᒡ ᒐᒂᔪᐤ ᐊ ᐃᑐᑕᐧᒃ ᐊᑲ ᐅᒋ ᒥᓯᓇᐃᑭᓄᐅᒋ ᐅᑕ ᒥᓯᓇᐃᑭᓂᒡ᙮ 31ᐊᐅᒄ ᐅᔭ ᑲ ᒥᓯᓇᐃᑭᓄᐅᒋ ᒐᒋ ᑕᑈᑎᒪᒄ ᒋᓴᔅ ᑕᑈ ᐊ ᐊᐎᔨᒋ ᙭, ᒋᓴᒪᓂᑐᐤ ᐅᑯᓴ, ᑭᔭ ᑕᑈᔭᔨᒪᒂ ᐅᑦ ᐃᓯᓂᐧᑲᓱᐅᓐ ᒐ ᐊᔭᔭᒄ ᐱᒪᑎᓯᐅᓐ᙮
දැනට තෝරාගෙන ඇත:
ᒠᓐ 20: ᓇᔅᑲᐱ
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada